Psalms 17

Kerere lasi tauna ia guriguri

Lohiabada e,
kota maoromaoro totona lau noinoi inai,
mani lau dekenai do oi kamonai.
Oiemu durua totona lau noinoi noho,
egu taitai mani do oi kamonai,
badina inai guriguri lau gwauraia,
mai egu laloa maoromaoro bona momokani.
Oi ese egu kota dekenai,
kwalimu lau dekenai do oi henia,
badina oiemu laloa bona oiemu kara,
be nega ibounai ia maoromaoro.
Oi ese egu kudouna oi diba.
Oi ese hanuaboi neganai,
lau dekenai oi vadivadi henia.
Oi ese egu lalona oi tahua namonamo vadaeni,
bona ura dikana ta,
be lau dekenai oi davaria lasi.
Taunimanima haida ese,
hereva dika idia gwauraia noho,
to lau be lasi momokani.
Lau ese oiemu oda hereva,
be lau kamonai henia vadaeni,
bona dagedage taudia edia kara lau karaia lasi.
Lau be nega ibounai,
oiemu dala dekenai lau raka,
bona nega ta inai dala dekena amo,
lau raka siri lasi.

Dirava e,
oi dekenai lau guriguri noho,
badina oi ese lau dekenai oi haere noho.
Unai dainai egu hereva mani do oi kamonai.
Oiemu lalokau momokani,
mani do oi hedinaraia,
bona ai do oi hamauria.
Bema oi be ai dekenai oi noho,
ai dekenai idia tuari henia taudia ese,
ai do idia hadikaia diba lasi.
Lohiabada e, lau do oi gimaia,
oiemu matana oi gimaia noho bamona.
Oiemu hanina edia henunai lau do oi hunia.
Tau dikadia edia tuari,
dekena amo lau do oi gimaia.
Lau idia hamasea gwauraia taudia,
ese lau idia hagegea noho.
10 Idia be mai edia bogahisihisi lasi,
bona mai hekokoroku danu idia hereva noho.
11 Idia ese lau idia lulua vadaeni,
bona hari lau idia hagegea noho.
Idia ese lau idia itaia noho,
tano dekenai lau do idia veria diho totona.
12 Idia be laiona idia hitolo bamona,
idia naria noho,
lau do idia darea parara totona.
13 Lohiabada e, oi mai,
lau idia hadikaia gwauraia taudia do oi koua.
Oi ese idia do oi halusia!
Oiemu tuari kaia dekena amo,
unai tau dikadia dekena amo,
lau do oi hamauria.
14 Lohiabada e, oiemu imana dekena amo,
unai taudia do oi koua,
bona lau do oi hamauria.
Badina inai taudia edia ura gaudia,
bona edia ahuna danu,
be inai tanobada sibona dekenai idia tahua noho.
Oiemu kohu momo dekena amo,
unai taudia oi hahonudia vadaeni.
Unai dainai idia edia natudia tau be momo herea,
bona idia mase neganai,
edia natudia be do mai edia kohu momo danu.

15 To lau be kara maoromaoro lau karaia dainai,
lau ese oiemu vairana do lau itaia,
bona do lau noga neganai,
oiemu toana do lau itaia dainai,
do lau moale momokani.
Copyright information for `HMO