Matthew 8

Iesu ese lepera tauna ia hanamoa

Iesu ese ororo dekena amo ia diho, vadaeni taunimanima momo iena murinai idia raka. Vadaeni lepera tauna ta ia dekenai ia lao, ia toma diho henia, ia gwau, “Lohiabada e, bema oi ura, oi hagoevaia diba lau.”

Iesu ese iena imana ia dekenai ia atoa, ia gwau, “Lau ura, hari oi goeva.” Vadaeni nega tamona lepera tauna ia goeva. Iesu ese ia hamaoroa, ia gwau, “Tau ta oi hamaoroa lasi, to oi lao, hahelagaia tauna ese do ia itaia oi, bona hagoevaia ena boubou gauna, Mose ese ia gwauraia hegeregerena do oi henia, bona taunimanima ibounai do idia diba oi goeva vadaeni.”

Iesu ese tuari lohia ta ena hesiai tauna ia hanamoa

Iesu be Kaperanauma dekenai ia ginidae, vadaeni Roma tuari lohia ta ia dekenai ia lao, ia noinoi, ia gwau, “Lohiabada e, lauegu hesiai tauna be ruma dekenai ia hekure noho mai ena gorere bada. Ia marere diba lasi, bona ia hisihisi bada.”

Iesu ia hamaoroa, ia gwau, “Do lau mai, do lau hanamoa.”

To tuari lohia tauna ia haere, ia gwau, “Lohiabada e, lau be namo lasi, vadaeni lauegu ruma dekenai do oi daekau lasi. Mani oi hereva sibona, vadaeni egu hesiai tauna do ia namo lou. Badina be lau danu tau badadia haida edia henunai lau noho, bona tuari taudia be lauegu henunai idia noho. Ta do lau hamaoroa, lau gwau, ‘Oi lao,’ vadaeni do ia lao. Ma ta do lau hamaoroa, lau gwau, ‘Oi mai’ vadaeni do ia mai. Ma egu hesiai tauna do lau hamaoroa, lau gwau, ‘Inai oi karaia,’ vadaeni do ia karaia.”

10 Iesu ese unai hereva ia kamonai, vadaeni ia hoa dikadika. Vadaeni iena murinai raka taudia ia hamaorodia, ia gwau, “Umui lau hamaoroa momokani, abidadama inai bamona be Israela dekenai lau davaria lasi, lasi bona lasi momokani. 11 Danu lau hamaoroa umui, idau tano taudia momo be dina daekau kahana dekena amo bona dina diho kahana dekena amo do idia mai, Aberahamo bona Isako bona Iakobo danu aniani totona do idia helai diho, Guba Basileia lalonai. 12 To Basileia ena taudia korikori be do idia negea lao murimuri dekenai mai dibura masemase danu, unuseni be do idia tai, edia isena do idia koria auka masemase.”

13 Vadaeni Iesu ese tuari lohia tauna ia hamaoroa, ia gwau, “Oi lao, oiemu abidadama hegeregerena do oi abia.”

Unai nega korikori lalonai unai lohia ena hesiai tauna ia namo.

Iesu ese Petero ena sinana ia hanamoa

14 Iesu ese Petero ena ruma dekenai ia daekau, unuseni Petero ena hahine ena sinana ia davaria, iena tauanina ia siahu, ia hekure mai gorere danu. 15 Iesu ese hahine ena imana ia dogoatao, vadaeni ena tauanina ena siahu ia ore. Vadaeni hahine be ia toreisi, iena hesiai gaukara ia karaia.

Iesu ese taunimanima momo ia hanamoa

16 Adorahi neganai mai lauma dika taudia momo herea Iesu dekenai idia hakaua lao. Vadaeni iena hereva tamona dekenai ia ese inai lauma dikadia ia lulua lao, bona gorere taudia idauidau ibounai danu ia hanamoa. 17 Unai dekena amo Isaia, peroveta tauna, ese ia gwauraia herevana ia momokani vadaeni. Ia gwau: “Ia ese iseda hisihisi ia kokia, bona iseda gorere ia hanamoa.”

Iesu ena murinai idia raka gwauraia taudia

18 Iesu ese taunimanima momo ia itaia, ia dekenai idia gini hagegea. Vadaeni iena diba tahua taudia dekenai ia hereva, ia gwau, “Do ita hanaia lao gohu kahana dekenai.” 19 Vadaeni taravatu hadibaia tauna ta ia raka kahirakahira lao, ia hamaoroa, ia gwau, “Hadibaia tauna e, do oi lao gabu ibounai dekenai lau danu ita lao.”

20 Iesu ia haere, ia gwau, “Uda sisia be mai edia nadi matuna, bona ataiai manudia danu mai edia ruma, to Taunimanima ena Natuna be mai ena mahuta gabuna lasi.”

21 Ena diba tahua tauna ta danu ia hereva Iesu dekenai, ia gwau, “Lohiabada e, namona be egu tamana do lau guria guna.”

22 Iesu ia gwau, “Lauegu murinai oi raka, mase taudia ese edia mase taudia do idia guria.”

Iesu ese hurehure ia hadokoa

23 Iesu be vanagi ta dekenai ia guia, bona iena diba tahua taudia ia danu idia lao. 24 Gohu dekenai lai badana bona medu badana ia ginidae, vadaeni hurehure ese vanagi ia koua. To Iesu be ia mahuta. 25 Vadaeni idia lao, idia hanogaia, idia gwau, “Lohiabada e, oi hamauria ai! Ita mase inai!”

26 Iesu ese ia gwau henidia, ia gwau, “Dahaka dainai umui gari, abidadama maragimaragi taudia?” Vadaeni ia toreisi, lai bona hurehure dekenai ia hereva goada. Vadaeni lai ia doko, bona hurehure idia diho, ia ore momokani.

27 Vadaeni idia be idia hoa, idia gwau, “Inai tau be edena bamona? Be, lai bona hurehure ese iena hereva idia kamonai noho!”

Iesu ese lauma dikadia ia lulua tau rua dekena amo

28 Gohu unai kahana dekenai Gadara tano dekenai idia ginidae. Vadaeni mai lauma dika taudia rua be Iesu danu idia hedavari, idia be mase guria gabuna dekena amo idia mai, bona idia dagedage bada. Unai dainai taunimanima be unai dala dekena amo do idia raka hanaia diba lasi. 29 Idia ruaosi be idia boiboi bada, idia gwau, “Dirava ena Natuna e, ai dekenai be dahaka do oi karaia? Aiemai nega be dohore, ai dekenai hisihisi henia totona oi mai vadaeni, a?”

30 Unai gabu dekenai, sisina daudau dekenai, boroma orea badana ta tano dekenai idia aniani noho. 31 Vadaeni lauma dikadia ese idia noia, idia gwau, “Bema oi lulua ai, be mani unai boroma edia lalonai oi siaia ai.”

32 Vadaeni Iesu ese idia ia hamaoroa, ia gwau, “Umui lao.” Unai dainai, idia lao murimuri dekenai, boroma edia lalona dekenai idia vareai, vadaeni boroma orea ibounai be ororo dekena amo idia heau diho gohu dekenai, unuseni idia mase ranu lalonai.

33 Boroma naria taudia be idia heau, hanua dekenai idia vareai, lauma dikadia ese idia abia taudia edia sivarai ibounai idia gwauraia hedinarai. 34 Unai dainai hanua taudia ibounai idia lao, Iesu danu idia hedavari. Idia noia, edia tano dekena amo do ia raka siri.

Copyright information for `HMO