Psalms 30

Davida ese Lohiabada ia tanikiu henia

Lohiabada e,
oi ese lau oi hamauria dainai lau tanikiu henia.
Oi ese lau oi durua dainai,
lau idia tuari henia taudia,
ese lau idia kirikirilaia lasi.
Lohiabada, egu Dirava e,
durua totona oi dekenai lau tai henia,
bona oi ese lau oi hanamoa.
Oi ese guria gabuna dekena amo lau oi veria mauri.
Lau be mase taudia edia gabu, kahirakahira lau ginidae,
to oi ese lau oi hamauria lou.

Lohiabada ena vairanai umui kara maoromaoro taudia e,
Lohiabada dekenai ane do umui abia.
Iena ladana helagana do umui hanamoa.
Badina iena badu be ia ore haraga,
to iena hanamoa be do ia noho,
ela bona mauri ena dokona.
Taitai be sedira hanuaboi ena hora ibounai do ia noho,
to dabai be moale ma do ia vara lou.

Lauegu noho be namo neganai lau hereva, lau gwau,
“Lau be nega ta do lau moru diba lasi.”
Lohiabada e, oi ese lau oi hanamoa neganai,
lau gini goada noho,
ororo aukana bamona.
To oi ese,
lau dekena amo oiemu vairana oi hunia neganai,
lau be lau gari bada herea.

Lohiabada e,
lau ese oi dekenai lau tai henia.
Durua totona oi dekenai lau noinoi, lau gwau,
“Mase gabuna dekenai bema lau lao,
egu mase ena namo be dahaka?
Tano ena kahu ese oi Lohiabada do ia hanamoa diba, a?
Tano ena kahu ese,
oiemu kara namona do ia gwauraia diba, a?
10 Lohiabada e, oi kamonai,
bona lau dekenai do oi bogahisihisi henia!
Lohiabada e, lau do oi durua!”

11 Lohiabada e, oi ese egu lalohisihisi oi hadokoa vadaeni,
bona mavaru mai moale danu dekenai oi halaoa vadaeni.
Egu laloa metau oi kokia,
bona moale bada be iena gabu dekenai oi atoa vadaeni.
12 Unai dainai egu lauma ese,
oi do ia hanamoa noho,
egu uduna do lau hakapua lasi.
Badina Lohiabada e, oi be egu Dirava,
bona lau ese oi do lau tanikiu henia noho, ela bona hanaihanai.
Copyright information for `HMO