Mark 1

Ioane Bapatiso ia haroro

Dirava ena Natuna Iesu Keriso ena Sivarai Namona ia matamaia inai bamona. Peroveta tauna ladana Isaia ia torea,

“Dirava ia hereva, ia gwau:
‘Oiemu vairana dekenai lauegu hesiai tauna lau siaia.
Oiemu dala do ia karaia hegaegae.’
Ta ia boiboi taunimanima idia noho lasi gabuna dekenai inai bamona,
‘Lohiabada ena dala umui karaia hegaegae,
iena dala umui hamaoromaoroa.’ ”

Unai dainai Ioane Bapatiso ia mai, taunimanima idia noho lasi gabuna dekenai ia haroro. Iena haroro be, taunimanima edia lalona idia giroa, bona bapatiso idia abia, kara dika gwauatao ena toana. Iudea kahana taudia bona Ierusalema hanua taudia ibounai idia lao Ioane dekenai. Idia gwau, “Ai be kara dika taudia.” Vadaeni Ioane ese idia ia bapatiso henia Ioridane Sinavai lalonai.

Ioane ena dabua be kamelo huina bona iena gaba gauna be boromakau kopina. Iena aniani be kwadi bona hani. Ia haroro, ia gwau, “Tau ta lauegu murinai dohore ia mai, iena siahu ia bada, lauegu siahu ia maragi. Inai tau ena tamaka varona, lau be hegeregere lasi lau ruhaia. Lau ese umui lau bapatisoa ranu dekenai, to dohore inai tau ese umui do ia bapatisoa Lauma Helaga dekenai.”

Ioane ese Iesu ia bapatisoa

Unai neganai, Iesu be Nasareta hanua, Galilea kahana dekena amo ia mai, bona Ioane ese Iesu ia bapatisoa Ioridane Sinavai lalonai. 10 Iesu ese ranu ia rakatania neganai, nega tamona ia itaia guba ia kehoa, bona Lauma Helaga ia diho ia dekenai pune manu bamona. 11 Bona guba dekena amo gado ta ia hereva, ia gwau, “Oi be lauegu Natuna. Lau lalokau henia oi. Lau moale bada oi dekenai.”

Satani ese Iesu ia dibagania

12 Vadaeni nega tamona Lauma Helaga ese Iesu ia siaia taunimanima idia noho lasi gabuna dekenai. 13 Dina 40 ia noho taunimanima idia noho lasi gabunai, unuseni Satani ese ia dibagania. Dagedage boromadia be Iesu danu idia noho, to aneru ese ia idia naria.

Iesu ena gaukara ia matamaia Galilea dekenai

14 Ioane Bapatiso idia atoa dibura ruma dekenai murinai, Iesu ia lao Galilea dekenai, Dirava ena Sivarai Namona ia harorolaia. 15 Ia haroro, ia gwau, “Harihari be Dirava ena nega, bona Dirava ena Basileia be kahirakahira ia ginidae. Umui emui lalona umui giroa, Sivarai Namona umui abidadama henia.”

Iesu ese tau 4 ia boiria, ia murinai idia raka

16 Iesu ia raka Galilea Gohu kone dekenai, Simona mai ena tadina Andrea danu ia itaia. Idia ruaosi be davara dekenai reke idia negea, badina idia be haoda taudia. 17 Iesu ia gwau, “Umui mai lauegu murinai, dohore siahu lau henia umui dekenai, do umui haoda karaia, taunimanima umui abia.” 18 Nega tamona edia reke idia rakatania, Iesu ena murinai idia raka.

19 Sisina ia raka, vadaeni Iamesi, Sebedeo ena natuna, mai ena tadina Ioane danu ia itaia. Vanagi dekenai idia edia reke idia hanamoa noho. 20 Iesu ia gwau, “Lauegu murinai umui raka mai.” Vadaeni, ruaosi ese edia tamana Sebedeo mai ena gaukara taudia danu vanagi dekenai idia rakatania, Iesu ena murinai idia raka lao.

Mai lauma dika tauna Iesu ese ia hanamoa

21 Idia lao Kaperanauma hanua dekenai, unuseni Sabati Dina neganai, dubu lalonai Iesu ese ia hadibaia. 22 Taunimanima idia hoa bada iena hadibaia hereva dekenai, badina mai siahu danu ia hereva, taravatu hadibaia taudia bamona lasi.

