Matthew 17

Iesu idia itaia, iena toana be ia idau

Dina 6 murinai, Iesu ese Petero bona Iamesi bona ena tadina Ioane ia abia lao, ororo badana ta dekenai idia daekau. Vadaeni idia edia vairana dekenai Iesu ena toana ia idau, iena vairana be ia diaridiari dina bamona, iena dabua ia kurokuro momokani, diari bada bamona. Vadaeni Mose bona Elia be idia edia vairana dekenai idia hedinarai, Iesu danu idia herevahereva. Petero ia hereva Iesu dekenai, ia gwau, “Lohiabada e, iniseni ita noho be namo herea. Bema oi ura, palai ruma toi do ai karaia, ta oiemu, ta Mose ena, ta Elia ena.”

Ia be do ia hereva noho neganai, ori mai diaridiari danu ese idia ia koua, bona gado ta ori lalona dekena amo ia mai, ia gwau, “Egu Natuna be inai, lauegu lalokau Tauna. Lauegu lalona ia moale ia dekenai. Iena hereva do umui kamonai henia.”

Diba tahua taudia idia kamonai, vadaeni edia vairana idia atoa diho, idia gari dikadika dainai. To Iesu be ia lao idia dekenai, edia kopina dekenai ena imana ia atoa, ia gwau, “Umui toreisi, umui gari lasi.” Vadaeni edia kwarana idia abia isi, to tau ta idia itaia lasi, Iesu sibona ia noho.

Ororo dekenai idia diho neganai Iesu ese ia hamaorodia, ia gwau, “Umui itaia gaudia be tau ta dekenai do umui hamaoroa lasi ela bona Taunimanima ena Natuna be mase dekena amo do ia toreisi lou.”

10 Iesu ena diba tahua taudia ese idia nanadaia ia dekenai, idia gwau, “Badina be dahaka taravatu hadibaia taudia idia gwau Elia be do ia mai guna?”

11 Iesu be ia haere, ia gwau, “Inai be momokani, Elia be do ia mai guna, gau ibounai do ia karaia hegaegae totona. 12 To umui lau hamaoroa, Elia be ia mai vadaeni, to idia be idia diba lasi ia, vadaeni edia ura kara ibounai be ia dekenai idia karaia vadaeni. Taunimanima ena Natuna dekenai danu, unai bamona hisihisi do idia henia.”

13 Iesu be unai bamona ia hereva, vadaeni iena diba tahua taudia edia lalona idia kehoa, ia ese Ioane Bapatiso herevana ia gwauraia.

Iesu ese mai lauma dika merona ia hanamoa

14 Idia giroa lou unai taunimanima momo dekenai, vadaeni tau ta Iesu dekenai ia lao, iena vairanai ia tui diho, ia gwau, 15 “Lohiabada e, lauegu natuna dekenai oi bogahisihisi, badina be ena lalona ia kavakava, bona ena gorere ia bada. Nega momo lahi dekenai ia moru, bona nega momo ranu dekenai ia moru. 16 Oiemu diba tahua taudia dekenai lau mailaia, to idia be hanamoa dalana idia diba lasi.”

17 Iesu ia haere, ia gwau, “Abidadama lasi bona lalona auka taudia e! Lau be umui dekenai do lau noho ela bona edena negai? Do lau haheauka henia umui dekenai ia lao bona edena negai? Lau dekenai umui mailaia.” 18 Iesu ese lauma dika ia gwau henia. Vadaeni lauma dika ese mero ia rakatania, vadaeni nega tamona mero ia namo vadaeni.

19 Gabeai diba tahua taudia be Iesu dekenai idia lao, idia nanadaia hunia dala dekenai, idia gwau, “Badina dahaka ai be hegeregere lasi lauma dika ai lulua lao?”

20 Iesu ia gwau, “Umui emui abidadama be maragimaragi dainai. Umui lau hamaoroa momokani, bema umui emui abidadama ena bada be mastadi uhena sibona bamona, inai ororo bema umui hereva henia, bema umui gwau, ‘Iniseni dekena amo oi lao unuseni,’ be do ia lao. Kara ibounai danu do umui karaia diba. 21 To gau inai bamona lulua lao, be dala ta lasi, guriguri bona aniani ania lasi ena kara sibona dekena amo.”

Iesu ese nega iharuana ia gwau do ia mase bona do ia toreisi lou

22 Idia be Galilea dekenai idia mai haboua neganai, Iesu ese ia hamaorodia, ia gwau, “Taunimanima ena Natuna be taunimanima ese do idia henia alaia taudia dekenai. 23 Do idia alaia mase, to dina toi murinai do ia toreisi lou.”

Vadaeni diba tahua taudia edia lalona idia hisihisi bada.

Dubu Helaga dekenai takisi moni henia

24 Idia be Kaperanauma dekenai idia ginidae, vadaeni Dubu Helaga ena moni gogoa taudia Petero dekenai idia lao, idia nanadaia, idia gwau, “Umui emui hadibaia tauna be Dubu Helaga ena moni ia henia o lasi?”

25 Petero ese ia haere, ia gwau, “Ia henia.” Ruma dekenai idia daekau, vadaeni Iesu ese Petero ia nanadaia, ia gwau, “Simona e, oi be edena bamona oi laloa? Tanobada edia king ese takisi moni edia taunimanima korikori dekena amo do idia abia, o idau taudia dekena amo?”

26 Petero ia gwau, “Idau taudia dekena amo.” Iesu ma ia gwau, “Unai dainai, king edia taunimanima korikori be do idia noho kava, takisi idia henia lasi. 27 To edia lalona ita hametaua garina, gohu dekenai do oi lao, kimai ta oi negea diho. Kimai ia abia guna gwarume be do oi veria daekau. Iena uduna oi kehoa, bona lalonai siliva moni ta do oi davaria. Oi abia, vadaeni do oi henia idia dekenai, ita ruaosi totona.”

Copyright information for `HMO