Psalms 75

Dirava be Kota Biaguna Badana

Dirava e,
ai ese oi dekenai tanikiu ai henia noho,
oi dekenai ai hanamoa noho.
Oiemu ladana badana ai gwauraia hedinarai noho.
Ai ese oiemu hoa karadia ai herevalaia noho.

Dirava ia gwau,
“Lau ese kota henia dinana lau gwauraia vadaeni,
bona unai dina do ia ginidae neganai,
lau ese mai maoromaoro danu kota hereva do lau gwauraia.
Tanobada bona ia dekenai noho taudia be do idia heudeheude,
to lau ese tanobada ena badina nadidia do lau hagoadaia noho.
Lau ese hekokoroku taudia lau hamaoroa noho, lau gwau,
‘Do umui hekokoroku lou lasi.’
Bona kara dika taudia lau hamaoroa noho, lau gwau,
‘Do umui dagedage lasi.
Guba taudia dekenai do umui dagedage lasi.
Emui hekokoroku do umui hadokoa.’ ”

Dina daekau kahana,
dina diho kahana, o tano kaukau,
o tanobada ena kahana ta ese,
tau ta ena mauri ia hanamoa diba, a?
Lasi momokani!
Dirava sibona be Kota Biaguna momokani.
Ia sibona ese tau ta ia atoa diho noho,
ma ia ese tau ta ia abia isi noho.
Badina be Lohiabada ese,
kapusi ta iena imana dekenai ia dogoatao noho.
Unai kapusi lalonai,
be Lohiabada ena badu ena uaina aukana ia noho.
Ia ese uaina ia bubua noho,
bona tanobada ena kara dika taudia ibounai ese do idia inua ore.

To lau ese Dirava do lau hanamoa ela bona hanaihanai.
Iakobo ena Dirava hanamoa anedia,
be do lau abia nega ibounai.
10 Kara dika taudia ibounai edia siahu bona goada,
be Dirava ese do ia hamakohia.
To kara maoromaoro taudia edia siahu bona edia goada,
be Dirava ese do ia habadaia.
Copyright information for `HMO