a6.71 Mag 1.54

1 Macc 6

Andiogusu mane homenego ogo

(2 Magabi 1.1-17, 9.1-29, 10.9-11)

Kini Andiogusu mane ibu Pesia dindiha dindi timbuni Mesobodemia wiagoha howa hale halu hearia tano mbira mini Elimaisi nga layane hale hene. Tano ogoniha siliba ngoloru dewawi mini lene mbira nga layago hale halene. Mbirale dama mitangi bialu bi pupu wiaganaga anda tano ogoniha hayadagoha mbirale bayale damene muni dewame yolo miaga dege dewaore nga layago hale hene. Wai humbi ngolome wabini wialu wai pole karulagane yari damene dewaore anda ogoniha nga layago hale hene. Mbirale uruni Masedonia Kini Alegesanda ibugua anda ogoniha mo winiya. Alegesanda ibu Pilibi igini howa Girigi dindiha kini timbuni mini lene pigane ibu henego ogonime mo wini. Ani nga layago hale halu Kini Andiogusu ibugua Elimaisi tano puwa wai bialu mbirale uruni mo kayu bule manda bialu hearia wali agali tano ogoniha hayadarume te ala hale ho bolangua howa Kini Andiogusu ibiyagola tigua manda manda bu heneyago wai biadai bini. Ani biyago Andiogusu ibugua mbirale mo page bule piyago mibe nahe hene. Ani biya handala Andiogusu ibu beregedalu Babilono dai buwa ibunaga bu miniha genda timbuni ho hene.

Pesia dindini hearia agali mbirane ibuwa Andiogusuhondo lamialu lalu, Í̠naga ami agali Yudia dindiha helariruni bo podahana haya. Yuda ami agalime Lisiasa halu ami agali hongohe hearu bo talia togolaya. Ani bialu ayu ti hongoheore kago irane tigua wai bialu ami agali tigua bo wahaga biyarunaga wai biaga ale wiaru ti mo wiai halu dabudabu marubi dewaore mo wua howa ti hongohe gibiore ka. Í̠na mbirale Hiriribi Hondolene Gibiore lomabu delaga dabu Yarusalemeni wiagoria mo wirigoni Yuda tigua mo wahaya. Ani bialu pabe hongohe daligaore ala hayagobi ndo lomabu delaga dabu kago bu mabu bida. Ani bialu í̠ninaga tano Bedesu ngago tigua karulalu mo hongo howa ngeleda, lalu lamini. a 

Ani layago hale howa kini ibunaga miniha genda timbuni howa mini burugulo berene. Ani biyagola ibu warago bamialu dagiani paliaabo henego irane mbirale ibugua bule mende bu wiyago damene bibahende mo habo lai hayagola ibunaga miniha mo ko hai hayagola dagiaha wiaabo hene. Horo dewaore dagiaha ani wiaabo hearia genda mini burugu dewaore lone dambi haga bialu bope haabo hene. Anidagua biyago hondowa ibu homoleore ngogonida lo manda bini. 10 Ani manda buwa ibugua agali maru Kininaga Nenege laga hearu mogo buwa ibugua tihondo lalu, I̱ u palibe naheore genda timbuni ngagome i̱naga bu gubalini nedagome i̱ mo ko kagoni. 11 Ainde i̱nihondo hale halu genda tara tara i̱ha tagira ibirago irane agidabe. Bamba nde i̱ha mo palia holene karulo kagola wali agalime i̱hondo turu hai hagago. 12 Anigo ayu i̱na ko bialu mbirale lotunaga biabe biaga ngolo silibarume wabini Yarusalemeha wini mo yu pirugomeda. Ani bialu Yuda wali agali bame bo waharugomeda. 13 Ai i̱na mbirale uruni birugome genda uruni i̱ha anda ibiyada lo manda bido. Ainde ayu i̱naga miniha ndibu lai harugo ai i̱ dindi kaundia ogoha homoleda lo manda bido, lene.

