Job 38

Lohiabada ese Iobu dekenai ia haere

Vadaeni Lohiabada ese Iobu dekenai ia haere, lai guba dekena amo, ia gwau,

“Oi be daika,
oi ese anina lasi hereva dekena amo,
egu aonega dekenai dibura oi atoa, a?
Oi ese harihari tau korikori bamona,
do oi gini maoromaoro,
bona oi dekenai lau nanadaia gaudia do oi haere henia.

“Lau ese tanobada lau karaia neganai oi be edeseni?
Bema oi diba, lau dekenai do oi hamaoroa.
Daika ese tanobada ena bada ia gwauraia?
Ena lata bona ena lababa be daika ese ia tohoa?
Oi be oi haere diba?
Tanobada ena badina nadi,
be dahaka ese ia dogoatao diba?
Daika ese tanobada ena kona nadi ia atoa?
Unai dina ena daba neganai,
daba ena hisiu be idia ane abia hebou,
bona guba ena aneru ibounai,
be mai moale danu idia boiboi.

“Davara be tanobada ena bogana dekena amo,
ia heau mai murimurinai neganai,
daika ese iena iduaradia ia koua,
vadaeni davara be iena hetoa gabu lalonai ia noho?
Unai neganai lau ese ori lau karaia,
davara ena dabua bamona,
bona dibura badana lau havaraia,
iena kouti bamona.
10 Davara do ia hanaia lasi ena hetoa gabudia,
be lau gwauraia vadaeni,
bona iena maguna bona iena iduara lau karaia.
11 Lau ese davara lau hamaoroa, lau gwau,
‘Oi mai ela bona inai gabu dekenai,
to do oi hanaia lasi.
Iniseni oiemu hurehure badadia do idia doko!’

12 “Iobu e, oi ese nega ta dina oi oda henia,
do ia toreisi?
13 Oi ese nega ta daba rere oi oda henia,
ia ese tanobada do ia dogoatao,
bona kara dika taudia edia hunia gabudia dekena amo,
do ia kokidia haraga.
14 Dina ena diari ese ororo bona koura ia hedinaraia,
dabua edia lokua gabudia bamona,
bona toa karaia gauna ese raro ia moia tao bamona.
15 Dina ena diari ese,
kara dika taudia edia matana ia hadikaia,
iena diaridiari ese edia dagedage karadia ia koua.

16 “Oi ese nega ta,
davara ena lohilohi daekau gabudia oi vareai, a?
O davara ena dobu gabudia dekenai oi raka vadaeni, a?
17 Mase gabuna ena iduara,
be oi dekenai nega ta idia hedinaraia, a?
O dibura masemase ikoukou,
be oi ese oi itaia vadaeni, a?
18 Tanobada ena dokona gabudia ibounai be oi diba, a?
Bema oi diba, lau dekenai oi haere.

19 “Oi be diari ia mai gabuna oi diba, a?
O dibura ia noho gabuna oi diba, a?
20 Diari bona dibura,
be edia gabudia dekenai oi ese oi abia lao diba, a?
Edia gabu lao dalana oi diba, a?
21 Sedira oi diba, badina oi be buruka herea,
oiemu mauri lagani be momo herea vadaeni.

22 “Oi ese nega ta,
sinou lau haboua gabudia dekenai oi vareai,
o aisi nadi bamona medu,
lau ese lau haboua gabudia oi itaia, a?
23 Unai gaudia be lau ese lau abia hegaegae,
do lau gaukaralaia, dika do ia vara neganai,
o egu tuari do idia durua totona.
24 Kevaru ia toreisi gabuna,
be nega ta oi vadivadi henia, a?
O oi diba laurabada,
be edena gabu dekena amo tanobada dekenai ia toa, a?
25 Daika ese medu ena ranu,
ena heau lao dadaira ia geia?
Bona guba boiboi bada ena dala,
be daika ese ia karaia?
26 Taunimanima idia noho lasi tano dekenai,
be daika ese medu ia hadihoa?
27 Daika ese tano kaukau,
nadi kavakava gabuna dekenai ranu ia henia,
vadaeni rei ia tubu?
28 Medu o paripari be mai edia tamana, a?
29 Aisi, bona paripari ena aisi,
be mai edia sinana, a?
30 Ranu be do idia auka, nadi bamona,
bona davara ena kopina be aisi hegeregerena ia lao.
31 Hisiu ladana Kima be oi guia diba?
O hisiu ladana Kesili be oi ese oi ruhaia diba?
32 Hisiu edia ladana Masaroto, be oi hakaua diba,
ta ta edia nega, edia nega dekenai?
O hisiu ladana Asa, mai ena natuna danu,
be oi ese oi siaia lao diba, a?
33 Guba ena taravatudia be oi diba, a?
Unai taravatudia,
be tanobada dekenai oi gaukaralaia diba, a?

34 “Oiemu gadona oi habadaia diba,
ori dekenai do oi boiboi,
ranu momo ese oi dekenai do ia moru totona, a?
35 Oi ese kevaru ena lahi oi siaia lao diba, a?
Vadaeni oi dekenai do idia mai, do idia gwau,
‘Ai mai inai, oiemu hesiai gaukara totona.’
36 Daika ese taunimanima edia kudouna dekenai,
aonega ia henia?
Daika ese taunimanima edia lalona dekenai,
diba bada ia henia?
37 Daika be mai ena aonega,
vadaeni ori ibounai do ia duahia diba, a?
Bona guba ena ranu be daika ese ia habubua diho?
38 Unai bamona medu ese kahu ia aukaia,
kopukopu be nadi bamona idia lao.

39 “Oi ese laiona ena aniani abia totona,
nega ta oi labana, a?
Laiona edia natudia be vamu dekenai oi ubua diba, a?
40 Unai bamona do oi karaia,
edia nadi matuna dekenai idia hunia noho,
o ava murinai idia naria noho neganai, a?
Galo manudia be daika ese ia ubua noho,
idia be mai hitolo danu idia roho loaloa neganai,
bona edia natudia ese Dirava dekenai idia boiboi,
aniani do lau henidia totona?
41 

Copyright information for `HMO