Psalms 24

Dirava be King Badana

Tanobada bona ia lalonai noho gaudia ibounai,
be Lohiabada ena.
Tanobada bona ia lalonai noho taunimanima,
ibounai be Lohiabada ena.
Badina be ia sibona ese tanobada ia haginia,
tano henunai ia noho ranu dobudia edia latanai.
Ia ese tanobada ena badina,
be davara ena dobu gabudia dekenai ia atoa.

Daika ese Lohiabada ena ororo,
dekenai do ia daekau lao?
Daika ese iena gabu helagana lalonai do ia gini?
Kara goevagoeva,
bona laloa goevagoeva taudia sibona ese.
Dirava koikoi idia tomadiho henia lasi,
bona idia gwauhamata koikoi lasi taudia ese.
Lohiabada ese,
unai bamona taudia do ia hanamoa bona hamauria,
Lohiabada ese idia do ia gwauraia,
idia be kerere lasi.
Unai bamona taudia ese Dirava idia tahua noho,
idia ura Iakobo ena Dirava ena vairanai idia gini.

Ikoukou do umui kehoa namonamo,
bona idaunegai iduara danu do umui kehoa.
Vadaeni King Badana do ia raka vareai.
Inai King Badana be daika?
Ia be Lohiabada, mai ena goada,
bona mai ena siahu danu.
Ia be Lohiabada,
tuari dekenai ia kwalimu noho.
Ikoukou do umui kehoa namonamo,
bona idaunegai iduara danu do umui kehoa bada,
vadaeni King Badana be do ia raka vareai.
10 Inai King Badana be daika?
Siahu Ibounai Lohiabada,
ia be King Badana momokani.
Copyright information for `HMO