1 Macc 9

Yudasa Magabeusu homenego ogo

Ai kini Demidiriasa ibu hale hayane Nigano halu ibunaga ami agalirubi homai haya layago hale howa ibugua Alagimusubi Bagidesebi Yudia pudaba lene. Libu ayu ogoni halu mende pialu ami agali marubi haru halu pene. Tigua hariga Giligala tano wiadagua pialu wali agali Abela dindiha dindi emene Mesalodini bu hearu baba wai bule balai anda ogoriani bini. Ani buwa tigua wali agali dewaore bo wahai halu dindi ogoni karulo hene. Mali handari mbira pira duriani kira (152) layagola mali ogoninaga ege mbira hayagola Yarusaleme baba wai bule puwa balai anda kaware bini.
(9.3)Yuda tinaga ege mbira mini Nisana laga. Ege ogoni inanage ege tebone manelani (Masi Aiborolo) larago dombeneha haga wini.
Ani bialu mani ti heyalu Beria dindi wiagoria pene. Tinaga ami agali daosini dege pira kira (20,000) haru halu ami nogo hosini biruwa wai biaga daosini kira (2,000) haru halu bini.

Yudasa ibu dindi mini Elasa wiagoria hene. Ami agali ibunime dabene daosini tebira (3,000) hene. Ani howa waitigi dewaore ibiyago hondowa ti gi timbuni hene. Ani howa dewaore balai anda bu hayago wahalu ibida piai hene. Ani piai hayagola ami agali handari halira (800) hangu hene. Ai Yudasa ibugua handalu hearia ibunaga ami agali ibida piai halu waitigi hapara hayago hondowa ibunaga ami agali biaru lone mo ngoai holene henge nawi ibida piai hayagola ibunaga bu miniha mini naibi ndibulo wahene. Pigane ibunaga bu miniha duru lalu gi ho henego ai mani howa ami agali maru hadai bu hearuhondo lalu, Ayu iname wai bialu wayali holeberemabe toba ho kogo ai iname wai bimi̱ya, lene.

Ani layagola agali maru hearume ibunaga mini mo beregedalu lalu, Iname wai bibe nahedago ina hameneru heba howa wai bimi̱ya emene hadai bima. Ayu ina emene dege kamagoni, lene.

10 Ani layagola Yudasahanda ladai bialu lalu, Ani nabuleore. Ina waitigi handalu ibida polene nawi. Inanaga homolene horo ayu ibiyagua nde iname mogo lalu gi holene nawi. Inanaga damene bu karunaga homa haramagola inanaga mini bayale mini lene wiaabo holebira, lene.

11 Ai Bagidese halu ibunaga ami agali biaru tinaga balai anda helalu Yuda baba wai bule manda manda bialu hene. Ani howa ami agali nogo hosini biruwa wai biaga hearu ti halu kira talebuki halu tidiyu haga haga bini. Ami agali maru ege to̱le̱ puni yuwa baga hearubi danda timu yi hearubi tigua ami agali dewaore mani ibilo ti bamba hene. Ani bialu ami agali wai baya hangu biagaru tigua wai bamba howa hene. 12 Bagidese ibu gi tigahayagi hene. Waitigi halu kira biago pilipe biguli pu lama wai bule tidi yalu pene. Ani piyagola Yudasanaga ami agali hearu tiguabi pilipe biguli pu lalu wai pora bini. 13 Ani bialu wai gime minaga minaga biribiha geme dindi kulu lalu ema bilene. Wai egerebahagi howa binigo bialu hebine alendo ni palene.

14 Ani bialu howa Yudasa ibugua handalu hearia Bagidese halu ibunaga ami agali haguane hearu gi tigahayagi hearia hendene. 15 Ani heago hondowa Yudasahanda ibunaga ami agali wai gi nahaga pari wayali hearu dabowa haru halu Bagidese halu ibunaga ami haru hagaru heagohayagi wai gialaanda howa balu bo hengedalu maru talima pugu pugu bialu Asadodo hari nene wiagoria talidaga hene. 16 Waitigi biarume handalu hearia ti aria gi tigahayagi hayago ibira hayago handalu tigua Yudasa halu ibunaga ami agali biaru erembiraha aribia howa wai bima talima pene. 17 Wai bu alendo halu ami agali mende mendehabi kirabaliha timu dewa hai halu dewa homalu bini. 18 Yudasa ibunibi homaya handala ibunaga ami agali hearu ibida piai hene. 19 Mani ibu hamene Yonadana Saimonolame libu hamene tingini mo yalu pene. Mo yalu puwa tinaga aba mamaliru homali wiagoha Modeini tanoha hora halu duguanda howa dugu bialu dara ho hene. 20 Isaraele wali agali Yudasa duguanda dugu bialu horo dewaore howa tigua lalu, 21 Darabiore ina Isaraele wali agali mo wialu haru dai biaga agali haguane biago nde aginaga hayada, lalu hene.

