Psalms 37

Tau namodia bona tau dikadia dekenai dahaka do ia vara?

Do umui laloa hekwarahi lasi kara dika taudia dainai.
Kara kerere taudia dainai do umui mama lasi.
Badina be nega daudau lasi lalonai,
tau dikadia be do idia dika,
rei kaukau ia dika bamona,
bona au edia raurau idia kakoro bamona.

Lohiabada dekenai do oi abidadama,
bona kara namo do oi karaia,
vadaeni tano dekenai do oi noho namo,
mai maino danu.
Oiemu moale be Lohiabada dekena amo do oi tahua,
vadaeni ia ese,
oi ura henia gaudia oi dekenai do ia henia.

Oiemu mauri be Lohiabada ena imana dekenai do oi atoa.
Ia dekenai do oi abidadama,
vadaeni ia ese oi do ia durua.
Oiemu kara namona be Lohiabada ese do ia hedinaraia,
dina ena diari bamona.
Ia ese oiemu kara maoromaoro,
be taunimanima edia vairanai do ia hedinaraia,
dina tubua bamona.

Lohiabada ena vairanai do oi laga-ani.
Iena vairanai do oi helai,
oi naria ela bona ia ese oi do ia durua.
Edia gaukara dekena amo, kohu momo idia davaria taudia,
be idia dainai do oi mama lasi.
Ma palani dikadia idia karaia,
bona unai palani ena anina idia davaria taudia,
idia totona do oi laloa hekwarahi lasi.

Do oi badu lasi, do oi dagedage lasi.
Do oi laloa hekwarahi o laloa badu lasi,
badina unai bamona laloa ese kara dika ia havaraia noho.
Badina kara dika taudia be,
dika momokani do idia davaria,
to Lohiabada idia abidadama henia taudia ese,
edia tano dekenai do idia noho, mai namo danu.
10 Nega daudau lasi lalonai kara dika taudia do idia ore.
Edia gabu do umui tahua,
to do umui davaria lasi.
11 To manau taudia ese noho gabuna tano do idia abia,
do idia helai namonamo, mai moale bona mai maino danu.

12 Kara dika taudia ese,
kara maoromaoro taudia hadikaia daladia idia laloa noho,
bona idia badu henidia dainai,
edia isena idia koria auka masemase.
13 To Lohiabada ese,
kara dika taudia ia kirikirilaia noho,
badina ia diba, dina do ia ginidae,
idia be do idia lusi momokani.

14 Kara dika taudia ese edia tuari kaia idia veria,
bona edia peva danu idia veria noho,
ogogami taudia bona gau lasi taudia do idia pidia totona,
bona kara maoromaoro taudia alaia mase totona.
15 To edia tuari kaia be,
idia sibona edia kudouna dekenai do idia gwadaia,
bona edia peva be do idia makohia.

16 Kara maoromaoro tauna be sedira ia be ogogami,
to unai ogogami ese,
kara dika taudia momo edia kohu bada ia hereaia noho.
17 Badina be kara dika taudia edia siahu,
be Lohiabada ese do ia haorea,
bona Lohiabada ese,
kara maoromaoro taudia do ia durua momokani.

18 Lohiabada ese mai edia kerere lasi taudia ia naria noho,
bona Dirava ese idia dekenai ia henia gau namodia,
be do idia dogoatao ela bona hanaihanai.
19 Nega dika neganai,
unai bamona taudia be do idia lalohisihisi lasi,
bona hitolo bada neganai,
idia be mai edia aniani hegeregere.

20 To kara dika taudia be do idia mase ore.
Lohiabada dekenai idia dagedage henia taudia,
be do idia kwalimu lasi.
Idia be rei gabudia dekenai idia noho herahera bamona.
Do idia boio haraga,
kwalahu ia boio haraga bamona.

21 Kara dika taudia ese idia abiatorehai,
to idia henia lou lasi.
To kara maoromaoro taudia be,
mai hariharibada danu, durua bona moni idia henia.
22 Badina be Lohiabada ese ia hanamoa taudia ese,
tano dekenai do idia noho,
mai noho namo danu.
To Lohiabada ese ia hadikaia taudia,
be dika momokani do idia davaria.

