Psalms 91

Dirava be iseda Naria Tauna

Bema tau ta ese Ataiai Momokani Lohiabada dekenai ia lao,
Lohiabada ese mase dekena amo do ia naria totona,
bona bema unai tau be,
Siahu Ibounai Dirava kahirakahira ia noho neganai.
Dirava ese do ia naria bona durua.
Unai tau ese Dirava dekenai do ia hereva, do ia gwau,
“Lohiabada e, oi be egu gima Tauna bona egu naria Tauna,
Oi be egu Dirava, oi dekenai lau abidadama noho.”

Momokani Dirava ese oi do ia durua,
bona hunia dekenai idia noho dika gaudia,
be hegeregere lasi oi do idia hadikaia,
bona gorere dikadia, mase gaudia,
be hegeregere lasi oiemu mauri do idia abia.
Lohiabada ese iena hanina dekena amo oi do ia koua,
vadaeni iena naria dainai oi be do oi mauri.
Iena kara be maoromaoro bona momokani dainai,
iena gima kara bona naria kara be momokani.
Hanuaboi neganai idia mai dika gaudia, be do oi gari henia lasi,
bona dina neganai karaharaga idia ginidae gau dikadia danu,
be do oi gari henidia lasi.
Dibura neganai idia vara gorere dikadia danu,
be hegeregere lasi oi do idia hagaria.
Dina neganai idia toreisi haraga dika badadia dekenai danu,
be do oi gari lasi.

Sedira oi kahirakahira be taunimanima 1000 idia mase,
bona oiemu imana idibana kahana dekenai,
sedira taunimanima 10,000 idia mase,
to unai dika be do oi davaria lasi.
Oi ese Dirava ena kara do oi itaia:
Ia ese tau dikadia edia kerere davana do ia henia momokani,
be do oi itaia.


Bema egu naria Tauna,
Siahu Ibounai Diravana,
be oiemu gima Tauna, oiemu kohoro oi halaoa,
10 unai neganai dika ta ese oi dekenai do ia kamokau lasi.
Oi do ia hadikaia gauna ta,
be oiemu ruma dekenai do ia ginidae lasi.
11 Dirava ese iena aneru oi dekenai do ia siaia,
idia ese oi do idia naria, oiemu loaloa gabudia ibounai dekenai.
12 Idia ese edia imana dekena amo oi do idia dogoatao,
vadaeni oiemu aena be nadi dekenai bero do idia davaria lasi.
13 Oi ese laiona bona gaigai, bona laiona dagedagedia,
bona gaigai badadia danu, do oi moia diho.

14 Dirava ia gwau, “Lau idia lalokau henia taudia,
be lau ese do lau hamauria.
Bona lau idia diba,
bona edia Lohiabada dekenai lau idia abia dae taudia,
be do lau naridia namonamo.
15 Bema idia ese lau idia boiboi henia neganai,
lau ese idia dekenai do lau haere.
Hisihisi idia davaria neganai,
lau ese idia dekenai do lau noho.
Lau ese idia do lau hamauria,
bona taunimanima edia mataurai idia dekenai do lau henia.
16 Lau ese mauri daudau idia dekenai do lau henia,
edia davana namona.
Lau ese idia do lau hamauria momokani.”
Copyright information for `HMO