Psalms 48

Siona, Dirava ena hanua

Lohiabada be ia bada,
bona taunimanima ese ia do idia hanamoa bada be namo,
iseda Dirava ena hanua,
iena ororo helagana dekenai.
Siona, Dirava ena Ororo,
be ataiai bona mai ena hairaina danu.
King Badana ena hanua ese,
tanobada taunimanima ibounai ia hamoalea noho.
Dirava ese ia hedinaraia vadaeni,
ia dekenai noho taudia be do idia mauri,
Siona hanua ena kohoro lalonai.

King taudia haida idia haboua,
bona Siona Ororo tuari henia totona idia mai.
To idia ese Siona idia itaia neganai idia hoa bada,
idia gari bada,
bona idia heau boio.
Unuseni gari bada ese ia abidia,
hisihisi bada danu,
hahine ese kahirakahira natuna ia havaraia ena hisihisi bamona.
Lohiabada ese idia ia hadikaia ore,
lagatoi be lai guba bada ese ia hadikaia ore bamona.

Dirava ena kara sivaraina ita kamonai vadaeni hegeregerena,
be hari ita itaia vadaeni danu,
iseda Dirava ena hanua lalonai.
Siahu Ibounai Lohiabada ese inai hanua do ia naria.
Do ia gimaia ela bona hanaihanai.

Dirava e,
oiemu Dubu Helaga lalonai,
ai ese oiemu noho hanaihanai lalokauna ai laloa noho.
10 Dirava e,
tanobada kahana ibounai dekenai noho taunimanima ese,
oiemu ladana idia hanamoa noho.
Oiemu sivarai,
be gabu ibounai dekenai idia gwauraia loaloa noho.
Mai maoromaoro danu oi ese taunimanima oi biagua noho.
11 Siona dekenai noho taudia do idia moale!
Kota maoromaorona oi karaia noho.
Iuda ena hanua ibounai lalonai,
edia taunimanima be do idia moale bada!
12 Dirava ena taudia e,
Siona ena kahana ibounai do umui raka lao,
bona iena kohoro ibounai do umui duahia.
13 Siona ena magu do umui itaia,
bona iena ruma aukadia do umui itaia loaloa.
Vadaeni Siona ena namo,
be gabeai idia vara uru taudia do umui hamaoroa.
14 Inai Dirava be iseda Dirava ela bona hanaihanai.
Ia ese nega ibounai doko lasi ita do ia hakaua noho.
Copyright information for `HMO