John 11

Iesu ese Lasaro ia hatorea isi lou

Betania tauna ta, ena ladana Lasaro, ia gorere. Maria, bona iena kakana Mareta danu, edia hanua be Betania. Unai Maria be muramura mai ena bonana namo dekena amo Lohiabada ena aena dekenai ia bubua, vadaeni iena huina dekena amo ena aena ia dahua kaukau hahinena. Iena taihuna Lasaro ia gorere. Hahine ruaosi ese Iesu dekenai hereva idia siaia, idia gwau, “Lohiabada e, oiemu lalokau tauna be ia gorere noho.”

To Iesu ia kamonai, ia gwau, “Inai gorere be mase gauna lasi, to ia be Dirava hanamoa totona. Dirava ena Natuna ese hairai do ia abia inai kara dainai.”

Iesu ese Mareta mai ena tadina Maria danu, bona Lasaro danu, ia lalokau henia idia dekenai. To Lasaro ena gorere sivaraina ia kamonai neganai, Iesu be dina rua ma unai gabu dekenai ia noho. Gabeai ia ese iena diba tahua taudia dekenai ia hamaoroa, ia gwau, “Iudea dekenai ita giroa lou.”

Diba tahua taudia idia gwau, “Rabi e, vanegai Iuda taudia ese nadi dekena amo oi idia hodoa toho, harihari unai gabu dekenai do oi giroa lou, a?”

Iesu ia haere, ia gwau, “Dina ta ena hora be 12 lasi, ani? Dina neganai ia loaloa tauna be kerere do ia davaria lasi, ani? Badina be ia ese inai tanobada ena diari ia itaia. 10 To hanuaboi neganai ia loaloa tauna be kerere ia davaria, badina iena lalona dekenai diari be lasi.” 11 Unai bamona ia hereva, vadaeni idia ia hamaoroa, ia gwau, “Iseda turana Lasaro be ia mahuta noho, to lau lao, do lau hanogaia.”

12 Iena diba tahua taudia idia gwau, “Lohiabada e, bema ia mahuta be do ia namo lou.”

13 Iesu ese Lasaro ena mase ia gwauraia. To idia laloa ia be laga-ani ena mahuta ia herevalaia. 14 Unai dainai Iesu ese idia dekenai ia hereva maoro, ia gwau, “Lasaro be ia mase vadaeni, 15 bona umui totona lau moale, ia dekenai lau noho lasi dainai, badina inai kara dekena amo, umui be do umui hamomokania lau dekenai. Vadaeni ita lao ia dekenai.”

16 Vadaeni Toma, iena ladana ta idia gwauraia Hekapa, ese diba tahua taudia dekenai ia hamaoroa, ia gwau, “Ita danu ita lao, ia danu do ita mase hebou.”

Mase dekena amo toreisi lou bona mauri ena badina be Iesu

17 Iesu ia ginidae, vadaeni ia kamonai Lasaro ena tauanina be dina 4 guria gabuna dekenai ia noho. 18 Betania bona Ierusalema edia padana be daudau lasi, kilomita toi bamona. 19 Unai dainai Iuda taudia momo Mareta bona Maria dekenai idia lao, edia lalona hagoadaia totona, edia taihuna ia mase dainai.

20 Mareta be Iesu ia mai noho herevana ia kamonai, vadaeni Iesu danu ia hedavari totona ia lao, to Maria be ruma dekenai ia noho. 21 Vadaeni Mareta ese Iesu ia hereva henia, ia gwau, “Lohiabada e, bema oi noho iniseni, be lauegu taihuna ia mase lasi. 22 To lau diba vadaeni, inai harihari Dirava dekenai oi noinoi gauna, be Dirava ese do ia henia oi dekenai.”

23 Iesu ia gwau, “Oiemu taihuna be do ia toreisi lou.”

24 Mareta ia gwau, “Lau diba dina gabeai, toreisi lou dinana neganai, do ia toreisi lou.”

25 Iesu ia gwau, “Toreisi lou be lau inai, mauri danu be lau. Lau dekenai ia abidadama henia tauna, ia be do ia mase, to do ia mauri lou. 26 Idia mauri noho, bona idia abidadama henia lau dekenai taudia ibounai, be do idia mase lasi, lasi bona lasi momokani. Inai hereva oi abia dae, a?”

27 Hahine be ia haere, ia gwau, “Lohiabada e, oibe. Lau abia dae momokani vadaeni, oi be Keriso, Dirava ena Natuna, guna idia gwauraia tanobada dekenai do ia mai Tauna.”

Iesu ia tai

28 Mareta be unai bamona ia hereva, vadaeni ia lao, iena tadina Maria dekenai ia boiboi henia, ia gwau, “Hadibaia tauna be ia mai vadaeni, ia boiria oi dekenai.” 29 Maria be unai hereva ia kamonai, vadaeni ia toreisi haragaharaga, Iesu dekenai ia lao. 30 Unai neganai Iesu be hanua lalonai ia do raka vareai lasi, to Mareta danu ia hedavari gabuna dekenai ia noho. 31 Unai dainai, Iuda taudia, Maria danu ruma lalonai idia noho edia lalona hanamoa taudia, ese Maria idia itaia neganai, idia toreisi haragaharaga, idia raka murimuri dekenai. Vadaeni idia ese iena murina dekenai idia lao, badina be idia laloa ia be guria gabuna dekenai ia lao gwauraia, mase tauna totona do ia taitai.

