Psalms 33

Dirava hanamoa ane

Kara namo taudia e,
Lohiabada ena vairanai do umui moale bada.
Dirava idia kamonai henia taudia ese,
ia dekenai idia hanamoa be namo.
Iukelele miusiki dekenai Lohiabada do umui tanikiu henia,
bona ia do umui hanamoa, gita badana,
varo 10 gauna dekena amo.
Ane matamata, Lohiabada hanamoa totona do umui abia.
Gita do umui gadaralaia namonamo,
miusiki namo herea do umui karaia,
bona ane do umui abia mai goada danu.
Badina be Lohiabada ena hereva be maoromaoro.
Iena gaukara ibounai danu,
be mai edia momokani danu.
Lohiabada ese kara maoromaoro,
bona kota maorona ia ura henia noho.
Lohiabada ena bogahisihisi be tanobada kahana ibounai dekenai.

Lohiabada ese iena hereva dekena amo guba ia karaia.
Dina, hua bona hisiu,
be iena uduna ena hereva dekena amo ia karaia.
Lohiabada ese davara ena ranu,
ia haboua gabu tamona dekenai,
hegeregere tau ta ese hodu tamona,
be ranu dekenai ia hahonua bamona.
Lohiabada ese davara badana ia naria,
vadaeni iena gabu korikori dekenai ia noho.
Tanobada taudia ibounai be Lohiabada dekenai idia gari be namo.
Tanobada dekenai noho taudia ibounai ese,
Lohiabada idia matauraia be namo.
Badina be ia hereva sibona,
vadaeni inai tanobada ia vara.
Ia ese ia oda,
vadaeni gau ibounai idia hedinarai.
10 Lohiabada ese bese idauidau taudia edia palani ia koua.
Ia ese idia karaia gwauraia gaudia ia hadokoa.
11 Lohiabada ena palani,
be do ia gini goada hanaihanai,
bona ia karaia gwauraia gaudia,
be hanaihanai do idia noho.

12 Bema bese ta ena Dirava be Lohiabada neganai,
unai bese be do ia namo.
Lohiabada ese ia abia hidi,
iena bese korikori do idia lao taudia be do idia moale!
13 Lohiabada ese guba dekena amo iena matana ia negea,
taunimanima ibounai ia itaia noho.
14 Iena terona dekenai ia helai gabuna dekena amo,
Lohiabada ese iena matana ia negea,
tanobada taudia ibounai ia itaia noho.
15 Ia ese idia ibounai edia laloa ia havaraia,
bona edia kara ibounai ia diba.
16 King be iena tuari taudia momo dainai ia kwalimu, a?
Lasi.
Tuari tauna be iena goada sibona dainai ia kwalimu, a?
Lasi.
17 Tuari hosi ese tuari ena kwalimu do idia havaraia lasi.
Edia goada badana ese taunimanima idia hamauria diba lasi.
18 To Lohiabada ese ia dekenai idia gari taudia ia itaia noho.
Bona Lohiabada ena bogahisihisi idia abidadama henia taudia,
be ia ese ia naridia noho.
19 Ia ese mase dekena amo ia hamauridia noho,
bona hitolo bada neganai,
Lohiabada ese idia dekenai mauri ia henia noho.

20 Ita ese Lohiabada ena durua ita naria noho.
Ia be iseda durua Tauna bona iseda kesi.
21 Lohiabada ena ladana dainai ita moale noho.
Iena ladana helagana dekenai ita abidadama henia.
22 Lohiabada e,
mani emu kara oiemu bogahisihisi,
be nega ibounai ai dekenai ia noho,
badina ai ese oi dekenai ai naria,
bona oi dekenai ai abidadama henia noho.
Copyright information for `HMO