Jeremiah 40

Ieremia be Gedalaia dekenai ia noho

Nebusaradana, Babulonia gima taudia edia biaguna, ese lau Ieremia be auri seini dekenai ia guia, Ierusalema bona Iuda guia taudia danu, Babulonia dekenai ai do ia abia lao totona. To Rama dekenai Nebusaradara ese lau Ieremia ia guia seini dekena amo lau ia ruhaia. Unai murinai Lohiabada ese iena hereva be lau Ieremia dekenai ia ia hedinaraia, inai bamona:

Inai gima taudia edia biaguna ese lau ia hamaoroa, ia gwau, “Ieremia e, Lohiabada oiemu Dirava ese guna ia gwauraia inai tano do ia hadikaia. Bona hari ia ese unai dika ia havaraia vadaeni, iena hereva hegeregerena ia karaia vadaeni. Badina be oiemu bese taudia ese Lohiabada ena vairanai umui kara dika, bona iena hereva umui kamonai henia lasi. Unai dainai inai dika be umui emui latanai ia ginidae. To harihari lau ese oiemu auri seini be emu imana dekena amo lau kokia inai, bona oi lau ruhaia inai. Bema oi ura lau danu Babulonia dekenai ita lao, namo, do ita lao, bona lau ese oi do lau naria namonamo. To bema oi ura lasi Babulonia dekenai oi lao, vadaeni do oi mai lasi. Kamonai, tano ibounai be oiemu vairana dekenai, edena gabu dekenai oi ura lao, do oi lao. Bema oi ura Iuda dekenai oi noho, do oi lao, Gedalaia, Ahikama Sapana ena natuna dekenai do oi noho. Ia be Babulonia king ese ia abia hidi vadaeni, Iuda hanua ibounai edia gavana do ia lao. Gedalaia danu do oi noho, taunimanima edia huanai, o oi sibona oi ura gabuna do oi lao.”

Unai neganai, Babulonia gima taudia edia biaguna ese lau Ieremia dekenai laolao totona aniani ia henia, bona harihari gauna ta danu, bona lau ia ruhaia.
Unai dainai lau Ieremia be Gedalaia Ahikama dekenai lau lao, Misipa hanua dekenai, bona Gedalaia danu lau noho, unai tano dekenai do noho taudia edia huanai.

Gedalaia, Iuda ena gavana tauna

Hanua ena murimurinai ia noho tano dekenai idia noho Iuda tuari biagudia, bona edia tuari taudia be idia kamonai Babulonia ena king ese Gedalaia Ahikama ia abia hidi, Iuda tano ena gavana. Bona inai Gedalaia ese tau bona hahine, unai tano ogogami herea taudia, Babulonia dekenai idia lao lasi taudia, ia naridia bona ia gunalaidia. Vadaeni inai Iuda tuari biagudia be Gedalaia dekenai idia lao, Misipa dekenai: Isamaela Netanaia, Iohanana Karea, Seraia Tanahumete, Epai, Netopa hanua tauna ena natuna tau, bona Iesanaia, Makata hanua tauna ena natuna tau, idia bona edia durua taudia danu. Gedalaia ese idia ia hamaoroa, ia gwau, “Umui dekenai lau gwauhamata, bema umui be Babulonia taudia edia siahu henunai umui noho neganai, dika ta do umui davaria lasi. Gari lasi, to inai tano dekenai do umui noho, Babulonia ena king ena hesiai gaukara do umui karaia, bona noho namo do umui davaria. 10 Lau be Misipa dekenai do lau noho, bona umui dainai do lau hereva, Babulonia taudia dekenai, iniseni idia mai neganai. To umui ese uaina bona au huahua bona olive dehoro do umui haboua, bona umui abia vadaeni tanodia dekenai do umui noho.”

11 Vadaeni Moaba, bona Amono, bona Edoma, bona tano haida dekenai idia noho Iuda taudia idia kamonai, Babulonia ena king ese Iuda taudia be Iuda tano dekenai ia rakatanidia, bona Gedalaia be edia gavana tauna ia halaoa vadaeni. 12 Unai dainai inai Iuda taudia be edia noho gabudia idauidau idia rakatania, idia giroa mai, Iuda tano dekenai idia mai, Gedalaia dekenai, Misipa hanua dekenai. Unuseni uaina bona au huahua momo herea idia haboua.

Isamaela ese Gedalaia ena mase dalana ia tahua

13 Unai neganai Iohanana Karea bona hanua edia murimurinai idia noho Iuda taudia edia tuari biagudia be Gedalaia dekenai idia lao, Misipa dekenai. 14 Idia ese Gedalaia idia hamaoroa, idia gwau, “Oi be oi diba Balisi, Amono ena king ese Isamaela Netanaia ia siaia mai, oi do ia alaia mase totona, a?” To Gedalaia Ahikama ese edia hereva ia abia dae lasi.

15 Iohanana Karea ese Gedalaia dekenai ia hereva, hunia dekenai, Misipa dekenai, ia gwau, “Mani emu kara, lau ese Isamaela Netanaia do lau alaia mase, bona tau ta do ia diba lasi. Anina be dahaka ia ese oi do ia alaia mase, bona Iuda taudia oi dekenai idia haboua vadaeni, be do idia heau kava gabu idauidau dekenai, bona Iuda taudia do noho be do idia mase ore?”

16 To Gedalaia Ahikama ese Iohanana Karea dekenai ia haere, ia gwau, “Unai kara do oi karaia lasi, badina be oi ese Isamaela oi herevalaia koikoi noho.”

Copyright information for `HMO