a16.1Ab 24.17, Lm 15.25-26, 2 Ko 8.1-9, Ga 2.10
b16.2Ab 20.7, Mo 1.10
c16.5Ab 19.21
d16.6Lm 15.24, Ta 3.12
e16.7Ab 18.21
f16.8LBM 23.15-21, Man 16.9-11
g16.8-9Ab 19.8-10
h16.9Ab 14.27, 19.8-10, 2 Ko 2.12, Kl 4.3, Mo 3.8
i16.101 Ko 4.17
j16.121 Ko 1.12, 3.6
k16.13Iba 31.24, 1 Ko 15.1, Eb 6.10, Pb 1.27, Kl 1.11, 1 Te 5.6
l16.141 Ko 14.1, 1 Pi 4.8
m16.15Lm 16.5, 1 Ko 1.16
n16.161 Te 5.12
o16.18Pb 2.29
p16.19Ab 18.2, 18.18, 18.26, Lm 16.5, 2 Ti 1.15
q16.20Lm 16.16, 2 Ko 13.12
r16.21Kl 4.18, 2 Te 3.17
s16.22Ga 1.8-9

1 Corinthians 16

Ngode Datagaliwabenaga wali agali munime biamogo bulene ngago ogo

Ai Ngode Datagaliwabenaga wali agali Yudia dindini karu munime biamogo bulene ngagonaga i̱na Keriso hameigini Galesia dindini hagahaga bidaruhondo bilimu larudagua tíhondobi ani bulene nga laro. a  Horo Sande bibahendengi tígua hangu hangu howa tínaga muni mirimidagua tale bialu muni maru mo bagi ho ngelaga bilimu. Ani birimiyagua i̱ tí kamiria eberoangi muni mo mogo bulene irane nawulebira. b  I̱na íbu howa agali maru tígua dabarimigo Keriso hameigini Yarusalemeni karu karia muni yalu pelo tihondo i̱na beba gilibu yalu pudaba lolebero. I̱ polene ngayagua nde ti i̱ heba poleberema.

Polohanda ibaga bulenaga manda manda binigo ogo

I̱na Masedonia dindi polene ngaore manda bialu kogo pialu howa tí kamiria tagira ibagua. c  Ibuwa tí heba emene lu holene mitangi bidogo ira yuni gilope howa dagare biagane horo bibahenderu tí heba haabo holebero bada. Aguani tí heba emene howa i̱na maha polene ngadagua poliya tígua i̱ biamogo bialu ngua holeberami. d  I̱ tí kamiria ibalu abale bolangua halu polene hame nale kogoni. Anduane Homogohanda i̱ tí heba lu holene henge ngiyagua nde luore hami̱ya manda bu ko. e 

I̱naPendigosi horo ibilo tangi i̱ Ebesa ogoriani holene manda bu ko. f, g  Waitigi dewa karuni helowa i̱ ogoriani howa biabe bayuwa bulene henge timbuniore ngagoni. h 

10 Timodi ibu tí kamiria ibiyagua tígua ibu mo turu halu nenege hinu halimu. I̱na Anduane Homogonaga biabe bialu kodagua ibuguabi bialu kagoni. i  11 Tígua Timodi handape nahe howa bayuwa de hondo halu i̱ kogoria dai bilo ibu ibaga bialu kagoria tígua biamogo bialu mo turu halimu. Ibu Keriso hameigini maru heba i̱ koria dai bulebira mitangi bialu kogoni.

12 Ai inanaga hamene Aboloso mitangi bialu bi mbira laro. Ibu Keriso hameigini maru heba tí kamiria ibilo i̱na mo poa haabo haruli. Ani bialu hewaria ibu áyu ogoni polene mitangi nabi ka. Mani ibu henge wirangi ibulebira. j 

Bi lamaro bidago ogo

13 Tígua mamage halubi mini mbiraore wirimigo bilinahe ho halubi gi nahe howa hongohe halubi halimu. k  14 Biabe bibahende beremigo gubalini howa bialu halimu. l 

15 Sebanasabi ibu damenerubi ti hayago manda bu kami. Tigua wali agali Agaia dindini howa Yasu Kerisohondo mini mbiraore ti pigane wialu Ngode Datagaliwabenaga wali agali biamogo bulenaga biabe bialu kagoni. m  16 I̱naga hamene mbaliniru-o uruni tigua biradagua tí kamirume nde talialu bialu halimu. Wali agali marubi ti heba biabe biamogo bialu karu de hondowa tigua biradagua tí kamirume nde talialu bialu halimu laro. n 

17 Sebanasa Podunadasa Agaigasa imaru ti i̱ hewaria ibiyagola i̱ turu timbuni harugoni. Tígua ibiradagua uruni tigua íbu aribia hayagoni. 18 Ti tebiralime tí mo turu hayadagua i̱bi mo turu hayago agali urunibi iname mitangi timbuni bulene nga. o 

19 Keriso hameigini Esia dindini hagahaga bu karume, Tí mitangi bu kama, lalu lawia hara. Aguila Pirisilala Keriso hameigini libunaga andagani ngoai hagarubi tigua, Ina Kerisoha howa turu halu tí mitangi bu kama, lalu lawia hara. p  20 Keriso hameigini oali karumebi, Tí mitangi bu kama, lalu lawia hara. Tí bibahende kamiru gubalini halu gi tigani bialu mini yani howa turu haga bilimu. q 

21 I̱ Polohanda i̱ni gime gili bialu, Tí mitangi bu ko, lalu gili bero. r 

22 Mbirali Anduane Homogohondo gubalini naheyagua ibuhondo ha holene nga. Inanaga Anduane Homogo íbu-o. s 

23 Anduane Homogo Yasunaga biamogo bia holene tí heba wiaabo helo hamelo ko.

24 I̱ Keriso Yasuha howa i̱naga gubalini holene tí bibahendeha helaro.

Copyright information for `HUI