Psalms 73

Dirava ese tau dikadia edia kerere davana do ia henia

Momokani, Dirava ena kara be namo, Israela taudia dekenai.
Edia lalona idia goevagoeva taudia dekenai,
Dirava ena kara be namo.

To egu aena be kahirakahira ia dedi.
Lauegu kamonai be ia manoka lao,
bona egu abidadama be kahirakahira ia ore.
Badina be lau itaia,
tau dikadia ese moni bona kohu momo idia abia,
bona hekokoroku taudia idia kwalimu,
vadaeni lau mama henidia.
Idia be mai edia hisihisi lasi,
bona edia tauanina be goada, bona mai edia dika ta lasi.
Idia be hisihisi lasi, haida bamona lasi,
bona gorere idia davaria lasi,
taunimanima haida idia davaria bamona.
Unai dainai hekokoroku idia atoa,
ageva idia atoa bamona,
bona dagedage idia karaia noho,
dabua idia karaia bamona.
Edia kudouna bona edia laloa dekena amo,
dika idia havaraia noho,
edia ura dikadia dainai.
Idia ese tau haida idia kirikirilaia mai hevaseha danu,
badu herevadia danu idia gwauraia noho.
Idia be hekokoroku,
bona dala idia tahua noho,
tau haida do idia hadikaia totona.
Idia ese guba dekenai ia noho Dirava idia hereva dika henia.
Mai hekokoroku danu,
idia ese taunimanima idia oda henidia.
10 Unai dainai Dirava ena taudia haida ese,
idia dekenai idia kamonai henia,
bona edia hereva kerere idia abidadama henia.
11 Unai tau dikadia be inai bamona idia hereva, idia gwau,
“Dirava be edena bamona do ia diba?
Siahu Ibounai Diravana dekenai be aonega ia noho, a?”
12 Tau dikadia edia kara be unai bamona.
Idia be mai edia kohu momo,
bona nega ibounai kohu ma haida idia abia noho.

13 Lau ese lau kara kava, a?
Nega ibounai lauegu lalona lau hagoevaia,
bona kara dika ta lau karaia lasi.
Inai kara dekena amo namo ta lau davaria, a?
14 Badina be dina ibounai lau hisihisi noho,
bona daba ibounai, matakani lau davaria noho.
15 Bema lau ese,
tau dikadia edia hereva bamona hereva lau gwauraia neganai,
lau ese oiemu taudia edia mauri do lau hadikaia,
bona edia laloa do lau hakererea.
16 Lau ese unai tau dikadia edia kara bona kwalimu,
dekenai lau laloa momo,
to ia auka dainai,
lau be hegeregere lasi laloa maoro do lau davaria,
17 ela bona Dirava ena Dubu Helaga dekenai lau vareai lao.
Unai neganai tau dikadia edia dokona lau diba.

18 Momokani oi ese dedidedi gabudia dekenai idia do oi atoa,
bona mase gabuna dekenai idia do oi hamorua.
19 Oi ese do oi hamasedia haraga,
bona inai mase be do ia dika momokani.
20 Idia be hegeregere tau ta ia nihi,
bona dabai ia noga neganai nihi be ia ore kava.
Lohiabada e, do oi toreisi neganai,
unai taudia be do idia boio momokani.
21 Lohiabada e, lauegu laloa be dika momokani neganai,
bona lalohisihisi ena mamina lau abia momokani neganai,
22 lauegu laloa be kavakava,
boroma edia laloa bamona oiemu vairana dekenai,
bona oiemu dala ena diba lau davaria diba lasi.

23 To lau be nega ibounai oi kahirakahira lau noho,
bona oi ese egu imana oi dogoatao noho.
24 Oi ese oiemu sisiba dekena amo lau oi hakaua noho.
Dokona neganai oi ese lau do oi abia dae,
guba ena hairai dekenai.
25 Guba dekenai dahaka do lau davaria?
Oi sibona, ani?
Unai dainai tanobada dekenai,
gau ta lau ura henia lasi, oi sibona.
26 Egu tauanina bona egu lalona be sedira do idia manoka,
to Dirava be lauegu goada.
Bema Dirava be lau dekenai ia noho neganai,
lau be hegeregere momokani ela bona hanaihanai.

27 Dirava e, oi idia rakatania taudia,
be momokani do idia mase ore.
Bona oi dekenai idia abidadama,
to edia abidadama idia rakatania taudia, be oi ese do oi hamasedia.
28 To lau be Dirava badibadinai lau noho.
Inai be namo herea momokani.
Siahu Ibounai Lohiabada e,
oi be lauegu magu momokani.
Hari lau ura oiemu kara ibounai do lau gwauraia hedinarai.
Copyright information for `HMO