14 Ani lowa Andiogusuhanda agali mbira mini Pilibi ibu Kininaga Nenege laga heaga olo íbu lowa ibu dindi bibahende Andiogusuhanda hondo haga wiaru bibahende ibugua handaya ho helo dabo helene. 15 Ani helowa kininaga mandabi agabi gi hondene magibi Pilibihondo miai hene. Ani mialu ibu igini Andiogusu dauni kagobi nde mani kini helonaga mana baya hangu lawai helo lamini. 16 Ani lalu Kini Andiogusu mane ibu mali handari mbira pira mariani dira (149) layagola dindi kaundia ogoniha wialu homene.

17 Ani Andiogusu homaya layago Lisiasa ibu hale howa ibugua wali agali bu hearuhondo Andiogusu homayago ai ibu igini mini Andiogusu dege kagome ibu abanaga henge ibuni miya. Ani bialu ibu kini gahenge haribia halu ibu mini Yubado ka. Kini ogoni ibu wene igiri emene heangi Lisiasahanda baya hangu handaya ho haga hene.

18 Ai Yarusalemeha wai pabeanda hongohe heagoha waitigi bu hearume Isaraele wali agali Anduane Homogonaga anda kaware pole pialu karia napole lowa hariga hapai haga hene. Horo bibahendengi wali agali genda mo mialu haabo hene. Ani bialu maru Anduane Homogo manda nabiaga hearu biamogo bialu haga hene. 19 Ani bialu kagonaga Yudasahanda agali uruni bialu kago balu bo biba helolebero laya. Ani lowa mali handari mbirani pira duria (150) layagola ibugua ami agali wai biaga hearu Yarusaleme wai pabe anda hongohe heagoha haga hearu baba wai bilo dabo helalu 20 wai biagane masini tara tara wai biagane wiaru ogoriani kaware mo wialu bini.

21 Ai agali mine haga anda ogoniha haga hearu heba Isaraeleali Anduane Homogo mitangi nahaga hearubi tigua pora bialu kini hearia puwa ibuhondo lamialu lalu, 22 Mana ko ina waitigime inanaga wali agali baba bialu kago angi pani mule kebe. 23 Ina í̠ aba ibu andaneha howa ibunaga bi mana lo ngago hale halu howa talialu harima. 24 Ani bialu harimago ainde mana o bialu haruagome ina biamogo agua bulubada. Ayu inane dameneore bu karume ina baba waitigi ho kago. Ani bialu tigua ina aria maru bo wahai haya. Ani bialu inanaga dabudabu bayale wimaru ti mo yu piai haya. 25 Tigua ina hangu mo ko ha ndo hameigini tara tara ina baba kaware palia parapara padaru bababi wai bialu ha dege bida. 26 Ani bialu howa ai ayu tigua agali maru wai pabe anda hongohe Yarusaleme tanoha haga haru baba wai bialu anda hongohe ogoni ti karulole manda bialu ka. Tigua Yarusalemeha Anduane Homogonaga anda hayago arema buwa mo hongo halu Bedesu tano mo ho ngeleda. 27 Ayu ogoniore í̠na mbirale mbira nabiriyagua tigua bialu kago pu hongo halu ina bo wahai haragola mani í̠na mbirale mbira tihondo bibe naheore wulebira, lene.

Andiogusu daunila Lisiasalame wai binigo ogo

28 Kini ibugua agali Yarusaleme howa ibiyarunaga bi layago hale howa ibu miniha tandaga timbuni ho hene. Ani howa ibugua agali haguane mini Kini Nenege laga bu hearubi ami agali haru haga haguane hearubi ami agali nogo hosini biruwa wai biaga haru handaya ho haga hearubi bibahende olo ngoai hene. 29 Ani bialu ami agali maru dindi tara tara wiaruha hearu yolo bu helalu maru dindi iba dege dombene wiagoha hearubi munime yolo bu helatago halu buwa ibunaga ami agali dewaore hene. 30 Ami agali dindini howa wai bulene daosini dege handari mbira (100,000) nogo hosini biruwa wai biaga daosini dege pira kira (20,000) nogo tara mbira mini elebana wai bilo agali baya hangu biawai heneru pira tebirani kira (32) bibahenderubi manda bu helalu bini. 31 Ani bialu Kini Andiogusu halu ibunaga ami agali biaru tigua Idumia dindi wiagoha pu bolangua halu puwa Bedesu tano wiagoha wai luore bialu haabo hene. Ani bialu howa tigua masini tara tara wai biaga wiaru wai pabe tagiraha wabu helaga biaria agali tano ogoniha haga hearume ibalu bo giala hole bialu bo heda hene.

