Psalms 136

Dirava tanikiu henia ane ta

Lohiabada do ita tanikiu henia,
badina ia be namo.
Iena lalokau bona bogahisihisi do idia noho hanaihanai.
Ia be dirava ibounai ia hereaia Diravana,
bona do ita tanikiu henia.
Iena lalokau bona bogahisihisi do idia noho hanaihanai.
Ia be lohia ibounai ia hereaia Lohiana,
bona do ita tanikiu henia.
Iena lalokau bona bogahisihisi do idia noho hanaihanai.
Lohiabada sibona ese hoa kara badadia ia karaia noho.
Iena lalokau bona bogahisihisi do idia noho hanaihanai.
Iena aonega dekena amo guba ia karaia.
Iena lalokau bona bogahisihisi do idia noho hanaihanai.
Ia ese tanobada be davara ena latanai ia haginia.
Iena lalokau bona bogahisihisi do idia noho hanaihanai.
Dina, hua bona hisiu, be ia ese ia karaia.
Iena lalokau bona bogahisihisi do idia noho hanaihanai.
Dina ena diari ese dina ia biagua noho.
Iena lalokau bona bogahisihisi do idia noho hanaihanai.
Hua bona hisiu ese hanuaboi idia biagua noho.
Iena lalokau bona bogahisihisi do idia noho hanaihanai.

10 Aigupito dekenai vara guna natudia ia alaia mase Diravana,
be do ita tanikiu henia,
Iena lalokau bona bogahisihisi do idia noho hanaihanai.
11 Ia ese Aigupito dekena amo Israela taudia ia hakaua mai.
Iena lalokau bona bogahisihisi do idia noho hanaihanai.
12 Iena imana mai ena goada, bona mai ena siahu bada dekena amo.
Iena lalokau bona bogahisihisi do idia noho hanaihanai.

13 Ia ese Davara Kakakaka ia hapararaia.
Iena lalokau bona bogahisihisi do idia noho hanaihanai.
14 Ia ese davara ena huanai iena bese taudia ia hakaudia mauri.
Iena lalokau bona bogahisihisi do idia noho hanaihanai.
15 To ia ese Aigupito ena king bona iena tuari orea,
be Davara Kakakaka dekenai ia aladia mase.
Iena lalokau bona bogahisihisi do idia noho hanaihanai.

16 Lohiabada ese iena bese taudia,
tano kaukau dekenai ia hakaudia hanaia.
Iena lalokau bona bogahisihisi do idia noho hanaihanai.
17 Ia ese, mai edia siahu bada king taudia ia alaia mase.
Iena lalokau bona bogahisihisi do idia noho hanaihanai.
18 Ia ese mai edia sivarai badadia king taudia ia alaia mase.
Iena lalokau bona bogahisihisi do idia noho hanaihanai.
19 Sihona, Amoro taudia edia king.
Iena lalokau bona bogahisihisi do idia noho hanaihanai.
20 Oga, Basana taudia edia king.
Iena lalokau bona bogahisihisi do idia noho hanaihanai.
21 Edia tano be iena bese taudia dekenai ia henia.
Iena lalokau bona bogahisihisi do idia noho hanaihanai.
22 Inai tano be Israela, iena hesiai tauna dekenai ia henia.
Iena lalokau bona bogahisihisi do idia noho hanaihanai.
23 Tuari ita lusi neganai Lohiabada ese ita ia laloaboio lasi.
Iena lalokau bona bogahisihisi do idia noho hanaihanai.
24 Ita idia hadikaia gwauraia taudia dekena amo,
Dirava ese ita ia hamauria.
Iena lalokau bona bogahisihisi do idia noho hanaihanai.
25 Ia ese mauri gaudia ibounai dekenai aniani ia henia noho.
Iena lalokau bona bogahisihisi do idia noho hanaihanai.

26 Guba ena Dirava do ita tanikiu henia be namo.
Iena lalokau bona bogahisihisi do idia noho hanaihanai.
Copyright information for `HMO