Romans 5

Dirava ena vairanai ita maoromaoro

Iseda abidadama dainai, Dirava ese maoromaoro taudia ita ia gwauraia vadaeni. Unai dainai Dirava danu maino ita abia, Iesu Keriso iseda Lohiabada dainai. Keriso dekenai ita abidadama henia dainai ia ese iseda dala ia kehoa, vadaeni Dirava ena hariharibada lalonai ita vareai vadaeni. Inai hariharibada lalonai ita mauri noho hari. Unai dainai mai moale danu ita ese Dirava ena hairaina guba dekenai, Dirava danu nega tamona dohore ita abia gwauhamata gauna, ita naria noho. Unai sibona lasi, to nega dikadia ita abia neganai danu ita be moale, badina ita diba hisihisi bona nega dika ese iseda haheauka idia hagoadaia diba. Bema ita haheauka noho neganai, ita ese dibagani ita negea diba. Bona bema dibagani ita negea, ita ese Dirava ita abidadama henia diba, bona Dirava ena gwauhamata gaudia dekenai ita naria noho diba. Inai bamona Dirava ita naria noho neganai, ita naria kava lasi, badina be Dirava ese iena Lauma Helaga ita dekenai ia henia vadaeni. Inai Lauma ese Dirava ena lalokau iseda kudouna lalonai ia atoa. Unai dainai ita ese taunimanima ita lalokau henia momokani.

Badina be ita be do manokamanoka noho neganai, Keriso ia mase, dika taudia totona, Dirava ena nega korikori dekenai. Kara maoromaoro tauna dainai, be daika ese do ia mase? Sedira ta lasi. Sedira tau ta ese tau namona ta dainai do ia mase diba. To Dirava ese iena lalokau badana ia hedinaraia ita dekenai, badina ita be do kara dika noho taudia neganai, Keriso be ita dainai ia mase. Iesu ena rarana dainai, Dirava ena vairanai ita be maoromaoro vadaeni, ani? Unai dainai ma gau badana ta ita diba, ani? Iesu ese ma Dirava ena badu Dinana dekena amo ita do ia hamauria. 10 Guna ita maino lasi Dirava dekenai, to iena Natuna ia mase dekena amo maino ia karaia, vadaeni Dirava bona ita be turana vadaeni. Oibe, hari ita be Dirava ena turana, unai dainai gau badana ta ita diba danu, ani? Momokani, Keriso ese ita do ia hamauria, badina be ia mauri noho! 11 To inai sibona lasi, Dirava ese ita ia hamoalea vadaeni, badina be iseda Lohiabada Iesu Keriso ese Dirava ena turana ita ia halaoa vadaeni.

Adamu ese mase ia mailaia, to Keriso ese mauri ia mailaia

12 Tau tamona dekena amo kara dika ia vareai mai tanobada dekenai, bona iena kara dika ese mase ia mailaia. Unai dainai mase be taunimanima ibounai ese idia abia, badina ibounai be mai edia kara dika. 13 Kara dika be ia vara guna tanobada dekenai, Mose ena Taravatu be gabeai. To, Taravatu ia noho lasi neganai, kara dika ta ta be Dirava ese ia makaia lasi. 14 Adamu ena nega, ia mai bona Mose ena nega, be mase ena siahu taunimanima ibounai edia latanai ia noho. Adamu ia mase badina ia ese Dirava ena taravatu hereva ia utua dainai. Sedira tau haida edia kara dika be Adamu ena kara dika bamona lasi, to idia danu idia mase.

Adamu be gabeai do ia mai tauna, Keriso, ena laulau bamona.
15 To idia ruaosi be hegeregere lasi, badina Adamu ena kara dika be idau, bona Dirava ena davana lasi harihari gauna danu be idau. Momokani, tau tamona, Adamu ena kara dika dainai, taunimanima momo ese mase idia davaria. To Dirava ena hariharibada ese mase ia halusia momokani, badina be tau tamona, Iesu Keriso, iena davana lasi harihari gauna dainai, taunimanima momo ese mauri idia davaria! 16 Oibe, unai tau tamona Adamu ena kara dika be idau, to Dirava ena harihari gauna danu be idau. Unai tau ena kerere tamona murinai, be Dirava ese dika davana ia henia momokani, to taunimanima momo edia kara dika momo herea murinai, be Dirava ese iena hariharibada ia henidia, ia gwau, “Emui dika davana be lasi.” 17 Momokani unai tau tamona ena kara dika dainai, mase ese taunimanima ibounai ia biagua. To ma tau tamona, Iesu Keriso ese, ia karaia gauna, be unai tau ena kara ia halusia momokani. Badina Iesu Keriso dekena amo, Dirava ena hariharibada bona iena maoromaoro idia abia dae taudia ibounai ese mauri mai kwalimu danu do idia abia, bona edia mauri do idia biagua.

18 Anina be inai: Tau tamona ena kara dika ese taunimanima ibounai ia hadikaia. Unai bamona danu, tau tamona ena kara maoromaoro ese taunimanima ibounai edia kerere davana ia kokia, vadaeni mauri idia abia. 19 Bona tau tamona ese Dirava ia kamonai henia lasi dainai, taunimanima momo be kara dika taudia idia halaoa, unai bamona danu, tau tamona ena kamonai dainai, taunimanima momo be do idia maoromaoro Dirava ena vairanai.

20 Taravatu ia gini hamatamaia neganai, Taravatu utua kara be ia bada lao. Oibe, to kara dika ia bada lao neganai, Dirava ena hariharibada ia bada lao danu, bada herea. 21 Unai dainai ita gwau kara dika be mai ena siahu, badina be mase ia havaraia. To unai bamona danu ita gwau, Dirava ena hariharibada be mai ena siahu bada herea, badina be ia ese ita taunimanima be maoromaoro taudia ia halaoa. Ma ia ese danu mauri hanaihanai ita dekenai ia henia. Iseda Lohiabada Iesu Keriso ese inai hariharibada kara ia karaia.

Copyright information for `HMO