1 Macc 16

Ai Saimono igini Yone ibu Gese tano wahalu ibugua Sendebeusuhanda bialu heagonaga ibu aba Saimono lamule pene. Puwa te layago hale howa Saimono ibugua ibu igini kirali Yudasala Yonela olowa libuhondo lamialu lalu, I̱nibi i̱ hamenerubi i̱ aba damene bu hearubi iname Isaraele wali agali biamogo bialu wai bamba i̱na igiri emene hewangi howa bialu haabo henego ayu kemagoni. Iname wai bialu howa Isaraele wali agali waitigi giha howa mo wialu haru dai bigi beremali. Anidagua biaga henego ai ayu ina mbirale mbira bibe naheore agali miniwiore bedogoni. Ainde i igini kirali agaliore haribidago turu howa i̱na Ngode Datagaliwabehondo ka̱i̱ timbuni laro. Libugua i̱naga henge mialu i̱ hamene homayarunaga henge mialu libu ho aribia halibu. Ainde Ngode Datagaliwabehanda libu haru holebirago ai libugua inanaga dindi ngago karulole waitigi ibirago baba wai bule pudaba, lene.

Ani laya handala Yonehanda ami agali daosini dege pira kira (20,000) geni pialu wai biaga hongohe pari wayaliru haru halu nogo hosini biruwa wai biagabi dewa dege haru hene. Tigua Sendebeusu halu ibunaga ami agaliru ngola howa uruni baba wai bule pialu harigani mbi layagola Modeini tanoha palene. Egerebalene galaki biyagola abale heyalu wai hama dindi tigabi wiagoria pene. Ogoriani ami agali nogo hosini biruwa wai biaga dewaorebi ami agali geni pialu wai biagabi dewa ngola hene. Anigo ogoriani iba mbira peagome libu mo tu wia howa amura haga haga bilene. Ani biyagola Yone halu ibunaga ami agali biarume puwa waitigi bu hearu handaede ho hene. Ani howa Yone ibugua handalu hearia ami agali biaru waitigi hondowa tigua iba domaede halu wai polene gi hayane hendene. Ani biyago hondowa Yone ibunime pigane pora bialu iba ala domole pene. Ani domalu piyago hondowa ami agali bibahende iba domalu ubaede hai halu pene. Yonehanda ibunaga ami agali nogo hosini biruwa wai biaga biaru dombeneha helowa ami tidiki helowa lene labolabo helene. Anidagua binidago irane waitigi tinaga nogo hosi dewaore haru heago hondowa anidagua bini. Tigua pialu pilipe biguli pu lalu puwa Sendebeusu halu ibunaga ami agali hearu bama talima pene. Ogoningi waitigi dewaore timu hai halu dewa wai hamani homai hene. Maru ibida pialu wai pabeanda hongohe Kederono tano wiagoha pene. Wai ogoniha Yudasa timu hene. Ani ho wia handala ibu hamene Yonehanda waitigi bama talima pialu wai pabeanda hongohe Sendebeusu ibuni haga Kederono tano talima anda pene. 10 Ani bialu waitigi maru Asadodo tanoha anda bima irigi howa mamageali handa pugu bu haga heagoha puwa birado hene. Ani heago helowa Yone ibugua tano bo heda hayagola agali dege daosini kira (2,000) bibahende homai hene. Ani bialu mani Yudia dindi dai bialu ibu mo ko nahe karulape dai bini.

