Song of Solomon 1

Inai be ane namo herea, Solomona ena.

Ane ginigunana

Hahine ia abia

Oiemu uduna ena bibina ese,
kisi momo lau dekenai ia henia noho.
Oiemu lalokau ena namo ese,
uaina ena namo ia hereaia noho.
Oiemu kopina oi dahua muramura ena bonana be namo herea,
bona oiemu ladana be,
dehoro idia bubua ena regena bamona.
Unai dainai headava lasi kekeni ibounai ese,
oi idia ura henia noho.
Mani lau be oi danu ita lao,
karaharaga do ita lao!
Oi be egu king,
bona emu ruma lalonai lau do oi hakaua vareai.
Ita be do ita moale hebou,
oiemu lalokau ena namo ese,
uaina ena namo ia hereaia momokani.
Hahine ibounai ese oi idia ura henia noho,
be mai badina.
Ierusalema ena hahine e,
egu kopina be koremakorema, to egu toana be namo.
Egu kopina be koremakorema,
Kedara dabua rumadia bamona,
Solomona ena ruma koua dabua bamona.
Egu kopina be koremakorema dainai,
lau do oi itaia noho, itaia noho lasi,
badina be dina ese lau ia gabua vadaeni.
Egu taihuna ese lau dekenai idia badu,
bona vain uma naria gaukara lau dekenai idia henia,
unai dainai egu kopina lau naria diba lasi.
Egu lalokau tauna e, lau do oi hadibaia,
oiemu mamoe be edeseni oi ubua noho?
Bona dina tubua neganai,
edeseni oiemu mamoe dekenai,
laga-ani oi henidia, idia hekure?
Badina oi dekenai do lau mai gwauraia,
lau ura lasi mamoe naria taudia haida edia mamoe,
edia huana dekenai do lau loaloa kava.

Tau ia hereva

Hahine namona momokani e,
bema gabu oi diba lasi neganai,
mamoe edia aena gabudia murinai do oi raka.
Oiemu nanigosi natudia be mamoe naria taudia,
edia palai ruma edia badinai do oi ubudia.
Egu lalokau e, dahaka dekenai oi be hegeregere?
Oi be Farao ena kariota hosi hahine,
namona ta hegeregerena.
10 Oiemu huina be mai hairaina.
Ia ese oiemu vairana kahana kahana dekenai,
bona oiemu aiona dekenai ia helai noho,
ageva namona bamona.
11 Ai ese herahera gaudia do ai karaia,
oi dekenai do ai henia totona,
golo herahera gaudia, mai siliva danu.

Hahine ia hereva

12 Egu king be iena mahuta patana,
dekenai ia hekure neganai,
egu bonana namo muramura ena bonana ia daekau.
13 Egu lalokau tauna,
be egu ratana edia huanai ia hekure,
be lau dekenai bonana namo muramura ena puse bamona.
14 Egu lalokau tauna ena toana be namo herea,
Ene Gedi ena vain uma dekenai idia vara,
hena ava namodia edia toana bamona.

Tau ia hereva

15 Egu lalokau e,
oi be hairai herea momokani.
Oiemu lalokau dainai,
oiemu matana edia toana be pune manu bamona.

Hahine ia hereva

16 Egu lalokau tauna e,
oi be raho namo momokani.
Momokani oi be mai hairaina.
Iseda mahuta patana be rei namona bamona.
17 Iseda ruma audia be sida,
bona ruma guhi au badadia be saipresi audia.
Copyright information for `HMO