Matthew 3

Ioane Bapatiso ia haroro

Unai neganai Ioane Bapatiso ia hedinarai, taunimanima idia noho lasi gabuna, Iudea tano dekenai ia haroro, ia gwau, “Emui lalona umui giroa, badina be Dirava ena Basileia be kahirakahira ia mai.” Badina Ioane, be peroveta tauna Isaia ese ia herevalaia guna, ia gwau:

“Gado ta taunimanima idia noho lasi tano dekenai, ia boiboi badabada, ia gwau,
‘Lohiabada ena dala umui kehoa,
iena dala umui karaia maoromaoro.’ ”

Ioane ena dabua be kamelo ena huina, iena gaba gauna be boromakau ena kopina, iena aniani be kwadi bona uda ena hani. Ierusalema bona Iudea taudia ibounai, bona Ioridane Sinavai kahana hanua taudia ibounai, be Ioane dekenai idia lao. Edia dika idia gwauraia hedinarai. Vadaeni Ioane ese Ioridane Sinavai dekenai bapatiso ia henidia.

To Farisea taudia bona Sadukea taudia momo herea bapatiso totona idia lao, bona Ioane ese idia ia itaia neganai ia gwau henidia, ia gwau, “Gaigai edia natudia e, daika ese umui ia hamaoroa, gabeai do ia vara badu dekena amo do umui heau mauri? Emui lalona umui giroa, vadaeni lalona giroa ena anina umui hedinaraia! Bona emui lalona dekenai umui hereva lasi, ‘Aiemai tamana be Aberahamo,’ badina be umui lau hamaoroa, Dirava be mai ena siahu inai nadi dekena amo ena natudia do ia havaraia Aberahamo ena. 10 Harihari ira be au edia ramuna dekenai idia atoa hegaegae. Unai dainai huahua namodia idia atoa lasi au ibounai be do idia utua, lahi dekenai do idia negea.

11 “Lau be ranu dekenai lau bapatisoa umui, lalona giroa ena toana. To lauegu murina dekenai do ia mai tauna be lauegu siahu do ia hanaia. Lau be namo lasi iena tamaka do lau abia loaloa. Ia ese Lauma Helaga bona lahi dekenai do ia bapatisoa umui. 12 Iena itapo be iena imana dekenai, iena uiti botaia gabuna dekenai uiti do ia hagoevaia namonamo. Iena uiti be sitoa dekenai do ia haboua, to ena momoru be lahi ia bodo lasi dekenai do ia gabua momokani.”

Ioane ese Iesu ia bapatiso henia

13 Unai neganai Iesu ese Galilea ia rakatania, ia lao Ioridane Sinavai dekenai. Ioane dekenai ia lao, ia ura Ioane ese do ia bapatiso henia. 14 To Ioane ia ura lasi, ia gwau, “Lasi, bema oi ese lau oi bapatiso henia be namo. Badina dahaka lau dekenai oi mai?”

15 To Iesu ia haere, ia gwau, “Mani oi karaia, badina be inai bamona dala dekenai Dirava ena ura gauna be do ita karaia.” Unai dainai Ioane ese Iesu ena bapatiso ia karaia.

16 Iesu ia bapatisoa, vadaeni maoromaoro, ranu dekena amo ia daekau neganai, guba be ia kehoa vadaeni, bona Iesu ese Dirava ena Lauma ia itaia, pune manu bamona ia diho, ia dekenai ia helai. 17 Bona gado ta guba dekena amo ia boiboi, ia gwau, “Inai be lauegu Natuna, egu lalokau, lau moale bada ia dekenai.”

Copyright information for `HMO