Psalms 51

Iena kara dika do ia gwauatao totona, Davida ese Dirava ia noia

Dirava e,
mani oi bogahisihisi lau dekenai.
Oiemu lalokau badana dainai,
bona oiemu bogahisihisi bada herea dainai,
egu kara dika do oi kokia ore.
Egu dika mani do oi huria ore,
bona egu kerere dekena amo lau do oi hagoevaia.
Badina be egu kara dika be lau diba momokani.
Lauegu kerere be egu vairana dekenai ia noho nega ibounai.
Lau ese oi sibona dekenai lau kara dika vadaeni.
Lau be oiemu vairana dekenai kerere lau karaia.
Unai dainai oi ese lau oi kota henia be maoro,
bona oi ese egu dika ena davana oi henia danu be maoro.
Momokani, lau be kara dika lalonai lau vara,
bona kara dika lalonai egu sinana ese lau ia havaraia.
Oiemu ura be,
egu kudouna dekenai laloa maoromaoro bona momokani idia noho.
Unai dainai, mani emu kara,
lauegu lalona be oiemu aonega dekenai do oi hahonua.

Lauegu kara dika do oi kokia,
vadaeni do lau goeva.
Mani oi ese lau do oi huria,
vadaeni lau be kurokuro,
sinou ena kurokuro do lau hereaia.
Moale bona laloa namo,
lau dekenai mani do oi henia lou.
Momokani oi ese lau oi atoa diho vadaeni,
bona egu dika ena davana lau dekenai oi henia,
to hari lau ura moale do lau davaria lou.
Mani emu kara,
egu kara dika dekenai oiemu matana do oi hakapua,
bona egu kerere bada ibounai do oi kokia ore.

10 Dirava e,
lauegu kudouna lalonai laloa goevagoeva do oi havaraia,
bona lauma matamatana bona maoromaorona,
be egu lalona dekenai do oi atoa.
11 Oiemu vairana dekena amo lau do oi lulua lao lasi,
bona oiemu Lauma Helaga,
be lau dekena amo do oi kokia lasi.
12 Guna be lau moale bada,
oi ese lau oi hamauria dainai.
Harihari lau ura inai oiemu hamauria ena moale,
be lau dekenai do oi henia lou.
Bona ura namodia,
bona lauma namona,
lau dekenai do oi henia,
vadaeni oiemu hereva do lau kamonai henia.

13 Unai neganai lau ese,
oiemu dala be kerere taudia dekenai do lau hadibaia.
Bona kara dika taudia ese,
oi dekenai do idia giroa lou.
14 Dirava e,
oi be lau oi hamauria Diravana,
Rara bubua ena kerere,
dekena amo lau do oi hamauria.
Unai neganai lau ese ane momo do lau abia,
oiemu kara maoromaoro do lau gwauraia totona.
15 Lohiabada e,
oi ese lau do oi durua,
do lau hereva goada,
bona oiemu ladana do lau habadaia momokani.
16 Oi ese boubou karadia dekenai oi moale lasi.
Sedira boromakau do lau alaia,
boubou totona do lau gabua,
to oi be do oi moalelaia lasi.
17 Unai dainai Dirava e,
lau ese sibona do lau atoa diho,
bona oiemu vairana dekenai do lau manau.
Inai bamona kara be lauegu boubou gauna oi dekenai.
Lau diba momokani, Dirava e,
bema tau ta be iena kara dika dainai ia lalohisihisi momokani,
bona ia manau momokani neganai,
oi ese ia do oi negea diba lasi.

18 Dirava e,
Siona taudia dekenai do oi bogahisihisi,
bona oi ese idia do oi durua.
Ierusalema hanua ena magu do oi haginia lou.
19 Unai neganai oiemu taudia ese,
boubou gaudia korikori bona maoromaoro do idia henia,
bona do oi moalelaia momokani.
Lahi dekenai idia gabua bouboudia bona boromakau tau,
be oiemu boubou patana dekenai do ai atoa.
Copyright information for `HMO