Saimonobi ibu igini kiralibi bayagola homenego ogo

11 Abubusu igini Tolemi ibu Yarigo tano ngago kawareha dindi tigabi ngagoha gabumane haguane hene. Ibunaga muni ngolobi silibabi dewaorewi henego 12 irane ibu one Anduane Homogonagaloma binigo mo miaga agali haguane timbuni Saimono wane dabu henegome ani hene. 13 Tolemi ibugua mine timbuni halu ibugua dindi bibahende handame ho holene manda bu hene. Ibugua ibu imane Saimono mo hondo howa Saimonobi Saimono iginirubi bibahende homelo bo wahai hole manda bu hene. Ani manda bu howa mali handari mbira pira kariani karia hayagola (177) mali ogoninaga ege beaneni (11) mini Sebada heagola
(16.13)Yuda tinaga ege Sebada ogoni inanaga ege mbira mendela hengeneha tagira ibaga. (Yanuari Pebuari)
14 Saimono ibu tano maru dindi ibugua hendedagoha wiaru halu mbira handama ibaga bule pene. Ani puwa wali agalinaga gendaru tinaga hameru agi dege wiaruabe handama pene. Ibu igini kirali Madadiasabi Yudasabi ti haru pialu Yarigo tano anda pene. 15 Ani pu bereagola Tolemihanda ibu imane Saimonobi ibu balibuni Madadiasa Yudasala mo hondo hene. Ibugua tihondo ibu andaga dindi emene mbira mini Dugu ibuni mo wini wiagoha nenege ibalimu lene. Ani lowa ibugua tomo timbuni dawalu badi bialu howa agali maru tamuha birado helene. 16 Ani bialu Saimono halu ibu igini biago labowaini iba dewa nowa luluyu wiagola Tolemi halu agali maru waraandaho birayarume danda timu yagayaga bialu tomo nalu bereagoha waraanda hene. Ani buwa Saimonobi ibu igini kirali biagolabobi agali maru biabe bia haga hearubi minalu homelo bai hene. 17 Tolemihanda ibu imane balibuni biaru mo hondo howa ogonidagua bini. Tigua ibuhondo mana bayale biaga wiagonaga pani ibugua tihondo mana kome emena hangalu biadai bini.

18 Ani bialu mani howa Tolemi ibugua o biyadaruninaga te gili bialu kini hale helo yu pelene. Ani bialu dindi ogoni ibugua haru howa handaya holiyanaga ami agali dewaore ibilabe lalu kini hole hale halu bini. 19 Ani bialu Tolemihanda agali marume Yone bo wahole Gese tano pudaba lalu bini. Ibugua ami agali haru haga agali haguane hearuhondo beba gilibu pelaga bialu, I̱na tí mo turu halu ngolo silibaru dewaore ngigi buliya ibalimu, laga bialu beba gilibu pelaga bini. 20 Ani bialu agali maru Yarusalemebi Anduane Homogonaga anda hari nene ngagobi karulole pudaba lalu bini. 21 Ani layago hale halu agali mbira ibu gerai lalu bamba halu Gese tano abale anda puwa Yonehondo lalu, Í̠ ababi í̠ hamene kirali biago labobi homaya. Ai Tolemihanda agali marume í̠ bo wahole pudaba lenego ibira, lalu lamini. 22 Ani layago Yone ibu hale howa mogolo hene. Anigo ibugua Toleminaga ohaga wiago manda bu howa agali maru Tolemihanda ibu minalu bole pudaba lene ibiyaru Yone ibugua tini minalu garabaya helaga bini. Ani helowa ibunime ti homelo bo wahaga bini.

23 Ai Yone ibugua Anduane Homogonaga loma binigo mo miaga agali haguane timbuni howa bialu henego te maru mbuga ogoha daga lolebere. Mbuga ogoha Yonehanda wai bini ngagobi tanonaga wai pabe baya hangu arema bialu mo hongo haga bialu henegobi ibugua biabe maru bialu henegobi te gilibu nga. Mbuga ogoniha te gilibu ngago Yone ibu aba homayagola ibuni Anduane Homogonaga loma binigo mo miaga agali haguane timbuni ha aribia henegoria howa pigane lalu te lama peda.
(16.23-24)Ai hobane ogoniha howa bi ledagome lalu, Mbuga ogoha howa Yonehanda biabe maru bialu henego gilibu nga, ledagoni mbuga ogoni ayu nawi. Abale mbuga mbira te ogoninaga gilibuwi mbira winigo ayu ereba haya. Mbuga ogoni ayure ndo bambaore ereba hene nga bada.


Copyright information for `HUI