Revelation of John 8

Buka koua toana namba 7 ia makohia

Mamoe ena Natuna ese koua toana namba 7 ia makohia, vadaeni guba dekenai be regerege ta lasi, hora ena kahana ta bamona. Vadaeni Dirava ena vairanai idia gini aneru 7 lau itaia, idia dekenai kibi 7 idia henia.

Ma aneru ta ia mai, pata helagana badibadinai ia gini. Iena imana dekenai be golo uro ta. Unai uro be, ia lalonai muramura mai bonana namo, idia gabua gauna. Vadaeni idia ese muramura mai bonana namona momo unai aneru dekenai idia henia. Unai aneru ese unai muramura bona Dirava ena taudia edia guriguri be ia haboua tamona. Vadaeni inai boubou gauna tamona be Dirava dekenai ia henia. Henia gabuna be golo pata helagana latanai, Dirava ena helai gabuna badana ena vairanai. Vadaeni muramura mai bonana ena kwalahu, Dirava ena taudia edia guriguri danu, be aneru ena imana dekena amo ia daekau, Dirava ena vairanai. Vadaeni aneru ese golo uro ia abia, pata helagana ena lahi dekena amo ia hahonua, bona tanobada dekenai ia negea diho. Vadaeni guba ia boiboi ena regena, gado edia regena, kevaru, bona tano mareremarere bada idia vara.

Aneru 4 ese kibi idia hiriria

Vadaeni aneru 7 idia gini hegaegae, edia kibi do idia hiriria totona.

Aneru ginigunana ese iena kibi ia hiriria, vadaeni medu, aisi nadi bamona, bona lahi, rara danu idia mikisi, be tanobada dekenai idia diho. Unai neganai tanobada ena tano kahana toi dekena amo kahana ta ia araia ore, bona au ibounai edia orea toi dekena amo orea ta idia araia ore, bona tanobada ena rei kasiri ibounai ia araia ore.

Aneru iharuana ese iena kibi ia hiriria. Vadaeni gau ta, iena toana be ororo bada herea mai lahi danu bamona be davara dekenai idia negea diho. Davara ena kahana toi dekena amo kahana ta be rara dekenai ia halaoa. Davara ena gwarume orea toi dekena amo orea ta idia mase vadaeni. Bona sisima orea toi dekena amo orea ta idia mutu vadaeni.

10 Aneru ihatoina ese iena kibi ia hiriria. Hisiu bada herea ta guba dekena amo ia moru diho, ia hururuhururu, kede badana bamona. Sinavai ibounai edia orea toi dekena amo sinavai orea ta edia latanai unai hisiu ia moru, bona lohilohi ranudia ibounai edia orea toi dekena amo orea ta edia latanai danu ia moru. 11 Unai hisiu ena ladana be “Mamina Dika.” Unai ranu ibounai ena kahana toi dekena amo ranu ena kahana ta be unai mamina dika ese ia abia. Bona unai ranu idia inua dainai, taunimanima momo herea idia mase, badina iena mamina be ia dika.

12 Aneru namba 4 ese iena kibi ia hiriria, vadaeni dina bona hua bona hisiu ibounai idia haria kahana toi. Vadaeni idia ese dina ena kahana ta, hua ena kahana ta, bona hisiu edia kahana ta idia hadikaia. Vadaeni diari ena nega idia haria kahana toi. Bona diari ena kahana ta ia dibura. Unai dainai dina ena kahana ta be ia diari lasi, bona hanuaboi danu ena kahana ta be unai bamona ma ia dibura lao.

13 Vadaeni ugava manu ta lau itaia, ataiai momokani ia roho noho. Bona iena gadona lau kamonai. Ia boiboi badabada, ia gwau, “Tanobada taudia ibounai madi o, madi o, madi o! Badina be aneru toi, edia kibi idia do noho. Vadaeni edia kibi ena regena idia hiriria neganai, hisihisi bada tanobada taudia ese ma do idia abia.”

Copyright information for `HMO