32 Ai Yudasa ibugua nde ibunaga ami agali Yarusalemeha wai pabeanda hongohe biagoha helayaru heba haru halu puwa dindi mini Bede Segaraia laga wiagoria balai anda bu hene. Kininaga ami agali ibulubadagoria hapai halu ogoriani pu hene. 33 Ani heagola kini halu ibunaga ami agali biaru tigua gao layagola heyalu Bede Segaraia polene hariga peadagua pialu howa ibunaga ami agali biarume pilipe biguli pu laga laga bialu danda timu yandareru wai biaga ale manda manda bu yai hene. 34 Ani bialu nogo elebana biarume wai bilonaga tinaga miniha mo noa halu mo tandaga holenagagerebi liniru ira tara mini malaberi liniru mo nga helene. 35 Ani bialu nogo timbuni uruni ami agali mbira mbira tidiyu headagua mo tahaga bini. Ami agali daosini mbira (1,000) hearu bibahendeore manda boronosime wabini mo karulai halu aga senipume wabiradagua bini wiaru mo karulai halu nogo elebana mbira mbira headagua tidiyu haga haga bini. 36 Ani bialu ami agali nogo hosini biruwa wai biagaru tibi mo tale bialu handari duria (500) dege dege nogo elebana mbira mbira headagua tidiyu haga haga bini. 37 Tigua dabu wabuwa nogo elebana erekunini mo paga howa mandibuale hongohe mbirame daba hene. Ani buwa ami agali tebira heba mane nogo mo tiga bialu haru haga howa nogo elebana mbira mbirani ani dege berene. 38 Ani bialu Lisiasa ibugua ami agali nogo hosini biruwa wai biaga hearu ibunaga ami agali geni piaga hearu gi tigaha gi lehala helene. Ani buwa ti waitiginaga miniha mo tandaga holebi tinaga ami agali bayale helo haru holebi ani helene. 39 Tinaga wai humbi siliba ngolorume wabini wiaru yalu hari bare wiagoria heago ni daba hayagola ngiringara lalu ira hungu timbuni daradagua bini. 40 Kininaga ami agali maru hari bare wiagoha heagola maru dindi ulini wiagoria tidiyu haga haga bini. Ani bialu ti hondo ha nabi abale wai pora biai hene. 41 Agali hearume ami agali uruninaga danda timu humbiru kilingele layago hale howabi geme dindi kulu layago hale howabi ti gi timbuni hene.

42 Ai Yudasa halu ibunaga ami agali biarume wai bialu kininaga ami agali handari waragaria (600) bibahende bo wahai hene. 43 Eleasa Abarana ibu de handalu hearia nogo elebana timbuni daligaore mbira kininaga agaru mo karulahe ibiyago hondowa kini ibuni nogo ogoriani biralu ibirabe toba hene. 44 Ani manda buwa Eleasahanda ibuninaga holene embeda halu ibunaga wali agali biamogo bialu homene. Ani biyagome ibunaga mini timbuni mo yaraga henego wiaabo ka. 45 Ibu gi nahene. Ibugua gerai lalu nogo elebana timbuni biago ami agali abene mende mendehala ibilowa dombeni ibiyago hondo yalu gerai tungulope hene. Ani buwa ami agali abene mende mendehabi heago bai hayagola maru mende mendebi ha migimigi bini. 46 Ani biyagola Eleasa ibugua nogo elebana biagonaga himuniha anda puwa yandareme nogo timbuni ogoni nogoba hayagola nogo ogoni ibira hayagome Eleasa bo dambi hayagola homene.

