Job 23

Iobu ia haere: Ia ura be Dirava ena kota lalonai ia hereva

Vadaeni Iobu ia haere, ia gwau,

“Lau be lau maumau noho Dirava dekenai.
Mai lalohisihisi danu lau tai noho,
to lau dekenai Dirava ena imana ia metau noho.
Lau ura diba edeseni Dirava do lau davaria,
unai neganai iena helai gabuna dekenai,
do lau raka kahirakahira,
bona lau sibona egu laloa,
be Dirava ena vairana dekenai do lau gwauraia.
Egu lalona durua totona hereva momo do lau gwauraia.
Lau ura do lau diba,
edena bamona egu hereva do ia haere henia,
bona iena haere dekena amo,
lau ura egu laloa do ia kehoa.
Dirava ese mai ena goada ibounai dekena amo,
lau do ia heai henia, a?
Lasi, lau hereva neganai, ia ese lau do ia kamonai henia.
Lau be kara maoromaoro tauna,
bona unai dainai,
lau be Dirava danu ai herevahereva diba.
Ia ese egu maoromaoro do ia gwauraia momokani.

“Dina ia daekau kahana dekenai Dirava lau tahua,
to ia be lasi unuseni.
Dina ia diho kahanai danu lau davaria lasi.
Dirava be mirigini kahanai,
bona diho kahanai danu ia gaukara vadaeni,
to lau ese ia do lau itaia lasi.
10 To Dirava ese egu lao dalana ia diba.
Ia ese lau ia tohoa vadaeni murinai,
lau be golo hegeregerena do lau raka lao.
11 Egu aena be Dirava ena aena gabudia,
dekenai idia raka vadaeni.
Iena dala lau badinaia vadaeni,
lau raka siri lasi.
12 Dirava ena oda be nega ta lau rakatania lasi.
Iena ura lau karaia noho,
egu ura be lau karaia lasi.

13 “Ia sibona ia gini noho,
bona daika ese iena ura ia koua diba?
Iena ura hegeregerena ia karaia noho nega ibounai.
14 Lau dekenai ia palani do ia karaia gaudia,
be do ia karaia momokani,
bona palani momo unai bamona ma do ia karaia momokani.
15 Unai dainai iena vairana dekenai lau gari bada noho.
Iena kara lau laloa neganai,
lau gari bona lau heudeheude noho.
16 Dirava ese egu laloa goada ia hamanokaia vadaeni.
Siahu Ibounai Dirava ese,
mai hoa danu lau ia hagaria vadaeni.
17 Dirava ese dibura dekena amo lau ia hagaria vadaeni.
Bona inai dibura bada ese,
egu vairana ia koua, lau itaia diba lasi.”
Copyright information for `HMO