Judges 7

Gideona ese Midiana taudia ia halusia

Vadaeni Ierubu Bala, Gideona ena ladana ta, mai ena tatau ibounai be daba maragi idia toreisi, Haroda ranu gabuna dekenai idia kamepa. Midiana taudia edia kamepa be mirigini kahana dekenai, More Ororo ena koura dekenai.

Lohiabada ese Gideona dekenai ia hereva, ia gwau, “Oiemu tatau be momo herea. Bema Midiana taudia be oiemu tatau edia imana dekenai lau halusia neganai, Israela taudia do idia hekokoroku, do idia gwau, ‘Ai sibona aiemai goada dekenai ai kwalimu.’ Unai dainai tatau ibounai dekenai do oi hamaoroa, oi gwau, ‘Gari bona kudouna manoka taudia ese Gileada Ororo umui rakatania, emui ruma dekenai do umui giroa lou.’ ” Gideona be unai bamona ia hamaorodia, vadaeni ibounai 22,000 idia giroa lou, to 10,000 idia noho.

Vadaeni Lohiabada ese Gideona ma ia hamaoroa, ia gwau, “Tatau be momo herea do noho. Ranu gabuna dekenai idia do oi hakaudia lao, unuseni idia do lau tohoa. Bema tau ta lau gwauraia, lau gwau, ‘Inai tau oi danu do ia lao,’ vadaeni unai tau be oi danu do ia lao, to bema ta lau gwauraia, lau gwau, ‘Inai tau ese oi do ia bamoa lasi,’ unai tau be do ia lao lasi.”

Vadaeni, Gideona ese tatau ia hakaua lao ranu gabuna dekenai. Unuseni Lohiabada ese Gideona ia hamaoroa, ia gwau, “Oiemu taudia oi hamaoroa, ranu do idia inua. Vadaeni edia malana dekena amo ranu idia abia daekau, idia be sisia bamona idia inua taudia, be gabu ta do oi haboudia. To do idia tui diho, bona ranu be uduna dekenai do idia inua taudia be ma gabu ta do oi haboudia.” Tatau 300 ese edia imana dekena amo ranu idia abia daekau malana dekenai. To tatau oredia ibounai be idia tui diho, edia uduna dekenai ranu idia inua.

Lohiabada ese Gideona ia hamaoroa, ia gwau, “Unai tatau 300, edia malana dekenai ranu idia inua taudia dekena amo lau ese umui do lau hamauria, bona Midiana taudia be emui siahu henunai do lau atodia. To oredia ibounai do oi siaidia lao, ta ta edia ruma, edia ruma dekenai do idia giroa lou.” Vadaeni Gideona ese Israela taudia ibounai ia siaidia lou, ta ta edia palai ruma, edia palai ruma dekenai idia giroa lou, to unai tatau 300 sibona ia dogoatao. Unai 300 ese unai giroa lou taudia edia hodu bona kibi idia abia. Midiana taudia edia kamepa be Gideona ena orea henunai ia noho, koura dekenai.

Unai hanuaboi lalonai, Lohiabada ese Gideona ma ia hamaoroa, ia gwau, “Umui toreisi, umui diho lao haraga, edia kamepa do umui tuari henia. 10 To bema tuari totona oi gari neganai, oiemu hesiai tauna Pura danu do umui diho lao, Midiana taudia edia kamepa kahirakahira. 11 Edia hereva do umui kamonai, vadaeni goada do umui davaria, gabeai edia kamepa do umui tuari henia diba.” Vadaeni Gideona mai ena hesiai tauna Pura danu idia diho lao, ela bona tuari taudia edia kamepa ena hetoa gabuna dekenai.

12 Midiana taudia, bona Amaleka taudia, bona dina ia daekau kahana taudia ibounai be koura dekenai idia kamepa. Idia be momo herea, kwadi bamona, edia kamelo danu be duahia diba lasi, kone ena miri bamona.

13 Gideona ia ginidae neganai, Midiana kamepa edia tau ta ese iena nihi sivaraina, be iena turana ta dekenai ia hamaoroa, ia gwau, “Oi kamonai, lau be lau nihi, lauegu nihi dekenai bali beredi ta be ororo dekena amo ia diho mai, Midiana kamepa dekenai, palai ruma ta ia botaia, vadaeni palai ruma ia bubua, ia makohia, bona tano dekenai ia hekure palaka.”