32 To Maria be Iesu ia noho gabuna dekenai ia ginidae, ia itaia, vadaeni ia ese Iesu ena aena badinai iena kwarana ia atoa diho, ia gwau, “Lohiabada e, iniseni bema oi noho, be egu taihuna ia mase lasi.”

33 Maria bona inai Iuda taudia ia danu idia raka hebou, be idia taitai, vadaeni Iesu ese idia ia itaia, be iena lalona ia hisihisi bada, mamina ia abia momokani. 34 Vadaeni ia henanadai, ia gwau, “Edeseni umui atoa?”

Idia haere, idia gwau, “Lohiabada e, oi mai, oi itaia.”

35 Iesu ia tai. 36 Vadaeni Iuda taudia idia gwau, “Umui itaia, ia ese ia lalokau henia bada.”

37 To haida idia gwau, “Inai matakepulu ena matana ia kehoa tauna, be unai tau ena mase koua dalana be ia diba lasi, a?”

Iesu ese Lasaro ia hatorea isi lou

38 Iesu ena lalona ma ia hisihisi lou, vadaeni ia be guria gabuna dekenai ia lao. Inai guria gabuna be kohua. Inai kohua ena iduara be nadi ta dekenai idia koua. 39 Vadaeni Iesu ia gwau, “Nadi umui kokia.”

To Mareta, mase tauna ena taihuna, ia gwau, “Lohiabada e, ia bodaga vadaeni, badina be dina 4 ia mase vadaeni.”

40 Iesu ia haere ia dekenai, ia gwau, “Edena bamona? Oi lau hamaoroa guna, ani, bema oi abidadama henia, be Dirava ena hairaina do oi itaia?” 41 Vadaeni idia ese nadi idia kokia, Iesu ese iena matana dekenai guba ia itaia, ia guriguri, ia gwau, “Egu Tamana e, lau hanamoa oi, badina be oi ese lau oi kamonai henia noho. 42 Lau diba oi be nega ibounai oi kamonai henia lau. Gau tamona, inai taunimanima lau dekenai idia gini hagegea lau laloa. Idia dainai lau hereva inai bamona, lau be oi ese oi siaia, do idia abia dae totona.”

43 Unai bamona ia guriguri, vadaeni ia boiboi bada herea, ia gwau, “Lasaro e, oi mai murimuri dekenai.” 44 Vadaeni mase tauna be ia raka murimuri dekenai, iena aena bona imana idia kumia dabua bona iena vairana idia kumia dabua be iena tauanina dekenai idia do noho. Iesu ia gwau, “Kumia dabua umui kokia, umui rakatania.”

Iuda edia tau badadia idia laloa tamona, Iesu do idia alaia

45 Vadaeni Iuda taudia momo, inai Maria dekenai idia lao taudia, bona Iesu ena kara idia itaia taudia, ese Iesu idia abidadama henia. 46 To haida be Farisea taudia dekenai idia lao, Iesu ia karaia gauna idia hamaoroa idia dekenai.

47 Unai dainai, dubu biagudia bona Farisea taudia be kaunsolo taudia idia boiria, idia haboua, idia gwau, “Edena bamona do ita karaia, badina be unai tau ese toa kara momo ia karaia? 48 Bema ita dogoatao lasi, taunimanima ibounai ese do idia abidadama henia, vadaeni Roma taudia do idia mai, iseda Dubu Helaga bona iseda bese do idia hadikaia ore.”

49 Vadaeni idia edia tau ta, iena ladana be Kaiapa, unai lagani lalonai ia be Hahelagaia Tauna Badana, ia gwau henia idia dekenai, ia gwau, “Umui be gau ta umui diba lasi, 50 umui laloa lasi, namona be taunimanima dainai tau tamona ia mase, to namo lasi iseda bese ibounai idia hadikaia ore.”

51 Ia be unai bamona ia hereva, sibona ena ura dekenai lasi, to badina be unai lagani lalonai ia be Hahelagaia Tauna Badana, unai dainai ia gwauraia guna, Iesu be Iuda bese totona do ia mase. 52 Bona Iuda bese sibona totona do ia mase lasi. Lasi momokani. Iena mase be, Dirava ena natuna tanobada ibounai dekenai, be orea tamona dekenai do ia haboua totona.

53 Vadaeni unai dina dekena amo idia ese Iesu alaia mase totona dala idia tahua.

Eparaima dekenai Iesu ia lao

54 Unai dainai Iesu be Iuda taudia edia huana dekenai ia loaloa hedinarai lou lasi, to unai gabu ia rakatania, taunimanima idia noho lasi tano kahirakahira ia lao, hanua ta, ladana Eparaima dekenai ia noho, iena diba tahua taudia danu.

55 Iuda taudia edia Pasova aria negana be ia kahirakahira, vadaeni unai tano taudia momo herea Ierusalema dekenai idia daekau, aria totona idia sibona do idia hagoevaia guna gwauraia. 56 Vadaeni idia ese Iesu idia tahua, bona Dubu Helaga lalonai idia gini noho neganai, idia sibona idia nanadaia, idia gwau, “Umui be dahaka umui gwau? Iesu be inai aria totona do ia mai o lasi?” 57 Dubu biagudia bona Farisea taudia danu taunimanima dekenai idia hereva, bema Iesu ena noho gabuna tau ta ia diba, be do ia hamaoroa idia dekenai, vadaeni idia ese do idia dogoatao diba.

Copyright information for `HMO