Psalms 89

Nega dika be edia tano dekenai ia vara neganai inai ane idia abia

Lohiabada e,
oiemu lalokau bada dainai ane do lau abia nega ibounai.
Lau ese oiemu maoromaoro bona momokani do lau gwauraia hanaihanai.
Lau diba oiemu lalokau,
be do ia noho ela bona hanaihanai.
Oiemu kara be maoromaoro bona momokani, do ia idau lasi.
Ia be ia noho goada nega ibounai,
guba ia noho goada bamona.
Oi ese oi gwau vadaeni,
“Lau ese lau abia hidi tauna danu gwauhamata taravatuna ai karaia.
Egu hesiai tauna Davida dekenai lau gwauhamata, lau gwau,
‘Oiemu natuna bona tubuna ta,
be nega ibounai do ia king.
Lau ese oiemu king siahuna,
be do lau haginia ela bona hanaihanai.’ ”

Lohiabada e,
guba noho aneru taudia ese,
oiemu hoa karadia be ane dekenai do idia hanamoa.
Idia ese oiemu maoromaoro bona momokani dainai ane idia abia,
oiemu ladana hanamoa totona.
Badina be Lohiabada e,
guba dekenai, daika be oi hegeregere?
Edena aneru be Lohiabada hegeregerena?
Aneru badadia edia hebou lalonai,
idia ibounai be oi dekenai idia gari noho,
bona aneru ibounai, oi Lohiabada idia hagegea aneru ibounai ese,
oi idia gari henia noho.

Lohiabada, Siahu Ibounai Dirava e,
daika ena siahu be oiemu siahu hegeregere?
Oiemu kara ibounai dekenai oiemu gwauhamata bona oiemu hereva,
be oi badinaia noho.
Lohiabada e, oi ese davara badana oi biagua noho.
Oi ese davara ena hurehure bada oi hamanadaia noho.
10 Oi ese Aigupito oi hamakohia,
bona oi hadikaia ore,
bona oiemu goada badana dekena amo,
oi dekenai idia tuari taudia oi halusia.
11 Guba be oiemu, tano danu be oiemu.
Tanobada bona ia lalonai gaudia ibounai be oi ese oi karaia.
12 Mirigini kahana bona diho kahana be oi ese oi karaia.
Taboro Ororo bona Heremona Ororo ese,
oiemu ladana idia hanamoa noho,
mai edia moale anedia danu.
13 Momokani, oiemu siahu be bada herea,
bona oiemu goada be bada momokani.
14 Oiemu basileia be kara maoromaoro bona kota maorona,
dekenai ia gini noho.
Oi ese oiemu basileia taudia oi lalokau henia,
bona mai maoromaoro bona momokani danu oi durudia noho.
Oiemu kara be namo nega ibounai, oi haidaua lasi.

15 Ane dekena amo oi idia tomadiho henia taudia,
be mai edia moale momokani danu.
Lohiabada e,
idia be oiemu bogahisihisi ena diari lalonai idia mauri noho.
16 Oi dainai idia be dina ibounai idia moale bada noho,
bona oiemu kara namo dainai oi idia hanamoa noho.
17 Oi ese ai dekenai kwalimu bada oi henia noho.
Oiemu lalokau bona bogahisihisi dainai,
tuari lalonai kwalimu ai dekenai oi henia noho.
18 Lohiabada e, oi ese aiemai king oi abia hidi vadaeni.
Oi, Israela ena Dirava Helagana ese,
aiemai king be ai dekenai oi henia vadaeni.

Dirava ena gwauhamata Davida dekenai

19 Gunaguna momokani neganai,
oi ese oiemu hesiai taudia korikori dekenai nihi oi siaia,
bona idia dekenai oi hamaoroa, oi gwau,
“Lau ese tuari tauna namona ta lau abia hidi vadaeni,
bona lau ese king dagi ia dekenai lau henia.
Lau ese hanua taudia edia huanai ia lau abia hidi,
ia be king.
20 Lau ese lauegu hesiai tauna Davida lau abia hidi,
bona king ena dagi lalonai lau hasiahua,
dehoro helagana dekena amo.
21 Lauegu goada be nega ibounai ia dekenai do ia noho.
Lauegu siahu ese do ia hagoadaia.
22 Ia dekenai do idia tuari taudia ese ia do idia halusia diba lasi,
bona kara dika taudia ese ia dekena amo do idia kwalimu diba lasi.
23 Ia dekenai idia dagedage taudia,
be lau ese do lau hadikaia ore,
bona ia idia badu henia taudia,
be do lau alaia mase.
24 Lau ese ia do lau lalokau henia,
bona ia do lau durua momokani.
Do ia tuari negadia ibounai kwalimu do lau henia.
25 Iena basileia be do lau habadaia,
bona iena tano be davara badana dekena amo,
ela bona Euperate Sinavai.
26 Ia ese lau dekenai do ia gwau,
‘Oi be lauegu Tamana bona lauegu Dirava.
Oi be egu Nadi Badana, lau oi hamauria noho Diravana.’
27 Lau Lohiabada ese egu vara guna natuna ia do lau halaoa,
bona ia be king badana momokani do ia lao,
king ibounai ia ese do ai hereaia.
28 Egu bogahisihisi ia dekenai do lau henia nega ibounai,
bona egu gwauhamata taravatuna ia danu be do ia noho,
ela bona hanaihanai.
29 Iena natuna bona tubuna ese,
king dagi do idia dogoatao noho ela bona hanaihanai.
Iena king siahuna be nega ibounai do ia noho,
guba do ia noho dinadia hegeregere.

