Psalms 69

Davida ese Dirava dekenai ia noinoi, do ia durua totona

Dirava e, lau do oi veria mauri,
badina abata be ia daekau,
ia mai bona egu aiona dekenai.
Lau be lau diho lao kopukopu lalonai,
bona egu aena be gini gabuna ta lasi.
Lau be ranu dobu lalonai lau noho,
bona abata ese kahirakahira lau idia maloa.
Lau be lau tai dikadika,
bona egu gadona be ia kaukau noho.
Lauegu matana idia hisihisi bada,
oi dekenai lau tahua noho dainai.
Lau dekenai idia badu henia kava taudia be momo herea.
Edia namba be,
egu kwarana ena huina edia namba idia hanaia.
Lau idia dagedage henia taudia,
ese hereva koikoi dekenai lau idia hadikaia noho.
Inai taudia be goada herea,
bona idia ura lau idia alaia mase.
Lau ese idia dekena amo gau ta lau henaoa lasi,
to idia ese lau idia samania goada dainai,
lau ese egu gau korikori haida idia dekenai lau henia.
Dirava e, egu kara dika be oi dekena amo lau hunia diba lasi,
bona egu kavakava ibounai, be oi diba vadaeni.
Lohiabada e, oi be Siahu Ibounai Diravana.
Mani lau do oi durua,
vadaeni oi dekenai idia abidadama taudia,
be do idia hemarai lasi lau totona.
Israela ena Dirava e, lau do oi durua,
vadaeni kara dikana ta do lau karaia lasi.
Vadaeni tau dikadia ese, oi dekenai idia tomadiho taudia,
be do idia hadikaia lasi hereva dika dekena amo.
Lau ese oi lau badinaia dainai,
haida ese lau dekenai idia hereva dika,
bona hemarai ese egu vairana ia koua noho.
Lauegu tadikaka dekenai lau be idau tauna bamona,
bona egu famili dekenai,
lau be gabu daudau dekena amo lau mai tauna bamona.
Oiemu Dubu Helaga lau ura henia dikadika,
bona inai ura ese lahi bamona lau ia gabua noho,
bona haida ese oi dekenai idia hereva dika neganai,
inai hereva ese lau ia hadikaia noho.
10 Lau be lau aniani lasi,
oiemu vairana dekenai do lau manau totona,
to taunimanima be lau dekenai idia hereva dika noho.
11 Lau ese mase ena lalohisihisi dabua lau atoa,
to taunimanima ese lau idia kirikirilaia noho.
12 Hanua ena ariara dekenai idia haboua,
bona lau idia herevalaia dika noho.
Inua kekero taudia ese,
edia ane dekenai lau idia herevalaia noho.
13 To Lohiabada e,
lau be oi dekenai do lau guriguri noho.
Dirava e,
oiemu nega namona dekenai lau do oi haere henia.
Oiemu lalokau bona bogahisihisi bada dainai,
lau dekenai do oi haere,
badina be oi ese oi gwauhamata vadaeni lau do oi hamauria,
bona oi be oi koikoi diba lasi, lasi momokani.
14 Kopukopu dekena amo lau do oi veria mauri.
Lau idia dagedage henia taudia,
dekena amo lau do oi hamauria,
bona ranu dobu dekena amo danu.
15 Lau do oi durua,
abata ese lau do ia maloa lasi.
Lau do oi durua,
ranu dobu lalonai do lau mase lasi,
o guria gabuna dekenai do lau diho lasi.
16 Lohiabada e,
lau dekenai do oi haere,
badina be oiemu noho hanaihanai lalokauna be ia namo herea.
Oiemu bogahisihisi bada herea dainai, lau do oi durua.
17 Lau be oiemu hesiai tauna, unai dainai oiemu vairana,
be lau dekena amo do oi hunia lasi.
Lauegu hisihisi be bada herea,
unai dainai lau dekenai do oi haere haraga.
18 Lau kahirakahira do oi mai, bona lau do oi hamauria.
Lau dekenai idia dagedage taudia dekena amo lau do oi hamauria.

19 Oi diba vadaeni,
taunimanima ese lau dekenai idia hereva dika noho,
bona oi diba danu lauegu hemarai,
bona unai taudia edia hereva koikoi dekena amo,
idia ese egu ladana idia hadikaia noho.
Lau dekenai idia badu taudia ibounai be oi ese oi itaia noho.
20 Inai hereva dika ese egu kudouna idia makohia vadaeni,
bona durua ta be lasi dainai lauegu laloa ia ore.
Taunimanima edia bogahisihisi be lau tahua, to ta lasi.
Hereva namona lau do idia henia taudia lau tahua,
to ta lau davaria lasi.
21 Lau be hitolo neganai,
mase havaraia muramura lau dekenai idia henia.
Lau ranu mase neganai,
vinega sibona lau dekenai idia henia.

22 Vadaeni, gabeai aniani bada ena aria do idia karaia neganai,
lau ura inai aria ese idia do ia hadikaia ore.
Bona aria helagana idia karaia neganai,
lau ura inai kara ese,
idia do ia hamorua momokani.
23 Edia matana do oi hakepulua!
Edia doruna danu do oi hamanokaia hanaihanai.
24 Idia dekenai do oi badu!
Oiemu badu mai siahu danu idia edia latanai do oi hadihoa,
vadaeni dika do idia davaria.
25 Edia kamepa do oi hadikaia,
vadaeni edia palai rumadia lalonai,
tau ta do ia noho lasi.
26 Badina be oi ese oi panisia vadaeni tauna,
be idia ese ma idia dagedage henia noho.
Bona oi ese oi haberoa tauna,
be idia ese ma idia hisihisi henia noho.
27 Unai taudia edia kara dika do oi laloa boio lasi,
bona oiemu hamauria idia dekenai do oi henia lasi.
28 Edia ladana be mauri taudia edia buka,
dekena amo do oi kokia,
bona edia ladana be,
kara maoromaoro taudia edia ladana danu do oi haboua lasi.

29 Lau be mai hisihisi bada bona durua ta lasi,
unai dainai egu laloa ia ore.
Dirava e, lau ura oi ese lau do oi abia isi,
bona lau do oi hamauria.
30 Lau ese ane dekena amo Dirava do lau hanamoa.
Dirava ena ladana do lau habadaia,
bona ia do lau tanikiu henia.
31 Inai kara ese Lohiabada do ia hamoalea bada,
to boromakau boubouna ese Lohiabada do ia hamoalea maragi.
Boromakau tau mai ena doana bona mai ena aena,
unai boubou ese Lohiabada do ia hamoalea sisina sibona.
32 Inai kara be ogogami taudia do idia itaia neganai,
do idia moale.
Dirava ena dala idia tahua noho taudia ibounai ese,
goada matamata do idia davaria.
33 Badina be Lohiabada ese,
gau lasi taudia edia noinoi ia kamonai henia noho,
bona dibura ruma lalonai idia noho taudia,
be ia laloaboio lasi.

34 Guba bona tanobada e, Lohiabada do umui hanamoa.
Davara, bona davara dekenai idia noho mauri gaudia ibounai e,
Dirava do umui hanamoa.
35 Badina be Dirava ese Siona do ia hamauria,
bona ia ese Iuda ena hanua ibounai do ia haginia lou.
Lohiabada ena bese taudia,
be unai gabudia dekenai do idia noho,
bona unai tano ibounai do idia abia, edia tano.
36 Dirava ena hesiai taudia edia natudia bona tubudia,
be unai tano do idia abia,
bona Lohiabada ena ladana idia lalokau henia taudia,
be unai tano dekenai do idia noho.
Copyright information for `HMO