b8.172 Mag 4.11
c8.221 Mag 14.18

1 Macc 8

Yuda wali agalime Lomo agaliru baba habo nalolene bi lo winigo ogo

Yudasa ibu hale hale halu hearia Lomo agaliru hongohe mini lene mbira howa hameigini mbira baba mini mo mbiraore howa gi tigani lalu libu nenege haga layago abale hale hene. Wali agali dindi tara tara ha karu bibahende lomo baba biabe mo mbiraore howa bialu haga kago ibunaga nenegeore lo haga ka layago hale hene.
(8.1)Magabi heangi Lomo dindi hongoheore mbira kaundiaha Yudia dindi ngago kaware ndo wini. Yuda tigua manda bialu dindi tara taraha wali agali tara tara padarume ibalu Yuda wali agali baba wai biyagua nde Lomome ti biamogo bulubada lo manda bialu ti Lomo baba nenege hole manda bini. Anigo mani howa Lomome hongo timbuni halu dindi wiaru bibahende bope hai howa iba solowara Medidereniana bedago ange ange palu yu pedago ibugua handame ho hai hene. Ani howa Yasu dindini íbu heangi Lomome Yuda dindibi handaya ho heagolaYuda tigua Lomo hame naleore hene. Tigua Lomo baba keba timbuni halu Lomoni hearu taliatagi hoa ho hene.
Yudasa ibu hale halu hearia Lomoali tigua wai timbuni biaga layagobi tigua Gala palearu baba wai bialu bope howa dagisi mialu ka layagobi hale hai ho hene. Ani bialu lomo tigua Sebena dindiha biabe bayale bialu ogoniha ngolo silibaru dugualu kago baya hangu handaya ho ka layago hale ha dege bini. Sebena dindi ogoni kaundiaha ngagoyu Lomonaga hongomebi mini gigabi wiagomebi dindi ogoni ibu karu lalu handaya ho ka layago hale hene. Dindi tara tara wiaruha howa kini dewaoreme Lomo agaliru baba wai bini. Ani biyagola Lomo amime wai hongo howa bialu kini dewa uruni bope hai halu ibugua tiha dagisi mali bibahendengi mialu haabo haga hene. Lomo tigua Masedonia dindinaga kini kira Pilibila Peseusula bope halu hameigini dindi tara taraha palearume Lomoaliru baba wai biyarubi bibahende bope halu bini. Sirianaga kini timbuni mini lene Andiogusu tebone henegomebi Lomo agaliru baba wai bini. Tinaga wai biagane nogo elebana handari mbira pira kira (120) halu ami agali nogo hosini biruwa wai biagabi garoale karisini heyu howa wai biagabi dewaore hene. Ani heago helowa Lomo tigua uruni mo emene howa bo haealabaga biai hene. Ani buwa Andiogusu minalu garabaya helene. Ani buwa Andiogusu ibunihondo mali bibahendengi dagisi muni ngi lalu ibu igini aguane muni ho aribia hayarume heba dagisi mani dewaore Lomo tagu mialu haabo hene. Ani bialu tinaga agali haguane mini lene hearu minalu Lomo dindiha garabaya helaga bini. Ani bialu Lomo agali tigua dindi baya maru Indiabi Midiabi Lidiabi ibunaga gabumane andaneha helaga bini Lomo tigua dindi uruni Kini Andiogusunaga wiago bo mialu Kini Yumenese giha ya haga bini.

Ai Lomo tigua hale ho hearia Girigime Lomo baba wai buwa bo biba holebira laya hale howa 10 Lomo tigua ami agali dewaore tidi yalu Girigi baba wai bule pene. Puwa wai bialu Girigi bo podahana hene. Lomo tigua Girigiali one waneigini bu hearu garabaya haru hai halu dabudabu wiaru mo pagebu yai halu dindibi ti karulalu bini. Lomo tigua Girigi dindiha wai pabeanda hongohe wiaru bo gialo wahai halu wali agali bu hearu garabaya biabe ale bia haga helalu binigo ayu ani wiaabo henego nga. 11 Lomo agali tigua dindi bibahendebi dindi iba dombeneha wiarubi wali agali Lomo agalihondo mine hayaru bibahende bope hai halu bini. 12 Ai hameigini maru Lomo agali baba nenege howa ti heba mandagi haga bu hearume ti baya hangu handaya ho habe lalu olaga bialu hene. Tigua mana ogonidagua bialu kini kaware hearubi kaundiaha hearubi bibahende bo podahana hai halu bini. Ani biyagola wali agali bi te uruni hale hayarume Lomo agalia gi howa mogo lalu hene. 13 Ani bialu Lomo tigua dindi mbiraha agali mbira kini heloa hayagua nde kini helaga biaga. Ani bialu mbirali kini henego dugu wahoa biyagua nde kini kago dugu wahaga ka. Ani bialu heagome Lomo agaliru ti hongoheore halu mini lene hene. 14 Ai lomo agaliru ti mini lene hongohe ani ha howa tigua kininaga manda karulolebi kininaga manda karulolebi kininaga aga karulalu tininaga mini yaraga holene manda nabi haga hene. 15 Tinaga gabumane ngoai holene anda bialu anda timbuni ogoniha memba handari tebirani pira kira (320) bibahende íbu ngoai howa wali agali bayale helonaga biabe bulenenaga bi lalu dindi mo heya holenenaga bi lalu bule horo bibahendengi mo ngoai haga hene. 16 Mali bibahendengi tinaga memba mbirame gabumane biabe bulenebi dindi bibahende ngarubi handaya ho helo dabo helaga biaga hene. Wali agali bibahendeme agali haguane ogoninaga bi hale hai halu mbirale mendealinaga ngago ti dimagoli nahaga hene.

