Leviticus 7

Kerere totona bouboudia

Ma Mose ese Dirava ena hadibaia hereva ia gwauraia: Kerere totona bouboudia edia taravatu be inai, idia be helaga herea bouboudia: Inai kerere kokia totona boubou gauna be boubou patana ena mirigini kahana dekenai do idia alaia. Inai gabu dekenai danu idia gabua ore boubou gaudia idia alaia ore. Inai boubou gauna ena rara be boubou patana ena kahana 4 dekenai do idia negea. Unai boubou gauna ena digara ibounai be do idia kokia, bona boubou patana dekenai do idia atoa: Iuna, mai digarana ibounai, bogana ena digara ibounai, nadinadi mai edia digara, bona asena ena kahana badana.

Hahelagaia tauna ese inai digara ibounai be boubou patana dekenai do ia gabua ore. Inai be kerere totona aniani boubouna, Lohiabada ena. Hahelagaia taudia edia bese natuna tau ibounai ese inai boubou vamuna idia ania diba. To gabu helagana ta dekenai do idia ania, badina be inai boubou vamuna be helaga herea momokani.

Kara dika totona boubouna bona kerere totona boubouna edia taravatu be tamona: Boubou ena vamuna be unai boubou helaga ia karaia hahelagaia tauna ena, do ia ania diba. Gabua ore boubou gauna ena kopina danu, be unai boubou helaga ia karaia hahelagaia tauna ese do ia abia, iena.

Paraoa bouboudia ibounai, amu dekenai, paraipani dekenai, o auri palaka dekenai ia gabua gaudia ibounai, be Lohiabada dekenai ia henia hahelagaia tauna ena, do ia ania diba.

10 To idia gabua lasi paraoa bouboudia ibounai, mai olive dehoro danu mikisi gaudia, o paraoa kaukau sibona gaudia, be Arona ena natuna tau edia, do idia haria, ta ta ese hegeregere do idia abia.

Dirava danu maino karaia boubouna

11 Dirava danu maino karaia boubouna, Lohiabada dekenai henia gauna, ena taravatu be inai: 12 Bema tau ta ese Dirava tanikiu henia totona, maino karaia boubouna ia mailaia neganai, ia alaia boubouna danu be beredi, mai hatubua muramura lasi gauna do ia mailaia. Inai beredi be sisina metau bamona, paraoa bona olive dehoro idia mikisi dekena amo idia karaia gauna, o bisikesi, olive dehoro dekena amo idia dahua gaudia, o keke, paraoa bona olive dehoro idia mikisi dekena amo karaia gaudia. 13 Ma danu ia ese mai hatubua muramura danu beredi haida do ia henia. 14 Inai paraoa idauidau dekena amo, beredi sisina metauna ta, bisikesi ta, o keke ta, bona mai hatubua muramura beredi ta Lohiabada dekenai do ia henia. Inai boubou be hahelagaia tauna, boubou patana dekenai boubou gauna ena rara ia negea tauna, ena. Do ia ania diba.

15 Inai maino karaia boubou gauna ena vamuna be ia henia dinana dekenai do ia ania, haida do ia noho kava lasi ela bona dabai. 16 To bema tau ta ena boubou be iena gwauhamata ia hamomokania dainai, o sibona ena harihari gauna neganai, hahelagaia tauna ese, Lohiabada dekenai ia henia dinana dekenai, be unai boubou vamuna haida ia ania diba, bona dina iharuana danu haida ia ania diba.

17 To dina ihatoina dekenai bema unai vamu haida ia noho neganai, do idia gabua ore momokani. 18 Bema dina ihatoina dekenai unai vamu idia ania neganai, Dirava ese unai tau ena boubou gauna do ia abia dae lasi. Bona unai boubou ia henia tauna be Lohiabada ese do ia hanamoa lasi. Ia be do ia miro, bona ia ania tauna danu be do ia kerere.

19 Bema Dirava danu maino karaia vamu be gau mirona dekenai ia kamokau neganai, idia ese unai vamu do idia ania lasi, to lahi dekenai do idia gabua ore.

