Job 24

Badina dahaka Dirava ese dika taudia ia koua haraga lasi?

Iobu ma ia hereva, ia gwau,

“Badina dahaka Siahu Ibounai Dirava ese,
kota dinana ta ia gwauraia lasi?
Badina dahaka Dirava idia badinaia taudia ese,
unai dina totona idia naria kava noho?
Taunimanima ese,
tano ena hetoa idia makaia nadi idia kokia lao.
Mamoe oreadia idia henaoa,
bona idia edia mamoe edia huanai idia hunidia noho.
Idia ese danu,
tamana bona sinana lasi maragidia edia doniki idia henaoa,
bona vabu ena abiatorehai, ena davana abia totona,
iena boromakau tau idia abia lao.
Idia ese ogogami taudia,
be dala dekena amo idia doria siri.
Unai dainai tanobada ena ogogami taudia ibounai,
be idia hunia noho.
Madi, ogogami taudia be uda doniki bamona,
tano kaukau dekenai aniani idia tahua noho.
Unai gabu sibona dekenai,
edia natudia totona aniani idia davaria noho.
Idia biagua lasi tano ena anina idia haboua noho,
bona kara dika taudia edia vain uma,
ena momoru danu idia haboua noho.
Hanuaboi ena nega ibounai lalonai,
kopina kavakava idia hekure noho,
edia dabua be lasi dainai.
Keru neganai idia be kouti ta lasi.
Ororo dekenai ia diho medu ese ia hapariparidia,
bona edia ruma be lasi dainai,
idia be nadi badadia badibadinai idia hekure.
Tau dikadia ese tamana lasi maragidia,
be sinadia edia kemena dekena amo idia dadia noho,
bona abiatorehai ena davana abia totona,
idia ese ogogami tauna ena natuna idia abia lao.
10 Ogogami taudia be kopina kavakava idia loaloa noho,
edia dabua be lasi.
Mai edia hitolo danu,
uiti idia guia, bona idia huaia lao.
11 Idia ese danu kara dika tauna ena olive uma dekenai,
olive dehoro idia karaia noho.
Idia ese vain huahua idia moia gabuna dekenai,
uaina idia karaia,
to idia ranu mase noho.
12 Hanua badadia lalonai idia mase noho taudia,
bona bero idia davaria taudia,
be durua totona idia tai noho,
to Dirava ese edia noinoi ia kamonai henia lasi.

13 “Taunimanima haida ese diari idia ura lasi momokani,
diari ena dala idia diba lasi,
bona unai dala dekenai idia raka lasi.
14 Ala-ala tauna be daba rere neganai ia toreisi noho,
ogogami taudia bona hitolo taudia do ia alaia totona,
bona hanuaboi neganai henaoa karadia ia karaia.
15 Heudahanai tauna ese,
dina ia diho noho neganai ia naria noho.
Ia gwau,
‘Tau ta ese lau do ia itaia lasi.’
Ia ese iena vairana ia koua noho.
16 Hanuaboi neganai,
henaoa taudia ese ruma idia hamakohia,
to dina lalonai idia hunia noho,
diari idia ura lasi momokani.
17 Hanuaboi momokani be edia daba idia halaoa noho.
Idia ese dibura ena gari dikadika gaudia danu,
idia turana karaia noho.

18 “To umui gwau:
‘Kara dika tauna be abata bada ese ia kokia lao,
ia boio vadaeni,
bona ia biagua tano,
be Dirava ese ia hadikaia noho.
Unai tau ese,
iena vain uma dekenai gaukara totona do ia lao lou lasi.
19 Sinou ese dina ena siahu bona medu lasi neganai,
ia boio haraga bamona,
kara dika tauna ese danu,
be tanobada dekena amo do ia boio haraga.
20 Unai dika tauna be iena sinana danu ese,
do ia laloatao lasi.
Biluga ese iena tauanina idia ania noho,
bona ia be makohia ore, ia moru auna bamona.’

21 “Unai dika ia vara badina be,
ia ese vabu taudia ia hadikaia,
bona natuna idia havaraia diba lasi hahine taudia,
be ia bogahisihisi henidia lasi dainai.
22 Dirava ese iena goada dekena amo,
siahu taudia ia hadikaia ore noho.
Dirava ese ia toreisi,
vadaeni kara dika tauna ia mase.
23 Dirava ese sedira nega sisina lalonai,
unai tau dekenai noho namo do ia henia,
to iena dala be Dirava ese ia itaia noho nega ibounai.
24 Nega sisina sibona tau dikana ena noho be namo,
to unai murinai ia boio ore,
ia be ava ia mase bamona.
Ia be do idia utua oho,
uiti ena kwarana idia utua oho bamona.

25 “Bema inai be momokani lasi,
daika ese lau be koikoi tauna do ia gwauraia diba?
Daika ese do ia hedinaraia egu hereva be anina lasi?”
Copyright information for `HMO