23 Tau namona ena raka dalana,
be Lohiabada ese ia hakaua noho,
bona unai tau ena kara ia ura henia dainai,
Lohiabada ese do ia naria noho.
24 Unai tau be do ia moru,
to do ia diho momokani lasi,
badina be Lohiabada ese,
iena imana dekena amo do ia haginia lou.

25 Gunaguna lau be mero,
harihari lau be buruka,
to nega ta kara maoromaoro tauna ta be Dirava ese ia rakatania, a?
Lasi momokani, nega ta lau itaia lasi.
Bona tau namona ena natuna be nega ta idia hitolo, a?
O iena natuna ese aniani totona taunimanima idia noia, a?
Lasi, nega ta lau itaia lasi.
Lasi momokani.
26 Kara maoromaoro taudia ese,
nega ibounai haida dekenai idia bogahisihisi,
bona idia heniatorehai,
bona edia natudia ese Dirava ena hanamoa idia davaria.

27 Kara dika do oi rakatania,
kara namo do oi karaia,
vadaeni tano dekenai do oi noho namo hanaihanai.
28 Badina be Lohiabada ese,
kara maoromaoro ia ura henia noho.
Iena abidadama taudia,
be ia ese do ia rakatania lasi.
Kara maoromaoro taudia be,
Lohiabada ese do ia naridia namonamo ela bona hanaihanai,
to kara dika taudia edia natudia ese,
dika do idia davaria.
29 Kara maoromaoro taudia ese,
Dirava ia henidia tano dekenai do idia noho ela bona hanaihanai.

30 Kara maoromaoro tauna be mai ena diba,
bona iena hereva be mai aonega danu.
Mai maoromaoro bona momokani danu do ia hereva.
31 Iena Dirava ena taravatu,
be iena kudouna lalonai ia dogoatao noho,
bona ia ese Lohiabada ena taravatu ia rakatania lasi momokani.
32 Kara dika tauna ese,
kara maoromaoro tauna ia itaia noho,
bona ia alaia totona dala ia tahua noho.
33 To Lohiabada ese kara namo tauna do ia rakatania lasi,
vadaeni tau dikana ena siahu henunai do ia noho lasi.
Bona Lohiabada ese kara maoromaoro tauna do ia durua,
vadaeni kota dekenai idia samania neganai,
dika do ia davaria lasi.

34 Lohiabada dekenai do oi naria,
iena dala dekenai do oi raka.
Unai neganai ia ese oi dekenai ia henia tano,
be do oi dogoatao diba,
bona Lohiabada ese tau dikadia do ia hadikaia ore neganai,
oi ese inai kara do oi itaia.

35 Kara dika tauna ta lau itaia vadaeni,
iena noho be namo herea.
Ia be ia tubu badabada,
Lebanona ena sida audia bamona.
36 To gabeai lau raka hanaia,
unai tau be ia noho lasi.
Lau tahua, to lau davaria lasi.

37 Mai ena kerere lasi tauna do oi laloa.
Kara maoromaoro tauna do oi itaia noho.
Unai bamona tauna be mai maino danu do ia noho,
bona ia ese natuna bona tubuna do ia abia.
38 To kara dika tauna,
be Lohiabada ese do ia hadikaia ore.
Kara dika taudia edia natudia bona tubudia,
ese dika do idia davaria.

39 Kara maoromaoro taudia,
be Lohiabada ese do ia hamauria,
vadaeni hekwarahi o nega dika neganai,
Lohiabada dekenai idia lao diba,
badina ia be edia mauri davaria gabuna.
40 Lohiabada ese tau namodia ia durua noho,
bona idia ia veria mauri noho.
Lohiabada ese tau dikadia dekena amo tau namodia ia hamauria noho,
badina idia ese Lohiabada dekenai idia abidadama henia noho.
Copyright information for `HMO