Psalms 79

Ierusalema idia hadikaia murinai, tau ta ese ia guriguri, mai ena lalohisihisi danu

Dirava e,
idau bese taudia ese oiemu tano idia tuari henia vadaeni.
Oiemu Dubu Helaga idia hamiroa vadaeni.
Ierusalema idia hadikaia momokani.
Oiemu bese taudia edia mase tauanidia,
be ataiai manudia dekenai idia henia vadaeni, idia ania totona,
bona oiemu hesiai taudia edia hidiona,
be uda boromadia edia aniani totona idia negea vadaeni.
Oiemu bese taudia edia rarana,
be Ierusalema ena kahana ibounai dekenai idia bubua vadaeni,
ranu hegeregerena,
bona mase taudia guria totona tau ta ia noho lasi.
Ai idia hagegea noho idau bese taudia,
ese ai idia hereva dika henia noho.
Ai dekenai idia kirikiri,
bona ai dekenai idia hevaseha noho.

Lohiabada e,
oi ese ai do oi badu henia noho,
ela bona edena negai?
Oiemu badu be lahi bamona,
ai do ia gabua noho hanaihanai, a?
Mani emu kara idau bese taudia,
oi idia tomadiho henia lasi besedia,
edia latanai oiemu badu do oi atoa.
Oi dekenai idia guriguri henia lasi taudia edia latanai,
be oiemu badu do oi bubua.
Badina be idia ese,
Iakobo ena bese taudia idia ania ore,
bona Iakobo ena noho gabuna idia hadikaia ore.
Aiemai sene taudia edia kara dika ena davana,
be mani emu kara ai dekenai do oi henia lasi.
Oiemu bogahisihisi, mani emu kara,
be ai dekenai do oi henia haraga,
badina ai be ai dika momokani vadaeni.

Dirava e, mani ai do oi durua,
ai do oi hamauria.
Oiemu ladana ena hairaina dainai,
ai do oi hamauria, bona aiemai kara dika do oi gwauatao.
10 Badina dahaka idau bese taudia,
be inai bamona idia hereva diba, idia gwau,
“Edia Dirava be edeseni?”
Mani emu kara,
oiemu hesiai taudia idia alaia noho idau bese taudia,
edia kerere davana do oi henia.
Aiemai vairana dekenai,
oiemu hesiai taudia edia rarana ena davana mani do oi henia.
11 Idia guia vadaeni taudia edia taitai mani do oi kamonai,
bona oiemu siahu badana dekena amo,
kota dainai mase totona idia naria noho taudia,
mani do oi hamauridia.

12 Lohiabada badana e,
unai idau bese taudia ese oi dekenai idia hereva dika.
Edia dika davana be nega 7 idia dekenai do oi henia lou.
13 Unai neganai, ai, oiemu bese taudia, oiemu mamoe,
ese oi do ai hanamoa hanaihanai.
Ai ese uru ta ela bona ma uru ta, oi do ai hanamoa,
bona oi do ai tanikiu henia noho.
Copyright information for `HMO