Jeremiah 21

Ieremia ese peroveta hereva ia gwauraia, Ierusalema do ia moru

Iuda ena king Sedekaia ese Pasahuru Malekaia bona hahelagaia tauna Sepanaia Maseaia lau dekenai ia siaia. Idia ese lau idia nanadaia, idia gwau, “Ai dainai Lohiabada mani oi nanadaia, badina be Nebukanesa, Babulonia ena king ese ai ia tuari henia noho. Sedira Lohiabada ese iena hoa kara ta do ia karaia ai totona, bona ia ese Nebukanesa do ia siaia lou.”

Vadaeni lau Ieremia ese idia dekenai lau haere, lau gwau, “Sedekaia be inai bamona do umui hamaoroa, umui gwau, ‘Lohiabada, Israela ena Dirava ese ia hereva, ia gwau: Sedekaia e, lau ese oiemu tuari taudia, Babulonia king mai ena tuari orea idia tuari henia noho taudia do lau halusia. Lau ese oiemu tuari taudia edia tuari gaudia do lau haboudia hanua ena huana dekenai. Lau ese umui do lau tuari henia, mai egu badu siahu bada danu. Lau ese inai hanua idia noho taudia ibounai do lau alaia ore. Taunimanima bona ubua gaudia danu be hanaia gorere dikana dekena amo do idia mase.’ ”

Lohiabada ese ma ia gwau, “Unai murinai lau ese Sedekaia, Iuda ena king, bona iena durua taudia, bona inai hanua lalonai hanaia gorere ese ia hamasea lasi taudia do lau abia, bona Nebukanesa ena siahu henunai umui do lau atoa. Ia ese tuari kaia ena matana dekena amo umui do ia alaia mase, mai bogahisihisi lasi. Ia ese umui ta do ia ruhaia lasi, bona umui ta do ia bogahisihisi henia lasi.

“Bona inai bese taudia danu do umui hamaoroa, do umui gwau, ‘Lohiabada be inai bamona ia hereva noho: Kamonai, lau ese mauri dalana bona mase dalana be emui vairana dekenai lau atoa vadaeni. Inai hanua lalonai do ia noho tauna be tuari kaia, bona hitolo, bona hanaia gorere dikana dekena amo do ia mase. To ia sibona bema hanua dekena amo murimurinai do ia raka, bona sibona be Babulonia taudia, idia gini hagegea taudia dekenai do ia henia tauna, be do ia mase lasi, to iena mauri do ia dogoatao.’ ”

10 Lohiabada ma ia gwau, “Momokani lau ese egu vairana lau ha-aukaia vadaeni inai hanua dekenai, do lau naria lasi, to do lau hadikaia ore. Babulonia ena king dekenai inai hanua do lau henia, bona ia ese lahi dekena amo do ia gabua ore.”

Iuda ena king taudia edia kerere davana

11 Ma Lohiabada ia hereva, ia gwau, “Ieremia e, Iuda king bona iena ruma taudia be inai bamona do oi hamaoroa, do oi gwau, ‘Davida ena terona dekenai umui helai taudia e, Lohiabada ena hereva do umui kamonai! 12 Lohiabada be inai bamona ia hereva, ia gwau:

“ ‘Dina ibounai lalonai kota maoromaoro do umui karaia,
bona bema tau ta ese ma tau ta ena gau ia henaoa neganai,
unai henaoa tauna ena kerere davana do umui henia momokani.
Unai dekena amo ena gau ia boio tauna,
ena hisihisi do umui hanamoa,
egu badu siahu bada,
be lahi hegeregerena do ia hedinarai garina,
vadaeni do ia gabua,
bona tau ta do ia habodoa diba lasi,
emui kara dika dainai.
13 Ierusalema dekenai umui noho taudia e,
umui be koura ena ataiai umui noho.
Nadi badana ta,
tano palaka ena ataiai momokani gabunai umui noho,
to lau ese umui do lau tuari henia.
Umui gwau:
“Daika ese ai do idia tuari henia diba?
Daika ese aiemai noho gabudia idia vareai diba?”
14 Lau Lohiabada ma lau gwau:
‘Emui kerere davana do lau henia,
emui kara edia dika hegeregerena.
Lau ese emui king ena ruma badana,
be lahi dekenai do lau gabua,
bona unai lahi ese,
emui ruma ia hagegea noho gabudia ibounai do ia gabua ore.’ ”
Copyright information for `HMO