Matthew 19

Iesu ese hahine negea kara ia herevalaia

Unai hereva ibounai ia hadokoa neganai Iesu ese Galilea ia rakatania, Iudea kahana dekenai ia lao, Ioridane Sinavai unai kahana dekenai. Taunimanima momo herea iena murina dekenai idia lao, vadaeni ia ese edia gorere ia hanamoa unuseni.

Vadaeni Farisea taudia haida ia dekenai idia lao, idia nanadaia koikoi dala dekenai, iena laloa tahua totona, idia gwau, “Tau ta ese iena adavana ia negea diba bema ia ura neganai, o bema mai badina?”

Iesu ia haere idia dekenai, ia gwau, “Be, Buka Helaga umui duahia lasi, a? Ia torea, ‘Hamatamaia nega ia karaia neganai, Dirava ese tau bona hahine ia karaia, bona ia gwau: Inai dainai tau be iena tamana sinana do ia rakatania, iena adavana dekenai do ia hakapua, vadaeni idia ruaosi be tamona idia noho.’ Unai dainai idia be rua lasi, edia anina be tamona. Dirava ese ia hakapua taudia, be taunimanima ese do idia hapararaia lasi.”

Idia ma idia gwau, “Badina be dahaka Mose ena taravatu ia hereva, ia gwau, ‘Negea totona pepa do ia torea, hahine do ia henia, vadaeni do ia rakatania?’ ”

Iesu ia gwau, “Umui emui lalona idia auka dainai Mose ia hereva umui dekenai, ia gwau, ‘Umui emui adavana do umui rakatania.’ To hamatamaia neganai be unai bamona lasi. To lau ese umui lau hamaoroa, bema iena adavana ia heudahanai lasi, to tau ta ese iena adavana ia rakatania, vadaeni hahine ta ma ia adavaia, unai tau be heudahanai tauna.”

10 Iesu ena diba tahua taudia ese idia hereva henia, idia gwau, “Bema headava ena dala be unai bamona, taunimanima idia headava lasi be namo.”

11 Ia gwau, “Taunimanima ibounai ese inai hereva do idia abia dae diba lasi, Dirava ese ia durudia taudia sibona mo. 12 Badina haida be edia sinana bogana dekena amo idia vara neganai idia headava hegeregere lasi. To haida be taunimanima ese idia ivaia dainai idia headava diba lasi. Bona haida be Guba Basileia totona idia sibona idia helaga, be do idia headava lasi. Inai hereva do ia abia dae diba tauna ese do ia abia dae.”

Iesu ese maragidia ia hanamoa

13 Haida ese edia natudia Iesu dekenai idia abia lao, iena imana edia kwarana latanai do ia atoa gwauraia, bona do ia guriguri idia dainai totona. To diba tahua taudia ese maragidia idia mailaia taudia idia gwau henidia. 14 To Iesu ia gwau, “Maragi ibounai lau dekenai idia mai be namo, umui lulua lasi. Badina be unai bamona maragidia be Guba Basileia taudia.”

15 Vadaeni iena imana idia edia kwarana dekenai ia atoa. Vadaeni unai gabu dekena amo ia raka siri.

Uhau tauna mai kohu momo danu

16 Tau ta Iesu dekenai ia lao, ia gwau, “Hadibaia tauna e, dahaka kara namona do lau karaia, mauri hanaihanai abia totona?”

17 Iesu ia haere, ia gwau, “Badina dahaka kara namo totona oi nanadaia lau dekenai? Tamona sibona ia namo vadaeni. Bema mauri oi ura neganai, taravatu do oi badinaia.”

18 Ia gwau, “Edena taravatu?” Iesu ia gwau, “Gaudia be inai: Oi alaia lasi, oi heudahanai lasi, oi henaoa lasi, oi samania koikoi lasi. 19 Oiemu tamana oiemu sinana dekenai oi matauraia. Bona, oiemu badibadinai tauna dekenai oi lalokau henia, oi sibona dekenai oi lalokau henia bamona.”

20 Unai uhau tauna ia gwau, “Unai ibounai be lau badinaia namonamo vadaeni, ma dahaka dohore lau karaia?”

21 Iesu ia haere, ia gwau, “Bema oi ura oi namo herea momokani, oiemu kohu oi lao hoia, ogogami taudia dekenai oi henia, guba ena kohu oi abia. Vadaeni lauegu murina dekenai oi raka mai.”

22 To unai uhau tauna be unai hereva ia kamonai, vadaeni mai lalohisihisi danu ia raka siri, badina ia be kohu momo tauna.

23 Vadaeni Iesu ese iena diba tahua taudia dekenai ia hereva, ia gwau, “Umui lau hamaoroa momokani, kohu momo tauna be Guba Basileia ena iduara dekenai vareai be do ia auka. 24 Ma umui lau hamaoroa, kamelo be nila ena matuna dekenai do ia vareai haraga, to kohu momo tauna be Dirava ena Basileia do ia vareai be mai hekwarahi danu.”

25 Iesu ena diba tahua taudia ese unai hereva idia kamonai neganai, idia hoa dikadika, idia gwau, “Be, daika be mauri do ia davaria?”

26 Iesu ese idia dekenai ia itaia, ia gwau, “Taunimanima ese do idia karaia diba lasi, to Dirava ese gau ibounai be ia karaia diba.”

27 Vadaeni Petero ese ia hereva henia, ia gwau, “Ai be gau ibounai ai rakatania, vadaeni oiemu murina dekenai ai raka. Unai dainai ai be dahaka do ai abia?”

28 Iesu ese ia hamaorodia, ia gwau, “Umui lau hamaoroa momokani, lauegu murina dekenai umui raka taudia, be gau ibounai karaia matamata ena neganai, Taunimanima ena Natuna ena terona diaridiari dekenai do ia helai neganai, terona 12 dekenai do umui helai, Israela edia iduhu 12 dekenai dohore umui kota henia. 29 Ruma, o iena tadikakana, o iena taihuna, o iena tamana, o iena sinana, o iena adavana, o iena natuna, o tano, lau totona ia rakatanidia tauna ese unai do ia abia lou, ma momo herea momokani danu. Bona mauri hanaihanai danu do ia abia. 30 To idia guna taudia momo be do idia gabeai, bona idia gabeai taudia momo be do idia guna.

Copyright information for `HMO