14 Iena turana be ia haere, ia gwau, “Nihi ena anina be tamona sibona. Inai be Gideona Ioasa, Israela tauna, ena tuari kaia. Dirava ese Midiana, mai ena tuari taudia ibounai danu, Gideona ena siahu henunai ia atoa vadaeni.”

15 Gideona ese unai nihi sivaraina, bona nihi ena anina hedinaraia ia kamonai, vadaeni ia tui diho, Dirava dekenai ia tomadiho. Vadaeni Israela kamepa dekenai ia giroa lou, ia gwau, “Umui toreisi, badina be Lohiabada ese Midiana ena tuari taudia ibounai dekena amo, umui dekenai kwalimu ia henia vadaeni!” 16 Gideona ese unai tatau 300 ia haria, orea toi, idia ibounai dekenai hodu bona kibi ia henidia. Hodu ibounai lalonai be kede.

17 Vadaeni Gideona ese idia ia hamaoroa, ia gwau, “Lau do umui itaia namonamo. Bona kamepa ena hetoa gabuna dekenai lau ginidae neganai, lau ese lau karaia hegeregerena, be umui danu do umui karaia. 18 Lau bona lauegu orea taudia ese aiemai kibi do ai hiriria neganai, umui danu emui kibi do umui hiriria kamepa ena hetoa kahana ibounai dekena amo. Unai neganai danu inai bamona do umui boiboi, umui gwau, ‘Lohiabada dainai, bona Gideona dainai.’ ”

19 Hanuaboi momokani neganai, Gideona mai ena tatau 100 danu kamepa ena hetoa gabuna dekenai idia ginidae, Midiana gima taudia idia senisi neganai. Vadaeni nega tamona, Gideona mai ena orea taudia ese edia kibi idia hiriria, bona edia hodu idia hamakohia. 20 Unai neganai unai orea toi taudia ese edia kibi idia hiriria, bona edia hodu idia hamakohia, bona kede be edia imana lauri dekenai idia abia isi, to edia kibi be edia imana idiba dekenai idia dogoatao, idia hiriria. Vadaeni idia boiboi, idia gwau, “Lohiabada ena tuari kaia, bona Gideona ena!” 21 Idia ta ta edia gabu, edia gabu dekenai idia gini, Midiana taudia edia kamepa idia hagegea. Unai neganai kamepa ena tuari taudia idia heau hamatamaia. Ibounai mai gari danu idia boiboi, idia heau boio.

22 Kibi ibounai 300 idia hiriria neganai, Lohiabada ese unai kamepa ena tuari taudia edia huanai daradara ia havaraia, idia kavakava bamona, vadaeni idia ta ta, edia tuari kaia, edia tuari kaia idia abia, sibodia edia bamona taudia idia tuari henia. Vadaeni Midiana tuari taudia idia heau, ela bona Bete Sita, Serere kahana dekenai, ela bona Abele Mehola hetoa gabunai, Tabata kahirakahira.

23 Unai neganai Gideona ese hereva ia siaia, vadaeni Israela tuari taudia Napatali dekena amo, bona Asere dekena amo, bona Manase kahana ibounai dekena amo, ese Midiana taudia idia lulua.

24 Bona Gideona ese hesiai taudia ia siaia Eparaima ororodia dekenai, idia gwau, “Umui diho mai haraga, Midiana taudia do umui tuari henia. Umui ese Ioridane Sinavai bona ranu gabudia ela bona Bete Bara do umui koua, Midiana taudia ese sinavai do idia hanaia lasi totona.”

Vadaeni idia ese Eparaima tuari taudia ibounai idia boiria hebou, bona ranu gabudia ibounai idia gimaia ela bona Bete Bara, Ioridane Sinavai danu.
25 Idia ese Midiana lohia taudia rua danu idia abia, edia ladana Oreba bona Sebe. Oreba be Oreba Nadi dekenai idia alaia mase, bona Sebe be Sebe ena uaina moia gabuna dekenai idia alaia mase. Idia ese Midiana taudia idia lulua noho, bona Oreba bona Sebe edia kwaradia be Gideona dekenai idia henia. Ia be Ioridane Sinavai ena dina ia daekau kahana dekenai ia noho.

Copyright information for `HMO