Judges 4

Debora bona Baraki

Ehuda ia mase murinai, Israela taudia ese ma kara dika idia karaia Lohiabada ena vairanai. Vadaeni Lohiabada ese Kanana taudia edia king, ladana Iabina ena siahu henunai ia atodia. Unai king be Hasoro hanua ena lohia. Iena tuari taudia edia biaguna be Sisera, Haroseta Hagoimi dekenai ia noho. Iabina ena kariota be ibounai 900, bona lagani 20 lalonai mai dagedage bada danu Israela taudia ia hisihisi henidia. Vadaeni Israela taudia ese Lohiabada dekenai idia tai, do ia durua totona.

Unai neganai peroveta hahine ta ese Israela ia gunalaia. Iena ladana be Debora, Lapidoto ena adavana. Iena kara be pama auna ta ena henunai ia helai, bona Israela taudia be ia dekenai idia lao, ia ese edia hepapahuahu ia hamoaromaoroa. Unai pama auna be Rama bona Betele edia huanai, Eparaima ena ororo tano dekenai.

Dina ta ia ese hereva ia siaia, Baraki Abinaomi, Napatali hanua ladana Kedesi tauna ta ia boiria, ia gwau, “Lohiabada, Israela ena Dirava ese oi dekenai ia oda, inai bamona: Tuari taudia ibounai 10,000 Napatali iduhu bona Sebuluno iduhu dekena amo do oi haboua, bona Taboro Ororo dekenai do oi hakaudia. Vadaeni lau ese Sisera, Iabina ena tuari taudia edia biaguna do lau koia, do lau hakaudia Kisona Sinavai dekenai. Ia be mai ena kariota bona tuari taudia momo, to lau ese umui dekenai kwalimu do lau henia.”

Baraki ese ia haere henia, ia gwau, “Oi be lau danu oi mai, vadaeni do lau lao, to bema lau danu oi mai lasi, lau be do lau lao lasi.”

Hahine ia hereva lou, ia gwau, “Momokani, oi do lau bamoa, to unai dala dekena amo hanamoa do oi davaria lasi, badina be Lohiabada ese hahine ta ena siahu henunai Sisera do ia atoa.” Vadaeni Debora ia toreisi, Baraki danu Kedesi hanua dekenai idia lao. 10 Baraki ese Sebuluno taudia bona Napatali taudia ia boiria, Kedesi hanua dekenai do idia lao. Tuari taudia 10,000 Baraki ena murinai idia raka, bona Debora danu ia dekenai idia lao.

11 Hebere, Kene tauna, ese guna, Kene taudia, Mose ena nakimi Hobaba ena varavara taudia dekena amo ia siri, iena palai ruma be idau gabuna dekenai ia haginia. Iena palai ruma be Sananima ouki auna ena badibadinai, Kedesi hanua kahirakahira.

12 Tau haida ese Sisera idia hamaoroa, Baraki Abinaomi be Taboro Ororo dekenai ia lao. 13 Vadaeni Sisera ese iena kariota ibounai ia haboua, auri kariota 900, bona iena tuari taudia ibounai danu, bona Haroseta Hagoimi dekena amo Kisona Sinavai dekenai ia siaidia.

14 Vadaeni Debora ese Baraki ia hamaoroa, ia gwau, “Umui toreisi, hari dina Lohiabada ese Sisera be emui siahu henunai do ia atoa. Lohiabada ese umui do ia gunalaia.” Unai dainai Baraki be Taboro Ororo dekena amo ia diho mai, iena tuari taudia 10,000 danu.

15 Baraki mai ena tuari orea ese tuari totona idia raka vaira neganai, Lohiabada ese Sisera mai ena tuari orea taudia bona kariota dekenai daradara ia havaraia. Vadaeni Sisera ese iena kariota ia rakatania, aena dekenai ia heau mauri. 16 Vadaeni Baraki ese kariota bona tuari taudia ia lulua lao, ela bona Haroseta Hagoimi. Sisera ena tuari taudia ibounai be Baraki ese ia alaia ore, ta ia mauri noho lasi.

17 Sisera be aena dekenai ia heau, Iaele, Kene tauna, Hebere ena adavana, ena palai ruma dekenai ia lao, badina be Iabina, Hasoro ena king ese Hebere ena iduhu danu maino idia karaia.

18 Vadaeni Iaele be ia raka lao, Sisera ia hedavari henia ia gwau, “Tau badana e, oi mai, egu ruma oi vareai mai. Oi gari lasi.” Vadaeni Sisera ia raka vareai palai ruma lalonai. Hahine ese dabua badana ta ia abia, bona Sisera ia hunia, dabua ena henunai.

19 Sisera ma ia hereva, ia gwau, “Mani emu kara, ranu sisina lau dekenai oi henia, badina be lau ranu mase.” Hahine ese mamoe rata kopina ta ia kehoa, rata ia henia, vadaeni ia inua. Vadaeni dabua henunai ia hunia lou.

20 Sisera ma ia hamaoroa, ia gwau, “Palai ruma ena iduara dekenai do oi gini. Bema tau ta ia mai, ia henanadai, ia gwau, ‘Tau ta iniseni ia noho, a?’ oi gwau, ‘Lasi.’ ”

21 Vadaeni Iaele, Hebere ena adavana, ese ikoko ta ia abia, hama danu iena imana dekenai. Bona metairametaira Sisera dekenai ia raka lao. Vadaeni manori dainai ia mahuta mase neganai, Iaele ese Sisera ena kwarana dekenai ikoko ia botaia, ikoko ese iena kwarana ia gwadaia, bona ikoko ena matana ese tano ia gwadaia danu. Vadaeni Sisera ia mase momokani.

22 Baraki ese Sisera ia lulua lao neganai, Iaele be palai ruma dekena amo ia raka, Baraki danu ia hedavari, ia hamaoroa, ia gwau, “Oi mai, oi tahua tauna be do lau hedinaraia.” Vadaeni Baraki be hahine ena palai ruma dekenai ia raka vareai. Unuseni Sisera be tano dekenai ia hekure, ia mase vadaeni, iena kwarana be ikoko ese ia gwadaia.

23 Unai dina dekenai Dirava ese Iabina, Kanana taudia edia king ia halusia, Israela taudia edia vairana dekenai. 24 Bona Israela taudia ese Iabina, Kanana ena king dekenai edia tuari, be dina ta ta idia habadaia noho, ela bona idia hadikaia ore momokani.

Copyright information for `HMO