Psalms 149

Dirava hanamoa ane ta

Lohiabada do umui hanamoa!

Lohiabada dekenai ane matamatana do umui abia.
Lohiabada idia abidadama henia taudia edia hebou dekenai,
ia do umui hanamoa.

Israela taudia ese, idia ia karaia Diravana do idia moalelaia.
Siona taudia ese edia King do idia moalelaia be namo.
Iena ladana do idia hanamoa mai edia mavaru danu.
Tareko bona gita ena regena dekena amo,
Lohiabada do idia hanamoa,
badina be Lohiabada ese,
iena bese taudia ia moalelaia noho momokani.
Ia ese manau taudia dekenai kwalimu ia henia noho.
Dirava ena taudia ese,
edia kwalimu dainai do idia moale noho be namo.
Hanuaboi ena hora ibounai lalonai,
ane do idia abia be namo.

Namona be mai boiboi bada danu Dirava do idia hanamoa.
Bona matadia rua tuari kaia,
be edia imadia dekenai do idia dogoatao noho,
idia ese bese idauidau do idia halusia totona,
ma bese idauidau taudia do idia matakani henia totona.
Unai bese king taudia be auri dekena amo do idia guia,
bona edia lohia taudia be auri seini dekena amo do idia guia.
Io, iena bese taudia dekena amo,
Dirava ese ia gwauraia vadaeni kerere davana,
be unai bese idauidau dekenai do ia henia.
Dirava idia abidadama henia taudia ibounai,
be inai bamona do idia kwalimu.

Lohiabada do umui hanamoa!
Copyright information for `HMO