Jeremiah 10

Dirava momokani, bona dirava koikoidia

Israela besena e, Lohiabada ese umui dekenai ia henia hereva do umui kamonai. Lohiabada ese inai bamona ia gwau:

“Basileia idauidau edia dala hegeregerena do umui karaia lasi,
bona guba dekenai idia vara toadia dekenai do umui gari lasi,
Badina bese idauidau taudia ese,
inai gaudia dekenai idia gari noho.
Bese idauidau taudia edia kara be anina lasi.
Idia ese au ta uda dekena amo idia utua noho,
bona au koroa tauna ese,
iena kaia bona ira dekena amo ia koroa.
Inai kaivakuku dekenai,
be siliva bona golo herahera idia atoa.
Bona kaivakuku do ia moru diho lasi totona,
hama bona ikoko dekena amo idia haginia namonamo.
To inai bamona kaivakuku,
be manu hagaria gaudia kiukamba uma lalonai bamona.
Idia hereva diba lasi.
Taunimanima ese idia abia isi,
idia huaia loaloa noho,
badina idia raka diba lasi.
Idia dekenai do umui gari lasi,
badina be dika idia havaraia diba lasi.
Namo havaraia dalana danu idia diba lasi.”

Lohiabada e, ta oi hegeregerena ia noho lasi.
Oi be bada,
bona oiemu ladana ena siahu be bada.
Bese idauidau edia King, Lohiabada e!
Daika ese oi dekenai do ia gari lasi?
Badina oi dekenai idia gari,
be oiemu ahuna korikori.
Lohiabada e, bese idauidau edia aonega taudia ibounai edia huanai,
bona edia basileia ibounai edia lalonai,
oi hegeregerena ta ia noho lasi.
Idia ibounai be laloa metau bona kavakava taudia,
badina edia kaivakuku ese,
dahaka idia dekenai idia hadibaia diba?
Siliva, idia botaia palaka gauna,
be Tarasisi dekena amo idia mailaia noho,
bona golo be Upasa dekena amo idia mailaia.
Inai herahera be diba momo taudia edia gaukara,
bona golo gaukaralaia taudia edia gaukara.
Unai gaukara taudia edia dabua be kakakaka,
bona kakakaka sisina.
Unai dabua be dabua hatua diba momo taudia ese,
idia karaia vadaeni.
10 To Lohiabada be Dirava korikori,
ia be mauri ena Dirava,
bona noho hanaihanai King.
Ia badu neganai tano ia marere bada noho.
Iena badu ena henunai,
basileia idauidau idia goada diba lasi.
11 Unai dainai Israela taudia e, unai basileia idauidau taudia do umui hamaoroa, umui gwau: “Guba bona tanobada idia karaia lasi diravadia be tanobada dekena amo, bona guba ena henuna dekena amo, do idia boio momokani.”

Dirava hanamoa ane

12 Lohiabada ese iena siahu dekena amo,
tanobada ia karaia.
Iena aonega dekena amo,
tanobada ena kahana ibounai ia haginia,
bona guba ibounai danu Lohiabada ese ia karaia.
13 Lohiabada ia hereva neganai,
guba ena ataiai idia noho ranu be idia boiboi noho.
Ia ese tanobada ena dokona gabudia dekena amo,
ori ia mailaia noho,
ma ia ese medu lalonai,
kevaru ia hadiaria hedinarai noho.
Bona lai be iena haboua gabuna dekena amo ia siaia mai noho.

14 Taunimanima ibounai,
be kavakava bona aonega lasi,
bona golo idia gaukaralaia taudia ibounai be,
edia kaivakuku ese idia hahemaraia noho.
Badina edia kaivakuku be koikoi gaudia,
bona idia mauri noho lasi.
15 Idia be anina lasi,
laloa kerere ese ia havaraia gaudia sibona.
Davana abia dinana dekenai,
Lohiabada ese do ia hadikadia ore.
16 Dirava, ia ese Iakobo ia havaraia Diravana,
be unai kaivakuku bamona lasi,
badina ia ese gau ibounai ia karaia.
Ia ese Israela taudia ia abia hidi vadaeni,
iena bese korikori do idia lao totona.
Iena ladana be Siahu Ibounai Lohiabada.

Iuda ese dika do ia davaria

17 Ierusalema taudia e,
emui hanua be idia koua hagegea vadaeni.
Emui kohu do umui haboua bona kumia,
18 badina Lohiabada ese inai tano dekena amo,
umui do ia negea lao.
Ia ese hisihisi umui emui latanai do ia mailaia,
bona mamina do umui abia momokani.
Lohiabada ese ia hereva vadaeni.

19 Ma Ieremia ia gwau,
“Lau madi o, egu bero dainai!
Egu bero be ia namo lou diba lasi.
To guna lau gwau,
‘Momokani inai be egu hisihisi ta,
bona lau ese do lau goadalaia.’
20 To egu palai ruma be idia hadikaia ore vadaeni.
Iena varo ibounai be idia makohia vadaeni.
Egu natuna tau ese lau idia rakatania vadaeni,
idia boio momokani.
Egu palai ruma haginia lou totona,
tau ta ia noho lasi.
Egu iduara koua dabua do ia taua dae lou,
tauna ta be lasi.
21 Badina be iseda lohia taudia be kavakava.
Idia ese dala maorona totona Lohiabada idia nanadaia lasi.
Unai dainai idia be idia kwalimu lasi,
bona iseda bese taudia idia heau boio, heau boio vadaeni.
22 Kamonai!
Sivarai idia gwauraia loaloa noho, idia gwau,
‘Iseda mirigini kahana dekenai noho basileia dekena amo,
regena bada idia karaia noho.
Inai bese ena tuari taudia ese,
Iuda hanuadia be tano kaukau gabudia do idia halaoa,
uda sisia do idia noho gabudia.’ ”

Ieremia ena guriguri

23 Lohiabada e, lau diba taunimanima edia mauri dalana,
be idia sibona ese idia naria lasi,
bona taunimanima ta lasi ese iena mauri ia biagua noho.
24 Lohiabada e, oiemu bese taudia do oi matakani henia,
to mani emu kara,
mai kota maoromaoro danu do oi karaia,
mai emu badu danu lasi,
oi ese ai do oi haorea momokani garina.
25 Oiemu badu be oi idia tomadiho henia lasi besedia,
edia latanai mani do oi atoa.
Oiemu ladana idia negea besedia edia latanai,
oiemu badu do oi bubua diho.
Idia ese oiemu bese Israela taudia idia alaia mase vadaeni.
Idia ese ai idia hadikaia ore,
bona aiemai tano idia hadikaia momokani vadaeni.
Copyright information for `HMO