Proverbs 6

Kavakava kara garina sisiba hereva

Egu natuna tau e, oi ese oi gwauhamata vadaeni,
tau ta ena abiatorehai davana do oi karaia, a?
Oi ese oi hereva kava dainai,
gwauhamata ta oi gwauraia, bona inai gwauhamata be oi dekenai tarapu ta,
oiemu uduna ena hereva ese,
hekwakwanai gauna oi dekenai ia havaraia, a?
Inai bamona oi karaia neganai,
oi be unai tau ena siahu henunai.
To inai tarapu dekena amo,
do oi heau mauri dalana be inai:
Unai tau dekenai do oi lao haraga,
bona do oi noia, oiemu gwauhamata dekena amo oi do ia ruhaia.
Do oi mahuta lasi,
bona do oi hekure diho lasi.
Unai tarapu dekena amo do oi roho mauri,
manu ta o dia ta ese labana tauna,
dekena amo ia roho mauri bamona.

Lahedo taudia dekenai sisiba hereva

Lahedo taudia ese,
dimairi edia kara bamona do idia karaia be namo.
Dimairi be mai edia king lasi,
mai edia lohia ta lasi,
bona mai edia biaguna lasi.
To medu lasi neganai edia aniani idia haboua,
bona medu ena nega totona idia hegaegae noho.
Lahedo tauna e,
oi hekure kava ela bona edena negai?
Edena negai mahuta dekena amo do oi noga?
10 Oi gwau, “Lau be laga-ani totona,
nega sisina sibona do lau hekure.
Lauegu imana do lau lokua, do lau laga-ani sisina.”
11 To oi mahuta neganai,
ogogami ese oi dekenai do ia ginidae,
dadidadi tauna bamona.

Kerere idia havaraia taudia

12 Kara kava taudia, kara dika taudia,
be idia raka lao,
hereva koikoi idia gwauraia loaloa noho.
13 Edia matana dekena amo toa idia karaia noho.
Edia aena bona edia imadia kwakikwakidia,
dekena amo danu toa idia karaia noho.
14 Edia laloa koikoi dekena amo,
kara dika karaia daladia danu idia tahua noho,
bona kerere, mai heai danu idia havaraia noho.
15 Unai dainai dika bada ese,
idia dekenai do ia vara haraga,
bona do ia hadikadia ore,
ta do ia mauri lasi.

Lohiabada ia ura lasi gaudia

16 Lohiabada ia ura lasi gaudia 7 be inai:
17 Hekokoroku ena toana.
Uduna mai ena koikoi.
Kerere lasi taudia alaia karana.
18 Kara dika karaia totona laloa idia karaia taudia.
Kara dika karaia totona idia haraga momo taudia.
19 Uitnesi koikoi tauna.
Iena turana edia huanai, kerere ia havaraia tauna.

Heudahanai do oi karaia lasi

20 Egu natuna tau e,
oiemu tamana ena oda hereva do oi kamonai henia,
bona oiemu sinana ena hadibaia hereva,
be do oi rakatania lasi.
21 Nega ibounai edia hereva do oi dogoatao noho.
Oiemu kudouna dekenai do oi kwatudia.
22 Oi raka loaloa neganai,
inai edia hereva ese oi do idia hakaua.
Do oi hekure neganai,
edia sisiba ese oi do idia naria.
Oi noga neganai,
idia ese oi dekenai do idia hereva henia.
23 Badina edia oda be lamepa bamona,
bona edia hadibaia hereva be diari,
bona edia matakani be mauri dalana.
24 Io, oiemu tamana bona sinana edia sisiba herevadia ese,
hahine dikana dekena amo oi do idia hamauria,
bona ariara hahine edia hereva koikoi dekena amo danu.
25 Unai bamona hahine edia hairai do oi ura henia lasi,
bona do oi naria namonamo,
edia matadia dekena amo oi do idia koia garina.
26 Badina be ariara hahine dainai,
tau ta be ogogami tauna do ia lao,
bona heudahanai hahine dainai,
tau ta ese iena mauri do ia haboioa.
27 Tau ta ese lahi ena gida,
be iena kemena dekenai do ia abia loaloa, a?
Iena dabua do idia gabua lasi, a?
28 Tau ta ese lahi ena gida,
edia latanai do ia raka, a?
Iena aena do idia gabua lasi, a?
29 Tau ma ta ena adavana ia sihari henia tauna,
danu be unai bamona.
Ia ese unai hahine ia abia dainai,
iena kerere davana do ia davaria momokani.

30 Hitolo dainai tau ta ese aniani ia henaoa neganai,
taunimanima ese unai tau idia gwauraia dika momokani lasi.
31 To bema idia davaria neganai,
unai henaoa tauna ese ia henaoa gauna,
ena davana nega 7 do ia henia lou.
Iena ruma ena kohu ibounai do ia henia haorea.
32 Ia heudahanai noho tauna be mai ena aonega lasi.
Ia ese sibona ena mauri ia hadikaia ore noho.
33 Bero bona hemarai do ia davaria,
bona iena hemarai be do ia noho hanaihanai,
doko lasi.
34 Badina be mama ese,
tau ta ena lalona ia habadua momokani,
bona ia ese davana do ia henia neganai,
ia be do ia bogahisihisi henia diba lasi.
35 Moni davana do ia abia dae lasi,
bona harihari gaudia momo dekena amo,
iena badu do oi hakerua diba lasi.
Copyright information for `HMO