22 Tigua Yudasahanda binigo damene bibahendeore biabe timuni bini ngarubi wai bini ngarubi bibahende te gili bulene dewaoreyagola tigua gilibu wiai nahe.

Yonadanahanda Yuda handaya ho hene

(Be 9.23—12.53)

Yonadanahanda ibu hamene Yudasanaga henge ibuni minigo ogo

23 Yudasa homayagola wali agali Anduane Homogonaga bi mana mo yo handaga hearu Isaraele dindiha lone tagira íbu hene. Ani bialu agali mana ko biaga hearu ti hongo lone miadai buwa hongo ho hene. 24 Ogoningi tomo gariangi howa tomo nalu holene nawiyagola Isaraele wali agali ti waitigi baba hama pugu pugu bini. 25 Ani heagola Bagidese ibugua Yuda agali Anduane Homogo gi nahaga hearu dabalu tigua Yuda dindi handaya ho howa haru helo dabo helaga bini. 26 Agali haguane uruni tigua Yudasa aria hearu baya hangu taya buwa minu yalu Bagidese hearia pugu biyagola Bagidese ibugua agali uruni mo taga halu mo ko haga bialu hene. 27 Ai Isaraele wali agali mo ibu wini. Agali maru Anduane Homogonaga bi manalatagi halu mbiwia haga henegoria howa hama ibalu ayu ogoni dombeneha Isaraele dindiha genda timbuni ogonibi mbira nawinigo pigane ayu anda ibini.

28 Ai Yudasa nenego hearu ti mo mogo bu biruwa tigua Yonadanahondo lalu, 29 Í̠ hamene Yudasa homayagola ainde ayu agali ko Bagidese halu ibu aria karu homelo bo waholene agali hongohe Yudasa ale mbira naheore harimada. 30 Ani manda buwa ayu iname í̠na í̠ hamene Yudasanaga henge mialu agali haguane ibu hayadagua ha aribia howa í̠na ina wai haru bamba hagane habelo hame ledema, lene. 31 Ani layagola horo ogoningi Yonadana ibugua ibu hamene Yudasanaga henge ibuni mialu Isaraele wali agalinaga agali haguane hene.

Yonadanahanda Isaraele haru halu wai penego ogo

32 Ai Yonadana Isaraele wali agalinaga haguane ka layago hale howa Bagidesehanda Yonadana bo wahole hariga taya bialu hene. 33 Anigo ai Yonadanabi ibu hamene Saimonobi ibunaga agali bu hearubi tigua Bagidesehanda ibu bole ka layago hale halu ti ibida pialu dindi ko iba dalu naibaga Tegoa dindi wiagoha puwa iba hambiaga iba uli mini Asaba laga wiagoria anda bu hene. 34 Sabada horo mbirungi hayagola Bagidese ibu hale hayagola Yonadana halu ibu aria biaru ogoniha ka lene hale halu tigua abaleore iba Yodana domaede halu pene. 35 Ai Yonadana ibugua ibu hamene mbira mini Yone ami agalinaga biabe biaga hearunaga agali haguane henego ogonihondo lamialu, Yonadana ibu nenege maru Nabadia dindiha karu hondo pudaba. Í̠naga dabudabu ngaruni ti daluha ngeloabe, lalu hale hene. 36 Ani lama pialu hearia agali maru Yambiri aria Medeba tano howa ibalu tigua Yone garabaya haru halu dabudabu biaru ti mo page yalu pu wahene. 37 Emene howa Yonadanala ibu hamene Saimonola libu hale halu hebiria Yambiri hameigini bu hearu turu timbuni ho ka layago hale hene. Ayu dege mbirali wali dabu biyagola wali agali dewa Nadabada tano howa wali agalime dabu bilodago haru halu harigani ibira layago hale hene. Wali ogoni Kenanali agali haguane mbira heago wane berenego haru ibini. 38 Ani layago hale howa libu hamene Yone homayago mitangi bialu libugua abale puwa harigani hari bare wiagoha bira do howa yu berene. 39 Libugua bira do howa handalu hebiria agali dewaore ngoaiho hearia de hendene. Tigua bi ladagadaga bima dabudabu dewaore yalu ibiyago hendene. Igiri wali dabu bulene biago halu ibu hamenerubi ibu damenerubi ti wali damene harigani ngola hale ibini. Tigua ngida tara tara bi wai biaganealebi dewa yalu ibiyago hendene. 40 Ai Yonadana halu ibunaga agali biaru ti porabu tagi halu puwa Yambiriali uruni baba wai bini. Agali dewaore homai haya handala maru hari bare wiagoha ibida pora bialu piai hene. Ani biya handala Yudali biaru ti dabudabu wiaru mo yalu pene. 41 Anidagua biyagola wali dabu bialu turu holene winigo wiaribia halu dara halu dugu bulene wini. Ngidaru balu iba gana bayale lole wiyago mo beregedalu dara howa agali homenenaga kiabu dugu bia aribia hene. 42 Libugua ogonidagua bialu libu hamenenaga darame pelayago pani libugua tininaga daramama pani bu aribia helene. Ani bialu libuni Yodana ibahayagi iba pugua wiagoha pene.

