Joshua 18

Do noho kava tano be Silo dekenai idia haria

Idia ese unai tano ena taudia ibounai idia halusia neganai, Israela bese taudia ibounai be Silo dekenai idia haboua. Unuseni Palai Dubu idia haginia.

To Israela ena iduhu 7 ese edia tano kahana idia do abia lasi. Vadaeni Iosua ese Israela taudia ia hamaoroa, ia gwau, “Ela bona edena negai do umui naria kava, Lohiabada, emui sene taudia edia Dirava, ese umui dekenai ia henia vadaeni tano umui abia lasi? Iduhu ta ta dekena amo tau toi, tau toi do umui abia hidi, vadaeni lau ese idia do lau siaia, tano ibounai dekenai do idia raka hanaia, bona mapu do idia torea, tano haria namonamo dalana mapu dekenai do idia hedinaraia, bona lau dekenai do idia giroa mai.

“Tano be kahana 7 dekenai do idia haria. Iuda iduhu be ena gabu dekenai do ia noho, diho kahana dekenai, bona Iosepa ena natuna edia iduhu be edia gabu dekenai danu do idia noho, mirigini kahana dekenai. Tano ena toana ena sivarai do umui torea, kahana 7 dekenai, bona mapu be lau dekenai do umui mailaia. Vadaeni lau ese umui totona laki do lau gadara, Lohiabada iseda Dirava ena vairana dekenai. Unai dekena amo do lau diba edena tano Dirava ese emui iduhu ta ta dekenai do ia henia.

“To Levi taudia be emui huanai tano ta do idia abia lasi, badina idia be Lohiabada ena hahelagaia taudia do idia lao, edia davana be unai. Bona Gado iduhu, Rubena iduhu, bona Manase iduhu kahana ese edia tano idia abia vadaeni, Ioridane Sinavai ena dina daekau kahana dekenai, Lohiabada ese idia dekenai ia henia gabudia.”

Unai dainai unai mapu do idia torea taudia idia toreisi, tano ena toana ena sivarai torea totona idia lao, Iosua ese idia ia hadibaia hegeregerena. Iosua ia hamaorodia vadaeni, ia gwau, “Umui lao, tano dekenai do umui raka loaloa, mapu do umui torea, bona do umui mai lou, bona lau ese Silo dekenai, umui totona laki do lau gadara, Lohiabada ena vairanai.”

Vadaeni unai taudia be tano ena kahana ibounai dekenai idia raka loaloa, bona iena toana ena sivarai be buka dekenai idia torea, kahana 7 dekenai. Vadaeni idia be Iosua dekenai idia giroa lou, Silo ena kamepa dekenai. 10 Vadaeni Iosua be Silo dekenai unai Israela taudia totona laki gadara ia karaia, Lohiabada ena vairanai. Unai gabu dekenai Iosua ese tano ia haria, bona Israela taudia edia iduhu ta ta dekenai edia tano korikori ia henia.

Beniamina iduhu ena tano

11 Iosua ese laki gadara dekenai ia abia hidi guna iduhuna be Beniamina, iena bese ta ta dekenai. Beniamina ena tano be Iuda iduhu bona Iosepa iduhu edia tano edia huanai. 12 Mirigini kahana dekenai Beniamina ena tano hetoana be Ioridane Sinavai dekena amo ia matamaia, ia lao, bona Ieriko ena mirigini kahanai ororo maragina ena ataiai ia hanaia. Vadaeni tano hetoana be ororo dekena amo ma ia lao, dina diho kahana dekenai, ela bona Bete Avene ena tano kaukau dekenai ia doko.

13 Unai gabu dekena amo tano hetoana be diho kahanai ia lao, Lusu, ena ladana ta be Betele, ena diho kahanai ia lao, ma ia diho lao, Ataroto Adara dekenai ia kamokau. Unai gabu be Bete Horono ena henuna hanua ena diho kahana ororo dekenai. 14 Ma tano hetoana be diho kahana ia lao, Bete Horono diho kahana ororo ena dina diho kahana dekena amo ia lao, ela bona Kiriata Bala, ena ladana ta be Kiriata Iearimi, dekenai ia doko. Unai be Iuda iduhu ena hanua ta. Dina diho kahana ena tano hetoana be unai.

15 Diho kahana ena tano hetoana be Kiriata Iearimi hanua ena isena dekenai ia matamaia, ia lao ela bona Eparona, ma ia lao, ela bona Nepetoa ranu gabudia. 16 Ma ia lao, ela bona Hinoma Koura kahirakahira ia noho ororo dekenai ia ginidae. Inai ororo be Repaima Koura ena mirigini kahanai. Tano hetoana be ma diho kahanai ia lao, bona Hinoma Koura ia badinaia, bona Iebusu taudia edia ororo ena diho kahana danu ia badinaia, ela bona Ene Rogele dekenai.

17 Ene Rogele dekena amo tano hetoana ia hagegea lao, mirigini kahana ia lao, ela bona Ene Semese, ma unai gabu dekena amo ia lao, ela bona Geliloto, Adumimi raka vareai gabuna kahirakahira. Ma ia diho lao, ela bona Bohani Rubena ena Nadi. 18 Unai gabu dekena amo Bete Arabaha ena ororo hekei tano ena mirigini kahana ia lao, vadaeni ia diho lao Ioridane Koura dekenai. 19 Vadaeni tano hetoana be ma Bete Hogila ena ororo hekei tano ena mirigini kahana dekena amo ia lao, ela bona Davara Mase ena mirigini kahana, Ioridane Sinavai ese Davara Mase ia heau vareai gabunai.

Diho kahana ena tano hetoana be unai.

20 Dina daekau kahana ena tano hetoana be Ioridane Sinavai. Beniamina iduhu taudia edia tano be unai, edia bese ta ta ibounai edia. Unai tano hetoana ena lalonai do idia noho.

21 Beniamina taudia edia hanua, edia bese ta ta totona idia abia, edia ladana be inai:

Ieriko, Bete Hogila, Emekesi,

22 Bete Arabaha, Semaraimi, Betele, 23 Avima, Para, Opera, 24 Keparamoni, Opini, Geba. Inai be hanua ibounai 12, mai edia hanua maragidia danu.
25 Inai hanua danu:

Gibeona, Rama, Beroto,

26 Misipa, Kepira, Mosa, 27 Rekema, Iripele, Tarala, 28 Sela, Haelepa, Iebusu (ena ladana ta be Ierusalema), Gibea, Kiriata Iearimi. Inai be hanua ibounai 14, mai edia hanua maragidia danu. Beniamina iduhu taudia edia hanua, mai edia tano be unai, edia bese ta ta ibounai edia huanai idia haria.

Copyright information for `HMO