23 Inai edia dubu dekenai be tau ta mai lauma dikana ia raka vareai, ia boiboi, ia gwau, 24 “Iesu, Nasareta hanua tauna, badina dahaka oi mai ai dekenai? Ai haorea totona oi mai, a? Lau diba oi. Oi be Dirava ena Helaga Tauna.”

25 Iesu ese lauma ia gwau henia, ia gwau, “Hereva lasi, inai tau oi rakatania lao.”

26 Lauma dikana ese inai tau ia hamarerea bada herea, bona mai boiboi bada danu ia murimuri lao. 27 Itaia taudia ibounai idia hoa bada, idia herevahereva sibodia dekenai, “Inai be dahaka? Hadibaia gauna matamata? Inai tau ena siahu dekenai lauma dikadia danu ia gwau henia, bona iena hereva gauna idia karaia.”

28 Vadaeni haraga momokani, Iesu ena kara sivarai, be Galilea kahana dekenai noho taudia ibounai idia kamonai.

Iesu ese Petero adavana ena sinana ia hanamoa

29 Dubu ia rakatania neganai, Iesu be Simona bona Andrea edia ruma dekenai ia raka vareai, Iamesi bona Ioane danu. 30 Simona adavana ena sinana ia gorere dainai, ia hekure noho, mai kopina siahu bada. Nega tamona idia ese Iesu idia hamaoroa. 31 Ia lao, hahine ena imana ia abia, bona ia ese hahine ia abia isi. Vadaeni, inai hahine ena gorere be nega tamona ia doko, ia toreisi, bona aniani ia henia idia dekenai.

Iesu ese taunimanima momo edia gorere ia hanamoa

32 Adorahi, dina ia diho neganai, gorere taudia bona mai lauma dikadia taudia ibounai idia mailaia Iesu dekenai. 33 Hanua taudia ibounai idia lao, idia hebou ruma ena iduara dekenai. 34 Gorere idauidau taudia momo Iesu ese ia hanamoa. Bona lauma dikadia momo ia lulua, bona lauma dikadia edia hereva dala ia koua, badina idia diba ia.

Galilea hanuadia dekenai Iesu ia haroro

35 Daba maragi, dina ena diari ia mai lasi neganai, Iesu ia toreisi, taunimanima lasi gabuna dekenai ia lao, unuseni ia guriguri. 36 Simona mai ena bamona taudia danu ese Iesu idia tahua lao. 37 Idia davaria neganai, idia gwau, “Taunimanima ibounai idia tahua oi.”

38 Ia hereva, ia gwau, “Namo ita lao hanua haida, unuseni lau ura haroro karaia, badina inai totona lau mai.” 39 Vadaeni Iesu ia lao Galilea hanua ibounai dekenai. Unuseni edia dubu lalonai ia haroro, bona lauma dikadia ia lulua.

Lepera tauna Iesu ese ia hanamoa

40 Lepera tauna ta ia mai Iesu dekenai, ia tui diho bona ia noia, ia gwau, “Bema oi ura, mani oi hanamoa lau, badina oiemu siahu be ia hegeregere.”

41 Iesu ese mai bogahisihisi danu, iena imana ia atoa lepera tauna ena kopina dekenai. Ia gwau, “Lau ura. Hari oi goeva.” 42 Nega tamona, lepera gorere ia ore, unai tau ia goeva vadaeni. 43 Vadaeni Iesu ese ia siaia, to ia sisiba henia guna, 44 ia gwau, “Tau ta do oi hamaoroa lasi, to oi lao hahelagaia tauna dekenai, oiemu kopina goeva ia itaia totona. Bona Mose ena taravatu hegeregere, oi goeva dainai, harihari gauna Dirava dekenai oi henia. Inai oi karaia neganai, oiemu goeva be momokani vadaeni idia dekenai.”

45 To unai tau ia lao gabu idauidau dekenai, unai kara ena sivarai taunimanima ibounai dekenai ia haroro hedinaraia, unai dainai Iesu ia lou mai lasi hanua dekenai, to taunimanima lasi gabudia dekenai ia noho. To unuseni danu kahana ibounai dekena amo, taunimanima idia mai ia dekenai.

Copyright information for `HMO