Psalms 82

Dirava be King Badana momokani, ta ese ia hereaia lasi

Dirava ese guba ena kota hebou gabuna lalonai,
iena gabu dekenai ia gini noho.
Guba ena lohia taudia idia haboua,
bona Dirava ese iena kota hereva ia gwauraia noho.

Ia gwau,
“Umui ese kota hereva do umui hagagevaia noho ela bona edena negai?
Umui ese kara dika taudia do umui durua noho ela bona edena negai?
Umui ese manoka taudia,
bona edia tamadia sinadia be lasi maragidia do umui durua.
Ogogami, bona dagedage taudia ese idia hisihisi henidia taudia,
edia dala maorona, be kota dekenai do umui gwauraia.
Goada lasi taudia bona mai edia gau lasi taudia,
be do umui hamauria,
bona tau dikadia dekena amo do umui veridia mauri.

To umui be gau ta umui diba lasi,
umui be gau ta ena anina umui davaria lasi.
Umui be dibura dekenai umui loaloa kava noho.
Unai dainai taunimanima ese,
kara maoromaoro dalana idia badinaia lasi.

“Lau gwau, ‘Umui be dirava.
Umui ibounai be Siahu Ibounai Dirava ena natuna.’
To umui ibounai be taunimanima hegeregerena do umui mase.
Emui mauri be do idia ore,
king ena natuna ena mauri do ia ore hegeregerena.”

Dirava e, do oi toreisi,
tanobada do oi kota henia,
badina tanobada ena bese ibounai,
be oi sibona ese oi biagua noho.
Copyright information for `HMO