Psalms 98

Dirava be tanobada ena biaguna

Lohiabada hanamoa totona ane matamata do umui abia.
Ia ese hoa karadia ia karaia vadaeni.
Ia sibona ena siahu bona iena goada helagana dekena amo,
kwalimu ia abia vadaeni, iena.
Lohiabada ese iena kwalimu ia gwauraia vadaeni.
Ia ese Israela ia hamauria neganai,
iena siahu ia hedinaraia momokani bese idauidau dekenai.
Lohiabada ese Israela taudia dekenai iena gwauhamata ia hamomokania.
Ia ese Israela taudia ia lalokau henia noho,
bona ia ese idia ia rakatania lasi.
Tanobada bese idauidau ibounai ese,
iseda Dirava ena kwalimu idia itaia vadaeni.

Tanobada taudia ibounai e,
mai moale bada danu ane do umui abia Lohiabada dekenai!
Mai moale danu Lohiabada do umui hanamoa,
mai boiboi, bona mai ane abia danu.
Lohiabada do umui hanamoa ane dekenai!
Gita badadia dekenai miusiki do umui gadaralaia.
Kibi badadia bona kibi maragidia do umui hiriria.
Regena mai moale danu, iseda King, Lohiabada,
hanamoa totona do umui karaia.
Davara e, oi bona oiemu lalonai gwarume gaudia ibounai e,
do umui boiboi bada herea.
Bona tanobada, oi bona oi dekenai idia noho taudia ibounai e,
ane do umui abia goada herea.
Sinavai ibounai e, emui imana do umui patapataia,
bona ororo ibounai e,
umui ese ane do umui abia hebou mai moale danu,
Lohiabada ena vairana dekenai.
Badina Lohiabada be ia mai noho,
tanobada do ia biagua momokani totona.
Ia ese tanobada do ia kota henia mai maoromaoro danu,
bona tanobada ena bese idauidau edia ahuna korikori,
idia dekenai do ia henia.
Copyright information for `HMO