a2.11 Ko 1.17
b2.2Ga 6.14, Pb 3.8
c2.3Ab 18.9, 2 Ko 10.1
d2.4Lm 15.19, 1 Ko 1.17, 1 Te 1.5, 2 Pi 1.16
e2.52 Ko 4.7, 6.7
f2.61 Ko 1.28, Eb 4.13, Pb 3.15, Hi 5.14
g2.7Lm 16.25-26, Eb 3.5, 3.9, Kl 1.26, 2 Ti 1.9
h2.8Lg 23.34, Yo 7.48, Ab 13.27, 2 Ko 3.14
i2.9Ais 64.4
j2.10Md 13.11, 16.17, Yo 14.26, 1 Yo 2.27
k2.11Min 20.27, Yar 17.9, Lm 11.33-34
l2.12Yo 16.13-14
m2.131 Ko 1.17, 2.4, 2 Pi 1.16
n2.14Md 16.23, Yo 8.47, 14.17, Lm 8.5-7, 1 Ko 1.18, 1.23
o2.151 Te 5.21, 1 Yo 2.20, 4.1
p2.16Yob 15.8, Ais 40.13, Yar 23.18, Yo 15.15, Lm 11.34

1 Corinthians 2

Keriso ira bangani homenegonaga lamulene ngago ogo

I̱ hamene mbaliniru-o i̱na tí hemiria pigane ibirungi Ngode Datagaliwabe bi mana henene ala mo pani nahe ngelenego langialu howa bi taibi manda timbuni bulenebi lalu ndo lawai haru. a  I̱na tí heba howa mana maru mitangi nabi Yasu Keriso dege mitangi bialu ibu ira bangani homenego te ogoni hangu langulene nga manda bu harugoni. b  I̱ tí heba íbu harungi hongo nahe gi halu duru lalu harugoni. c  I̱na bi larugobi mana lawai harugobi mini gigabiwime tingi howa bi lalu ndo Ngode Datagaliwabe Dinininaga hongo tíhondo walia halu ogonime lawai harugoni. d  Ani biyago Kerisohondo mini mbiraore wu kamigo agalinaga mini gigabi wuleneme ndo tene Ngode Datagaliwabe ibunaga hongoni howa birugome tí mini mbiraore wu kami. e 

Ngode Datagaliwabenaga mini gigabi wulene ngago ogo

Anigo i̱na Ngode Datagaliwabenaga wali agali mini bogabi karu tihondo mini gigabi wulene bi mana lamiruli. Mini gigabi wulenenaga bi mana ogoni dindialinaga ndo dindini agali haguane karu tinagabi ndo. Tinaga hongo holene ereba haragoni. f  Mini gigabi wulenenaga bi mana laruligo o Ngode Datagaliwabenaga mini gigabi wulene bi mana ala mo pani nahe ngelenego laruli. Bi mana ogoni dindialirume nahendelonaga ani ngelene. Bamba dindi nawabi howa Ngode Datagaliwabehanda mini gigabi wulene bi mana ogoni inanaga baya taraore holene wilonaga ani dabo ngelene. g 

Dindini haru hagane hearume mana ogoni manda nabi hene. Manda bu henedale tigua mini daliga taraore lolenenaga Anduane Homogo ira bangani ba para nakale. h  Anigo Anduane Homogonagambugani lo ngadagua ogo,

Mbirale wali agali tinaga deme nahendenegobi tinaga haleme hale nahenegobi
tinaga miniha andape nabinigobi
ogoninagaore Ngode Datagaliwabehanda ibuhondo gubalini ho karu tihondoore mule manda manda bu ngelene,
lalu gilibu nga. i 
10 Ogonigo Ngode Datagaliwabehanda ibu Dininiha howa inahondo ibunaga bi mana ogoni ala pani nahe ngelenego mo pani haya. Ngode Datagaliwabe Dinini ibugua bibahende de handai howa Ngode Datagaliwabenaga mana pani nahe ngelenegobi de handai ho ka. j  11 Mbirali ibunaga mini ngago aiwa manda bidabe. Ibuni dege manda bu ka. Anigo Ngode Datagaliwabe ibunaga mini ngago ibu Dinini ibuni dege manda bu ka. k  12 Ngode Datagaliwabehanda inahondo dindialinaga dinini ngiya ndo ibuni Dinini ibilayago ngiya. Ngode Datagaliwabehanda inahondo bibahende ngiyaru iname manda buluma̱yanaga ibugua ibu Dinini ogoni inahondo ngiya. l 

13 Anigo iname bi laramago dindialinaga mini gigabiwi howa lalu ndo kama. Ngode Datagaliwabe Dinini ibugua inahondo, La, laradagua iname Ngode Datagaliwabe Dininihe karu tihondo ibu Dinininaga mana lawai haramali. m  14 Ngode Datagaliwabe Dinini ibugua ngiaga ngaru mbirali ibunaga bu habaneha Ngode Datagaliwabe Dinini nahe kagome yu habe nahe ka. Ibugua ogoni galone ndodago lowa manda nabiaga ka. Wali agalinaga bu habaneha Ngode Datagaliwabe Dininihe karu tigua dege galonedalo manda biaga ka. n  15 Mbirali ibunaga bu habaneha Ngode Datagaliwabe Dininihe kago ibugua mbirale bibahende bayuwa manda bialu dababehe ka. Wali agali maru tinaga bu habaneha Ngode Datagaliwabe Dinini nahe karume Ngode Datagaliwabenaga wali agali ibunaga Dininihe karu bayuwa manda bialu nadababehe ka. o  16 Anduane Homogonaga mbugani lo ngadagua ogo,

Anduane Homogonaga bu mini aiwa manda bidabe.
Ibuhondo, Agua bibe agua nabibe, lalu mbirali aiwa labehe kabe,
lalu gilibu nga. Anigo Keriso hameigini kamarume ina Kerisonaga mini karulo kamagoni. p 

Copyright information for `HUI