Dirava ena Taravatu hegeregerena idia goeva taudia ibounai ese unai maino karaia boubou ena vamu idia ania diba.
20 To bema ia goeva lasi tauna ta ese Dirava danu maino karaia boubouna ia ania neganai, ia be Dirava ena bese dekena amo do idia atoa siri. 21 Bona sedira tau ta ese taunimanima edia gau mirona ta, o mauri gauna ta ena gau mirona ta, o Dirava ena taravatu hegeregerena miro gauna ta, o bodaga gauna ta do ia dogoatao. Bema gabeai unai tau ese Dirava danu maino karaia boubou vamuna do ia ania neganai, ia be Dirava ena bese dekena amo do idia atoa siri.

Digara bona rara

22 Ma Lohiabada ese inai taravatu Mose dekenai ia henia: 23 Israela taudia ese digara do idia ania lasi, boromakau ena digara, o mamoe ena digara, o nanigosi ena digara. 24 Do ia mase kava gauna, o dagedage gauna ta ese ia alaia gauna ta ena digara be edia gaukara idauidau totona idia gaukaralaia diba, to do idia ania lasi. 25 Badina be bema tau ta ese digara do ia ania, Lohiabada dekenai gabua ore boubou totona ia henia diba gauna ta ena digara, unai tau be Dirava ena bese dekena amo do idia atoa siri. 26 Rara danu do idia ania lasi, manu ta, o mauri gauna ta ena rara. Inai taravatu be do idia badinaia momokani, edia noho gabudia ibounai dekenai. 27 Rara do ia ania tauna be Dirava ena bese dekena amo do idia atoa siri.

Hahelagaia taudia edia aniani

28 Ma Lohiabada ese Mose dekenai inai hadibaia hereva ia henia: 29 Israela taudia ese inai boubou taravatu do idia badinaia: Dirava danu maino karaia boubouna ia mailaia tauna ese iena boubou kahana be Dirava dekenai do ia henia. 30 Sibona ena imana dekenai unai aniani boubouna Lohiabada dekenai do ia mailaia. Ia ese unai vamu ena digara bona ena kemena Lohiabada dekenai do ia henia.

31 Hahelagaia tauna ese boubou patana dekenai unai digara do ia gabua ore, to kemena be hahelagaia taudia, Arona ena bese taudia ese do idia ania. 32 Inai boubou ia mailaia tauna ese boubou gauna ena aena, idiba kahana gauna, be hahelagaia tauna dekenai do ia henia. 33 Arona ena natuna, boubou vamuna ena rara bona digara boubou patana dekenai ia atoa tauna, ese unai aena idibana do ia ania.

34 Boubou gauna ena kemena be harihari gauna ta, aena idibana danu be henia gauna ta. Idia be Israela taudia edia maino karaia bouboudia dekena amo lau Dirava ese lau abia gaudia. Bona Israela taudia ese inai kemena bona aena be Arona bona iena tubuna taudia dekenai do idia henia ela bona hanaihanai.

35 Hahelagaia taudia edia gaukara davana be inai. Edia hahelagaia dinana dekenai, Lohiabada dekenai idia gabua ore vamuna kahana dekena amo idia ania diba aniani gaudia be unai. 36 Edia hahelagaia dinana dekenai, Lohiabada ese oda ia gwauraia, ia gwau Israela taudia ese unai kemena bona aena idibana be hahelagaia taudia dekenai do idia henia, edia aniani. Inai be edia gaukara davana, gabua bouboudia ibounai dekena amo, ela bona hanaihanai.

37 Gabua ore bouboudia, bona paraoa bouboudia, bona kara dika totona bouboudia, bona kerere totona bouboudia, bona hahelagaia totona bouboudia, bona Dirava danu maino karaia bouboudia edia taravatu be unai.

38 Unuseni, Sinai Ororo dekenai Lohiabada ese inai boubou edia taravatu be Mose dekenai ia henia. Dinana be unai, Lohiabada ese Israela taudia ia oda henidia edia boubou gaudia ia dekenai do idia mailaia, Sinai, taunimanima idia noho lasi gabuna dekenai.

Copyright information for `HMO