Psalms 142

Davida ese durua totona Lohiabada ia noia

Durua totona lau ese Lohiabada dekenai lau boiboi.
Ia dekenai lau noinoi goada,
lau do ia durua totona.
Egu lalohisihisi bona hekwarahi gaudia,
be iena vairana dekenai lau gwauraia noho.

Egu lalona ia metau momokani,
bona lau laloa be dika do lau davaria neganai,
Lohiabada be ia diba edena kara ese egu dala do ia hanamoa.
Lau raka noho dalana dekenai,
lau idia hadikaia gwauraia taudia ese tarapu idia hunia vadaeni.
Lau dekenai durua totona tauna ta lau tahua,
to egu durua tauna ta lau davaria lasi.
Lau do ia gimaia tauna ta be lasi,
bona tau ta ese egu mauri ia laloa lasi.

Lohiabada e, oi dekenai lau tai henia noho.
Lau gwau,
“Lohiabada e, oi sibona ese lau oi naria noho.
Egu mauri dinadia ibounai lalonai,
lau ura oi sibona lau dekenai do oi noho.
Egu noinoi mani do oi kamonai,
badina be egu lalona ia hisihisi,
ia dika momokani, mai gari danu.
Lau idia lulua noho taudia dekena amo lau do oi hamauria,
badina idia edia goada ese,
egu goada idia hereaia momokani.
Lohiabada e,
egu dibura ruma dekena amo lau do oi kokia ruhaia.
Unai neganai oiemu bese taudia edia hebou lalonai,
lau ese oiemu ladana do lau hanamoa,
oiemu kara namo lau dekenai dainai.”
Copyright information for `HMO