30 “To bema iena natuna o tubuna ese egu taravatu idia utua,
bona egu oda hegeregere idia noho lasi,
31 o bema egu hadibaia hereva idia badinaia lasi,
bona egu taravatu idia kamonai henia lasi neganai,
32 lau ese idia do lau panisia,
bona edia kerere davana do lau henia, hisihisi dekena amo.
33 To lau ese egu lalokau Davida dekenai do lau hadokoa lasi,
bona egu gwauhamata ia dekenai do lau makohia lasi.
34 Egu gwauhamata taravatuna Davida dekenai,
be do lau utua lasi momokani.
Lauegu hereva ta do lau haidaua lasi, lasi momokani.

35 “Lauegu ladana helagana dekena amo lau gwauhamata vadaeni,
lau gwau, ‘Davida be do lau koia lasi.
36 Davida ena tubuna be do idia vara noho hanaihanai,
do idia doko lasi,
bona Davida ena basileia be do lau naria noho,
ela bona dina ena noho dinadia ibounai.
37 Davida ena king siahuna be do ia gini hanaihanai,
hua be guba dekenai ia noho hegeregerena,
bona hua ese taunimanima dekenai do ia hedinaraia,
lauegu hereva be momokani.’ ”

Tuari taudia ese, edia king idia halusia dainai, idia taitai noho

38 To harihari oi ese oi abia hidi king tauna,
be oi badu henia noho.
Oi ese ia oi rakatania,
bona ia oi negea vadaeni.
39 Oiemu gwauhamata taravatuna, oiemu hesiai tauna danu oi karaia gauna,
be oi ese oi makohia vadaeni.
Bona iena king toana, korona,
be oi ese oi negea vadaeni kopukopu dekenai.
40 Oi ese iena hanua badana ena magu oi veria diho vadaeni,
bona magu ena gabu aukana danu,
be oi ese oi hamakohia ore.
41 Raka hanaia taudia ibounai ese king ena kohu idia henaoa noho,
bona iena badibadinai idia noho taudia ese,
ia dekenai idia kirikiri noho.
42 Oi ese king Davida dekenai idia tuari henia taudia,
dekenai kwalimu oi henidia,
vadaeni oi ese idia ibounai oi hamoalea vadaeni.
43 Oi ese king ena tuari kaia oi hadikaia, ia be matana lasi,
bona iena tuari taudia dekenai goada oi henidia lasi.
44 Oi ese iena king siahuna ia dekena amo oi kokia,
bona iena helai gauna, terona,
be oi ese tano dekenai oi negea diho vadaeni.
45 King oi durua lasi dainai,
iena buruka dinadia idia ginidae haraga.
Oi ese oi hahemaraia vadaeni.

Dirava idia noia, do ia hamauridia

46 Lohiabada e, oi sibona do oi hunia noho ela bona edena negai?
Ela bona hanaihanai a?
Oiemu badu do ia siahu, lahi bamona, ela bona edena negai?
47 Lohiabada e, mani oi laloa,
aiemai mauri dinadia be daudau lasi.
Oi ese ai oi karaia, madi, ai be goada lasi do ai noho daudau,
ai be mase do ai davaria haraga.
48 Edena tau ese iena mauri ia halataia diba?
Daika ese guria gabuna ena siahu dekena amo ia heau mauri diba?
49 Lohiabada e, oiemu lalokau badana,
guna ia noho lalokauna,
be edeseni ia noho hari?
Oi ese Davida dekenai guna oi karaia gwauhamatana be edeseni?
50 Lohiabada e,
lau be oiemu hesiai tauna,
lau dekenai mani oi laloa.
Taunimanima idia hereva dika lau dekenai.
Dirava diba lasi taudia ese,
lau hadikaia totona badu hereva idia gwauraia noho.
51 Lohiabada e,
oi dekenai idia tuari gwauraia taudia ese,
oi abia hidi king idia hereva dika henia noho.
Oiemu abia hidi king ia lao gabudia ibounai dekenai,
unai taudia ese ia dekenai idia hereva dika henia noho.

52 Ita ese Lohiabada do ita hanamoa ela bona hanaihanai. Amen bona Amen.
Copyright information for `HMO