17 Ai Yudasa ibugua agali kirali Lomo pialu Lomo gabumane kagohondo nenege haba lama bi yalu pudaba lene. Agali mbirago Agoso aguane Yone igini Yubolemusu pialu mendego Eleasa igini Yasonola pudaba lene. b  18 Yudasa ibugua ogonidagua binidagoni irane Girigi kini kagome ibalu Isaraele wali agali bo hilo waholobada lo manda buwa Lomo gabumaneme ibu biamogo bialu ibunaga genda ngago mo wahole ibilonaga manda buwa ani lene. 19 Yubolemusula Yasonola hariga luore pialu Lomo anda pene. Puwa Lomo gabumane anda heagoria anda puwa libugua gabumane agali biru wiaruhondo lalu, 20 Yudasa Magabeusu ibu hamenerubi Yuda wali agalibi tigua Lomo tí baba nenege halu ina mini mo mbiraore ho hami̱ya habo nalolene bi lo wule pudaba laya handala ibiriba, lene.

21 Ani layagola Lomo tigua bi ogoni karulape lalu, 22 Tígua habo nalolene bi uruni bi gili biaga boronosime wabini mbalape wiagoria gilibu wialu Yarusaleme yu dai bidaba, lene. Bi gilibuwi boronosime wabini ogoni hameigini kiralime habo nalolene bi lo winigonaga manane wini. c  23 Habo nalolene bi lo gilibu winidagoni ogo, Iname mbirale bibahende bayale bulene dege Yuda Lomolanaga dindi ngagohabi iba solowara bedagohabi wiaabo helo hame ledema. Horo mbiru libuha ke̱ nahelo. Ani bialu libu wai nabilo hame ledema. 24 Hameigini tara kagome Lomo baba wai biyaguabi Lomonaga nenege kago baba wai biyaguabi 25 nde Yuda ibugua nenegeoreme biagadagua Lomo baba mo mbiraore halu waitigi ogoni baba wai bulebira. 26 Ani bialu Yuda tigua Lomo baba wai biragohondo tomobi munibi wai bulenealebi iba sibibi uruni ale mbirago mulene nawiore. Iname bi ogonidagua laramago Yuda tigua talialu howa inahondo yolo ngi lolene nawi.

27 Anidagua dege hameigini tara kagome Yuda bayagua nde Lomo tiguabi Yudala libu hamenelaore haradagua bialu waitigi baba wai bulebira. 28 Ani bialu Lomo tigua Yuda waitigi kagohondo tomobi munibi wai biaga ngarualebi iba sibibi mbirago Yuda waitigi kago mulene nawi. Ina Lomome bi ogonidagua laramago ke̱ halu mana mende bu aribia naholeberema.

29 Bi ogonime ina Lomo kemagome Yuda wali agali baba habo nalolene bi lo werema. 30 Anigo mani howa libugua bi lo mbira howa habo nalolene bi maru latago holeyaguabi maru mo waholeyaguabi karulape dege. Mo iriari bulenego bayale heneneorego bulene wulebira.

31 Ani bialu ina Lomome beba mbira gili bialu Kini Demidiriasa hearia í̠na Yuda wali agalihondo bialu hariyago mana ko biriya lalu gilibu pelarima. Ina bi ogodagua larima. Inanaga nenegebi ina heba hagabi Yuda kahondo mana ko biriyago aginaga biribe. 32 Í̠na Yudahondo ko lone beregola tigua ina kemaria ibuwa í̠na biridago bi lalu ina Lomohondo langiyagua iyame wai dindinibi iba solowara bedagoriabi bibiya, lalu bi gilibu pelarima, lene.

Copyright information for `HUI