43 Libugua ani biya layago Bagidese ibu hale howa ibugua ami agali dewaore haru halu Sabada horoni iba Yodana peago angeni pu hene. 44 Ani íbu heagola Yonadana ibugua ibunaga ami agali biaruhondo lamialu lalu, Ayu genda yu kemago tara yu kemago ai wai bima, lene. 45 Ai hale halimu. Ayu ina homarimayaguabi nahome howa iname ti bai harimayaguabi karulape. Ayu waitigi tombehayagi ina halu iba Yodana erembiraha peda. Abene mende mendeha iba pugua ngagome ina polene henge nawida. 46 Ani bidago manda bialu ai Ngode Datagaliwabehanda ina biamogo bilo ibuhondo bi dege lami̱ya, lene.

47 Ani lalu wai bialu howa Yonadanahanda Bagidese ayume taula dibaro lo manda biyaria Bagidese ibu igiladai biyagola bako hene. 48 Ani biya handala Yonadana halu ibunaga agali biaru iba Yodanaha pora bialu howa ange mendeha do̱la ede hai hene. Anigo waitigi biarume iba do̱malu talima nape wahene. 49 Anidagua bialu horo ogoningi dege Bagidesenaga ami agali daosini mbira (1,000) agima homai hene.

50 Ani bialu Bagidese ibu Yarusaleme dai buwa Yudia dindiha tano wiaru mo hongo haga bini. Ibugua anda íbu holene Yarigo tanohabi Emaiasa tanohabi Bedehorono tanohabi Bedele tanohabi Timinada tanohabi Piradono tanohabi Tebono tanohabi bu helaga biai hene. Ibugua wai pabe daligaore biai halu wai pabe panga hongohe wabu helowa bengena aeane hongohe wabu helai halu bini. 51 Ani buwa tano bibahendeni ibunaga ami agali maru Isaraele wali agali genda mo mialu helo helaga bini. 52 Ibugua tano kira Bedesula Gesela mo hongoho ngelalu Yarusalemeni wai pabeanda heagobi mo hongo halu buwa tano uruniha ibunaga ami agali dewa helalu tinaga dabudabu dewa tano uruniha mo wialu bini. 53 Ani bialu Yuda agali haguaneru igini hearu minu yalu puwa Yarusalemeha wai pabeanda hongohe biagoha garabaya helaga bini.

54 Ai mali handari mbira pira duriani tebira (153) layagola mali ogoninaga ege mende heagola Alagimusuhanda agali bu hearuhondo, Wai pabe hongohe halu mende Anduane Homogonaga anda bu mabu bini heago wahalu gialo wahadaba, lene.
(9.54)Wali agali tara tara Yuda ndo karu ti pabe hobane mbira kagoha anda pialu pabe mende tamuha bu mabu bidagoha napiaga wini. Halu mende ogoniha Isaraele wali agali tini dege biaga wini. Ai tigua waipabe halu mende ogoni gialo wahai hayagua Isaraele wali agali tigua manda bialu wali agali Ngode Datagaliwabenaga deni dodohe karu Ngode Datagaliwabenaga anda kago mo dodohe helobada lo manda bini. Isaraele wali agalinaga ege mende inanaga ege mane daunila (Aiborolo Mai) hengeneha ibaga.
Ibugua anidagua bialu bamba agali Anduane Homogonaga bi mana latagi haga henerume biabe bini wiaru mo ko holenaga ani bini.
55 Anigo tigua biabe ogoni bule bialu heagola Alagimusu ibu warago timbuni bo wiagola ibunaga biabe bule bialu heago wahene. Warago wialu ibunaga ne hariga ndibulo wahai halu gi gebi homalu hongo naheore halu homai hene. Ani biyagola ibunaga ne hariga halalu bi mbira labe nahe halu ibu andagaha biabe bulene ngago gi ge ema bialu mbira bibe nahe hene. 56 Anidagua bialu Alagimusu tandaga timbuni nalu homene. 57 Ai Bagidese ibu hole halu hearia Alagimusu homaya layago hale halu ibu kini hearia dai biyagola Yuda wali agali ti mali kirani bayale hene.

