Psalms 4

Adorahi guriguri, Davida ena

Egu Dirava e, oiemu kara be maoromaoro.
Oi dekenai lau boiboi neganai,
lau dekenai oi haere vadaeni.
Dika ese lau ia hadikaia vadaeni neganai,
oi ese lau oi durua.
Hari danu lau dekenai do oi bogahisihisi henia,
egu noinoi mani do oi kamonai.

Taunimanima e, egu ladana namona,
be do umui hadikaia noho ela bona edena negai?
Hereva kavakava do umui ura henia,
bona hereva koikoi do umui tahua noho,
ela bona edena negai?

Do umui laloa,
Lohiabada ese kara maoromaoro taudia,
be ia abia hidi vadaeni, iena.
Bona lau ese lau boiboi henia neganai,
ia ese lau dekenai ia kamonai henia.

Emui badu ia toreisi neganai,
do umui kara dika lasi.
Emui mahuta gabunai umui noho neganai,
emui lalona do umui tahua,
bona badu ena laloa do umui koua.
Boubou maorodia Lohiabada dekenai do umui henia,
bona Lohiabada do umui abidadama henia.

Taunimanima momo ese inai bamona idia guriguri noho:
“Lohiabada e, daika ese ai do ia hanamoa diba?
Oiemu vairana ena diari,
be mani ai dekenai do oi hedinaraia.”
To oi ese moale bada,
be lau dekenai oi henia vadaeni,
bona egu moale ese,
uiti bona uaina momo idia davaria taudia,
edia moale ia hereaia momokani.

Mai egu maino danu,
lau hekure bona lau mahuta noho.
Lohiabada e, oi sibona ese lau oi naria,
bona dika dekena amo lau oi gimaia noho.
Copyright information for `HMO