Joshua 6

Ieriko hanua be Israela taudia ese idia halusia

Ieriko hanua ena magu iduara idia koua momokani, Israela taudia dekenai idia gari dainai. Hanua dekenai tau ta ia raka vareai diba lasi, bona tau ia rakatania diba lasi.

Vadaeni Lohiabada ese Iosua ia hamaoroa, ia gwau, “Kamonai, Ieriko hanua be oiemu imana dekenai lau atoa vadaeni, mai ena king bona mai ena tuari taudia danu. Hanua do umui raka hagegea, oi bona emui tuari taudia ibounai, nega tamona. Dina ta ta dekenai unai bamona do umui karaia ela bona dina 6 idia ore. Hahelagaia taudia 7 ese, nani tau doadia dekena amo idia karaia kibi 7 do idia abia, Taravatu Maua ena vairanai do idia raka. Dina namba 7 dekenai, hanua do umui raka hagegea nega 7, bona hahelagaia taudia ese kibi do idia hiriria. Vadaeni kibi ena regena do umui kamonai, idia hiriria noho daudau. Unai neganai taunimanima ibounai do idia boiboi bada herea, vadaeni hanua maguna be do ia moru, bona maoromaoro emui tuari taudia do idia raka vareai.”

Unai dainai, Iosua Nunu ese hahelagaia taudia ia boiria, ia gwau, “Taravatu Maua do umui abia isi, bona umui ibounai 7 ese nani tau edia doana kibi 7 do umui huaia, bona Lohiabada ena Taravatu Maua ena vairanai do umui raka.” Vadaeni Iosua ese Israela taudia ia hamaoroa, ia gwau, “Umui lao, hanua do umui raka hagegea, emui tuari taudia be Lohiabada ena Taravatu Maua ena vairanai do idia raka.”

Iosua ese Israela taudia ia hamaoroa hegeregerena, hahelagaia taudia 7 ese kibi 7 idia abia lao, Lohiabada ena vairanai, bona edia kibi idia hiriria noho. Idia murinai be Lohiabada ena Taravatu Maua idia huaia. Tuari taudia be kibi idia hiriria taudia edia vairanai idia raka. Bona Israela taudia orena be Taravatu Maua ena murinai idia raka. Unai hahelagaia taudia 7 ese nega ibounai edia kibi idia hiriria noho. 10 To Iosua ese ia hamaorodia, ia gwau, “Do umui boiboi lasi, bona do umui herevahereva lasi, hereva ta do umui gwauraia lasi ela bona dina do ia ginidae, do lau gwau, ‘Umui boiboi!’ Unai neganai do umui boiboi.” 11 Vadaeni Iosua ese inai bamona Lohiabada ena Taravatu Maua ia siaia, idia huaia lao, hanua idia raka hagegea nega tamona, vadaeni kamepa dekenai idia giroa lou. Unuseni idia noho ela bona dabai.

12 Daba matana dekenai Iosua ia toreisi, bona hahelagaia taudia ese Taravatu Maua idia abia isi. 13 Vadaeni hahelagaia taudia 7 ese, mai edia kibi 7 idia raka vaira, Lohiabada ena Taravatu Maua ena vairanai idia raka, bona kibi idia hiriria nega momo. 14 Unai dina iharuana dekenai hanua idia raka hanaia nega tamona, vadaeni kamepa dekenai idia giroa lou. Dina 6 be unai bamona idia karaia.

15 Dina namba 7 dekenai, daba ia rere idia toreisi, bona unai bamona dala dekenai hanua ma idia raka hagegea, to unai dina namba 7 be idia raka hagegea nega 7. 16 Nega namba 7 dekenai, hahelagaia taudia ese kibi idia hiriria bada neganai, Iosua ese Israela taudia ia hamaoroa, ia gwau, “Umui boiboi bada! Lohiabada ese hanua umui dekenai ia henia vadaeni! 17 Inai hanua, bona ia lalonai gau ibounai, be boubou gauna Lohiabada dekenai dainai, do umui hadikaia ore momokani. To ariara hahine Rahaba sibona, mai ena ruma taudia ibounai danu do umui hamauria, badina be ia ese iseda hasinadoa taudia ia hunia dainai. 18 To umui naria namonamo, Lohiabada ese inai hanua ena gau ibounai umui dekenai ia taravatua dainai, gau ta do umui abia lasi, umui sibona do umui hadikaia garina, bona Israela kamepa ibounai ese, kerere bona dika momokani do ia davaria garina. 19 Siliva bona golo ibounai, bona auri laboralabora gaudia, bona auri gaudia ibounai be helaga, Lohiabada totona. Inai gaudia be Lohiabada ena kohu haboua gabuna dekenai do umui atodia.”

20 Kibi idia hiriria neganai, Israela taudia idia kamonai, bona maoromaoro idia boiboi bada herea. Vadaeni hanua ena magu ia moru diho, bona maoromaoro tuari taudia idia raka vareai, hanua idia abia. 21 Hanua ibounai idia hadikaia ore, tatau bona hahine, memero bona buruka, boromakau, mamoe bona doniki, ibounai be tuari kaia dekena amo idia alaia mase.

22 Iosua ese hasinadoa taudia ruaosi dekenai ia hamaoroa, ia gwau, “Ariara hahine ena ruma dekenai do umui daekau, hahine mai ena varavara taudia ibounai danu do umui hakaua, emui gwauhamata umui henia hegeregerena.”

23 Vadaeni unai eregabe ruaosi, guna idia be hasinadoa taudia, ese ruma idia raka vareai. Idia ese Rahaba, iena tamana bona sinana, iena taihuna bona iena varavara ibounai danu idia hakaua murimuri dekenai. Idia ibounai be idia hakaua lao, Israela taudia edia kamepa murinai idia atodia.

24 Unai murinai hanua ibounai bona ia lalonai gau ibounai idia gabua ore, to golo, bona siliva, bona auri laboralabora, bona auri gaudia idia abia, Lohiabada ena ruma dekenai idia haboua, davana bada gaudia idia haboua gabuna dekenai. 25 To ariara hahine Rahaba, iena tamana ena famili taudia, bona iena varavara ibounai be Iosua ese ia hamauria. Unai hahine Rahaba ena tubudia be Israela dekenai idia noho ia mai bona hari, badina Iosua ena hesiai taudia, Ieriko, hasinadoa totona idia lao, be Rahaba ese ia hunidia dainai.

26 Unai neganai Iosua ese hereva aukana ia gwauraia, ia gwau, “Inai hanua Ieriko do ia haginia lou tauna be Lohiabada ena vairanai do ia dika momokani.

“Ruma ena badina nadi ia haginia tauna ena kerere davana,
be iena natuna vara guna do ia mase.
Bona hanua ena magu iduara do ia haginia tauna,
ena kerere davana be iena natuna,
murinai ia vara tauna, do ia mase.”
27 Unai dainai Lohiabada ese Iosua ia bamoa, bona Iosua ena sivarai be unai tanodia taudia ibounai idia kamonai.

Copyright information for `HMO