58 Ani biyagola agali mana puguaga bu hearume ti mo mogobu howa lalu, Handadaba. Ai Yonadana halu ibunaga wali agali tiha mo ko nahe bayale kagoni ndobe. Ai wali agali uruni mbi mbira hanguni minalu garabaya biai helo Bagidese haru dai bimi̱ya, lene. 59 Ani lalu tigua Bagidese hondo piyagola 60 ibugua ami agali dewaore haru halu ibini. Ani ibu howa ibugua Yudiaha ibunaga nenege bu hearuhondo ohowa beba dindiha gilibu wia haga bialu, Tígua agali Yonadana halu ibu damene karu minalu garabaya helalimu, lalu lo pelaga bini. Ani layago Yonadana ibu hale ho bolangua ho heagola tigua minabe nahe hene. 61 Ani howa Yonadana halu ibu damene hearume agali haguane biabe ko uruni biaga pira duria (50) hearu minalu garabaya buwa homelo bo wahai hene. 62 Ani bialu Yonadanabi ibu hamene Saimonobi libu aria bu hearubi bibahende heyalu pialu dindi ko wali agali nahaga tano Bedebasi wiagoha hole pene. Tano ogoni bamba giala holebini winiyago ainde tigua puwa lone mo hongo halu arema buwa mo hongo halu hene. 63 Ai mbirale libugua bialu ka layago Bagidese ibu hale howa ibunaga ami agali hearu mo ngoai halu Yudia dindiha agali hearu ibidaba lalu bi lene. 64 Ani bialu mani ibuni dai buwa Bedebasiha wai bule balai anda bini. Ibugua wai biagane masiniru wabu ngelowa wai horo dewaore bialu hene. 65 Yonadanahanda ibu hamene Saimono wali agali baba tanoha helalu ibuni heba ami agali maru haru halu irabuha pene. 66 Puwa ibugua Odomera halu ibu damene bu hearu bo haealabaga bialu Pasirono halu ibu aria tinaga anda bu heagoria hemiria puwa bo wahai hene. Ani bialu puwa Yonadana halu ibunaga ami agali biarume Bagidese baba wai bini. 67 Ogoniangi Saimono halu ibu aria hayaru tigua tano howa tagira puwa wai biagane masini wabu wiaru irame heda hai hene. 68 Tigua Bagidese baba wai bialu Bagidesenaga ami agali hearu bope howa bo hengeda hai halu bini. Ai Bagidese ibunaga miniha wai hono wiago bibahende mo habo lai halu biabe bule biyago habo lai hayagola ibu manga timbuni ho hene. 69 Ibugua Yudali agali ko maru ibu ibabe lalu bi yalu ibiyaru baba tandaga timbuni hene. Ani howa Yuda agali ko uruni maru homelo bo wahai halu mani ibuni dalu dai bulene hamelo hene. 70 Ai Bagidese ibu ibuni dalu dai bule ka layago hale howa Yonadanahanda agali maru Bagidese karia puwa lalu, Yuda agali garabaya helariru bibahende golope halu gi tigani bialu wai palima lama pudaba, lene. 71 Bagidese ibugua bi ogoni hale howa ibuguabi Yonadanahanda bi layadagua dege bima lene. Ibugua bi hongohe gi dolowa lalu, I̱na Yonadana mo ko hole mbira nabi haabo halu homalu wahole, lalu bi lo wini. 72 Ani lalu ibugua garabaya agali Yudiaha howa haru peneru golope halu piai hadaba lene. Ani lalu ibuni dalu pu wahalu dai nabi wahene. 73 Anidagua binidagome wai timbuni Isaraele dindi biaga wiaru biba helene. Ai Yonadana ibu Migimasa tano wiagoria pu hene. Ani howa ibugua wali agali bibahende handame howa haru hai halu wali agali Ngode Datagaliwabenaga mana puguaga hearu bibahende bo wahai haga bini.

Copyright information for `HUI