Matthew 14

Ioane Bapatiso ia mase

Unai neganai king Heroda ese Iesu ena sivarai ia kamonai. Vadaeni ia ese iena hesiai taudia ia hamaorodia, ia gwau, “Inai be Ioane Bapatiso. Ia be mase dekena amo ia toreisi vadaeni, inai dekenai unai siahu karadia ia karaia.”

Badina be Heroda ese Ioane ia dogoatao vadaeni, ia guia, dibura ruma dekenai ia koua, Herodia, iena kakana Filipo ena adavana totona. Badina be Ioane ese ia hamaoroa, ia gwau, “Inai hahine oi abia be oi kerere.” Heroda ia ura be Ioane ia alaia, to Iuda taudia dekenai ia gari, badina be idia ibounai idia laloa Ioane be peroveta tauna.

To dina ta Heroda ese ia vara dinana laloatao totona, aria ta ia karaia, vadaeni Herodia ena natuna kekeni be edia vairana dekenai ia mavaru, Heroda ia hamoalea. Unai dainai mai hereva metau danu Heroda ese kekeni dekenai ia gwauhamata, ia gwau, “Bema gau ta oi noinoi lau dekenai, do lau henia diba.”

Kekeni ena sinana ese ia hereva henia guna dainai, ia be ia gwau, “Ioane Bapatiso ena kwarana be mereki dekenai oi mailaia, iniseni oi henia lau dekenai.”

King ena lalona ia hisihisi vadaeni, to iena gwauhamata dainai, bona iena vadivadi taudia dainai, king ese idia ia hamaoroa, kekeni ena ura gauna do idia henia. 10 Tau haida ia siaia, Ioane ena kwarana, dibura ruma dekenai idia utua oho. 11 Kwarana be mereki dekenai idia atoa, idia mailaia, kekeni dekenai idia henia. Vadaeni ia ese iena sinana dekenai ia mailaia. 12 Vadaeni Ioane ena diba tahua taudia idia lao, Ioane ena tauanina idia guria. Vadaeni idia lao, Iesu idia hamaoroa.

Iesu ese tatau 5000 dekenai aniani ia henia

13 Iesu be Ioane ena sivarai ia kamonai. Vadaeni vanagi ta dekenai unai gabu ia rakatania, taunimanima idia noho lasi gabuna dekenai ia lao. To taunimanima momo be idia kamonai, vadaeni aena dekenai idia raka lao ia dekenai, edia hanua dekena amo. 14 Kone dekenai ia diho neganai, Iesu ese taunimanima momo herea ia itaia, ia bogahisihisi idia dekenai, bona edia gorere taudia ia hanamoa.

15 Adorahi neganai iena diba tahua taudia Iesu dekenai idia lao, idia gwau, “Inai be taunimanima idia noho lasi gabuna, bona dina be ia diho vadaeni. Taunimanima oi siaia be namo, hanua maragidia dekenai edia aniani do idia hoia.”

16 To Iesu ia gwau, “Badina dahaka do idia lao? Umui sibona ese aniani umui henidia be namo.” 17 To idia haere ia dekenai, idia gwau, “Iseda aniani gaudia be paraoa 5 sibona, bona gwarume maragi rua.”

18 Iesu ia gwau, “Umui mailaia lau dekenai.” 19 Vadaeni unai taunimanima momo dekenai Iesu ia hereva, rei dekenai do idia helai diho. Vadaeni Iesu ese aniani gaudia 5 sibona, bona gwarume rua sibona ia abia, guba dekenai ia itaia, bona aniani ia hanamoa. Vadaeni aniani ia makohia sisina sisina, diba tahua taudia dekenai ia henia. Vadaeni idia ese unai taunimanima momo dekenai idia henia. 20 Ibounai idia aniani, idia boga kunu. Gabeai aniani orena idia haboua, bosea 12 idia honu. 21 Idia aniani tatau be 5000 bamona, to hahine mai edia natudia be idia duahia lasi.

Iesu be davara ena kopina dekenai ia raka

22 Iesu ese iena diba tahua taudia dekenai ia hereva, vanagi dekenai do idia guia, do idia lao guna, gohu ena kahana dekenai do idia heau hanaia. To ia be taunimanima do ia siaia lao idau gabu idau gabu dekenai. 23 Taunimanima ia siaia ore, vadaeni Iesu sibona ororo ta dekenai ia daekau, ia guriguri. Hanuaboi ia ginidae, Iesu sibona ia noho unuseni. 24 To unai vanagi be gohu ena huana dekenai, bona hurehure ese ia hamarerea momo, badina lai be edia vairana dekena amo ia mai. 25 Vadaeni daba rere kahirakahira, dibura neganai, Iesu be idia dekenai ia lao, davara ena kopina dekenai ia raka. 26 Diba tahua taudia ese davara kopina dekenai ia raka noho neganai idia itaia, vadaeni idia gari dikadika, idia gwau, “Unai be lauma ta.” Idia gari bada dainai idia boiboi dikadika.

27 To Iesu ia hereva idia dekenai, ia gwau, “Umui goada abia, inai be lau, umui gari lasi.”

28 Vadaeni Petero ia hereva Iesu dekenai, ia gwau, “Lohiabada e, bema inai be oi momokani, oi hereva lau dekenai, vadaeni davara ena kopina dekenai do lau raka mai.”

29 Iesu ia gwau, “Oi mai.” Petero be vanagi dekena amo ia diho, davara ena kopina latanai ia raka hamatamaia, Iesu dekenai ia lao gwauraia. 30 To lai ia itaia, vadaeni ia gari, davara lalonai ia diho hamatamaia, vadaeni ia boiboi, ia gwau, “Lohiabada e, oi hamauria lau.”

31 Vadaeni Iesu ese nega tamona iena imana dekenai Petero ia dogoatao, ia veria daekau. Ia gwau, “Abidadama maragimaragi tauna, dahaka totona oi daradara?”

32 Idia ruaosi vanagi dekenai idia guia, vadaeni lai ia doko. 33 Vanagi taudia be Iesu ena vairana dekenai idia tomadiho, idia gwau, “Momokani, oi be Dirava ena Natuna.”

Iesu ese gorere taudia ia hanamoa Genesareta dekenai

34 Gohu idia hanaia, Genesareta kone dekenai idia kamokau. 35 Unai gabu taudia idia diba vadaeni inai be Iesu, vadaeni hereva idia siaia, unai tano taudia ibounai idia hadibaia. Vadaeni gorere taudia ibounai Iesu dekenai idia abia lao. 36 Idia noia, iena dabua sibona dekenai do idia dogoatao. Vadaeni idia dogoatao taudia ibounai be idia namo lou.

Copyright information for `HMO