Bedesu tanohabi Saiono nenenibi wai bialu henego ogo

47 Ai Yuda ami biaru tigua handalu hearia kininaga ami biarume wai tara mbira biyago hondowa ti emene hadai bini.

48 Ani biyagola kininaga ami biarume Yuda ami Yarusalemeni hearu baba wai bini. 49 Ani bialu kini ibugua wali agali Bedesu tanoha hearu baba gi tigani bialu pene. Ani binidagoni ti wai lu bialu holenego tomo nalu holeme nawiyagola ani bini. Ani bialu mali ogoni Yuda wali agalinaga mabuha tomo hongolene nawi mali kane hayagola tomo nawini.
(6.49)Yuda wali agali tinaga mana mali waragaria mabuha tomo hangalu bu wia bialu mali kane haragola tomo hongolene bu wulenebi nabiagaore wini. Te ogoninaga Haru Tagira Penego 23.10-11. Ani bialu Agali Loma Binigo Mo Miaganaga Biabe 25.2-7 ngago hondolene nga. Anidagua binigome mali kane piai kagola mani gari timbuni tagira piaga wini.
50 Ani bialu kini ibugua Bedesu tano karu lowa ami agali maru tano ogoni handaya ho helo helene. 51 Ani bialu kini ibugua Anduane Homogonaga anda kagoha wai bu pialu horo dewa wai dege bialu hene. Ibugua masini tara tara ira hangu dedaore babe lolenebi ege to̱le̱ bape lolenebi timu bape lolenebi wabu helowa wai bialu hene. 52 Ani biyagola agali Anduane Homogonaga anda heagohayagi hearu tiguabi nde wai biaga masini tara tara uruni ale wabuwa wai biadai bini. Ani bialu heagola wai luore bialu hene. 53 Ani bialu henego ai mali ogoni mali kane tomo nahanga biago howa Anduane Homogonaga andaha tomo nawi tubagi hene. Ani bialu Yuda wali agali wai togoloyu ibini hearume tomo emene wiago nawi heagola ti tomo nawiore hene. 54 Ani biyagola wali agali dewaore tini dalu dai biai hene. Ani biyagola Anduane Homogonaga andaha emene dege haabo hene.

Kini ibugua Yuda baba gi tigani binigo ogo

55 Horo ogoni Pilibi ibu Pesia dindi Midia dindiruha howa dai andaga dai bini. Pilibi ogoni bamba kini Andiogusu mane biago ibu homalu ibu igini Andiogusu dauni kini ho aribia helo lawai halu haru habe lene biago dai bini. Ogoni ibugua Andiogusu mane biagonaga ami agali biaru heba dai buwa ibugua gabumane biabe damene bibahende handaya ho hai hole manda bini. Ai anidagua biru layago Lisiasa ibu hole howa 57 ibugua andaga dai bulenaga mbirale manda manda bini. Ani buwa ibugua igiri emene Kini Andiogusu daunibi ami haru haga hearubi ami agali bu hearubi lamialu lalu, Horo bibahendengi ina tomo nolene nawi howa inanaga hongo ibira haabo harago. Ai tano ina karulole manda birimagobi hongoheore nabibehe ngagoni. Ani bialu ina daluha gabumane biabe mo tiga bulene dewaore wiarua. 58 Ani wiaruago ai iname Yuda agali haguane karu baba gi tigani bialu bi lo tiga bulene karulapeda. 59 Ani bialu tinaga mana lo wini ngagobi tini bialu haga ngadaguabi bialu helo waholene karulapeda. Abale inaha genda tara tara tagira ibiyago irane iname tinaga bi mana lo wini wiago mo pugualu tinaga bialu haga wiago mo wahai harimagome ibiya, lene.

60 Ani layagola kini halu ami agali haru haga hearume karulape lai lene. Ani lalu tigua Yuda wali agalihondo wai wahalu gi tigani lama lalu bi lo yalu pu lene. Ani layago hale howa Yuda wali agali tigua karulape lene. 61 Ani layago hale howa ai kini halu ami agali haru haga biaru tigua habo nalolene bi ogoni napugule lalu gi dolalu bi lo wini. Ani layagola Yuda ti anda hongohe wai pabeanda hongohe biago wahalu tagira ibini. 62 Ani lalu kini ibugua Saiono nene puwa handalu hearia wai pabe hongohe heago hondowa habo nalolene bi lo wiyago pugualu ibunaga ami agali biaruhondo wai pabe hongohe ogoni bo gialo wahai hadaba lene. 63 Ani lalu ibuni abale dai bialu Andiogo tano pene. Andiogo dai buwa handalu hearia Pilibi tanonaga agali haguane hearia hendene. Ani hondowa kini ibugua Pilibila wai bialu Andiogo tano ibuni mo yu dai bini.

Copyright information for `HUI