2 Macc 9

Anduane Homogohanda Andiogusu pani nelo minigo ogo

(1 Magabi 6.1-7, 2 Magabi 1.11-17)

Ogoningi dege Andiogusu ibu Pesia dindi wahalu ibunaga ami agali maru hearu haru halu ibida dai bini. Ani dai bialu howa harigani Pesebolisi tano wiagoria anda puwa tano ibu mo wialu tinaga lotu anda heagoha muni dabudabu wiaru mo kayu bule manda bini. Ani manda buwa ibunaga ami agali biarume anda puwa wai bule pialu hearia dindi anduane tanoha hearume wai biadai bialu Andiogusunaga ami agali bo taliatagi hai hene. Ani biya handala Andiogusu taga timbuni howa dindi ogoni wahalu ibida pene. Ani puwa Egebadana tano tagira puwa hale halu hearia Yudame Nigano bope halu Timodinaga ami agali hearubi mo ko howa bo hengeda haya layago hale hene. Te ogoni hale hayagola ibunaga bu miniha ira hungu ale bialu hene. Ani biyagola ai Yudame ibunaga mini lone yaraga halu helo hame lene. Ai wali agali Pesebolisi tanoha hearume ibu bo taliatagi hayangi ibunaga mini mo guya hayagonaga keba howa ani bini. Ai ibunaga nogo hosime garo ale karisi yaga heagohondo lamialu nogo hosi bo daila halu geraiore la lene. Harigani ha̱lo ha nabi piaho wialu Yarusaleme anda pobe lene. Ani lowa ibu gibiore tingi howa lalu, I̱na Yarusaleme anda pialu tano ogoni Yuda wali agalinaga homali helolebero, lene.

Anigo ibu pialu Ngode Datagaliwabenaga godi lolene ngagoria pu holebira manda nabi howa ani lene.

Anduane Homogo Isaraele wali agalinaga Ngode Datagaliwabe kagome warago ko tara ereba naholene mbira Andiogusuha ibilene. Ibugua mine halu bi uruni lalu heangi dege tandaga timbuni yandare aleme gubaliniha nogoba hayagola tandaga timbuni nalu hene. Ibugua wali agali maru tandaga dewa mo mima ibaga bialu hayagonaga pani ibuniha dai bini. Anigo tandaga ogonime ibunaga miniha iriari nabini. Ibunaga mine hagane mana ogoni wanahene. Ibugua mine timbuni hene. Yuda wali agali mo gi holenenaga bi hongoheru lalu hene. Ani lalu ibunaga nogo hosi yaga heago mo daila hene. Ani gerai lalu piyagola Andiogusu nogo hosime gili laga karisi biagoha howa pilape halu dindini gi ge kuniru podo habolo baga biai hene. Ibuha mine holene manda wiagome ibu hongo gibihe kobe toba hene. Ibugua miniha mitangi bialu ibugua solowara bedagohondo bi lamerogo hale holobabe toba ho hene. Ani bialu hari nene wedarunaga genda magi manda ogodaguada lalu ibugua hondolobabe toba ho hene. Ani manda bu haga biago bame pilape hayagola dindini wiaria agalime lebera buwa mo yalu pene. Anidagua biyagome wali agali bibahendeoreme Ngode Datagaliwabenaga hongo panaga handa walia hai hene. Ani wiagola himi agali ko biagonaga de harigaha tagira ibalu tinginiha pugupugu bialu hene. Ani bialu heagola tandaga timbuni nalu wini. Ibu homo tungulo mia nabi wiaore dege ibunaga tingini bibahende togo biai hene. Tingini ngu timbuni biyagome ibunaga ami agali hearu odo yu pugupugu bialu 10 ibu biamogo bule kaware holene mbira nahene. Ai agali ogoni de handadaba. Abale harini yakundi karu ibunaga gime mo yu holene kobe toba ho haga hayago ogoni ndobe.

Andiogusuhanda Ngode Datagaliwabehondo bi galone mbira lo winigo ogo

11 Andiogusu ibu tandaga timbuni nalu wuwa ai ibunaga mine holene mana wiago wahene. Ngode Datagaliwabehanda ibu pani nelo mo miyagola tandaga timbuniore nalu wuwa ai ibunaga mini bayale tigabi wiadai bini. 12 Ibuni tingini ngu biyagome ibunaga ngui harigoha ngu timbuni biyagola ibugua lalu, Ina wali agali bibahende Ngode Datagaliwabe andaneha hai halu iname ibuni ale dege kobe toba holene henge nawiore ndobe, lene. 13 Ani layago lelowa Ngode Datagaliwabenaga dara holene ibuha nawini. Anigo agali ko ogoni ibugua Anduane Homogohondo ko nabule lalu bi hongohe lo wini. 14 Ibugua bi lo wialu lalu, Bamba i̱na abale pialu Yarusaleme Ngode Datagaliwabenaga tano loma bia hene wiago Yuda wali agalinaga homaliore ngelole manda birugo ainde ayu lone lo beregedalu Yarusaleme tini handaya ho howa gabumane tinime helo hongo mialu tini haru halimu, laro. 15 Abale Yuda wali agali homararunaga tingini ngarubi waneigini homene tingini ngarubi nogo biangorume nalu togo lelo tano pabe tagiraha batagi helo manda bu haru. Wali agali ko uruninaga tingini horo holene galone nawida lo manda bu haru. Ani manda bu harugo ai lone mini beregedalu Adene tanoha wali agali bayale kadagua dege helo hameledo. 16 Bamba i̱na gabo be ela nahagane loma bia hene Anduane Homogonaga andaha wiaru mo yalu dabudabu tara tara anda biagoha wiarubi mo yalu biru. Ai i̱na mbirale bayale tara tara ala wini uruni ale ndo gahengeoreru Anduane Homogonaga andaha mo wia aribia halu to̱latagi helolebero. I̱na i̱ninaga munime loma buleneru yolo biai holebero. 17 Ani bialu i̱ni Yudali ho halu wali agali dindi bibahendeha karume hale hai helo i̱ porogoha latagi haga bima polebero. Ani bialu Ngode Datagaliwabe ibu hongo gibiorehe ka lalu wali agali hale hai helo latagi holebero, lene.

Andiogusuhanda beba gili bialu Yuda dindiha pelenego ogo

18 Ngode Datagaliwabehanda Andiogusu ibuni ko biyagonaga pani ndo timbuniore nelo miyagome Andiogusu tandaga timbuni nalu hayago ereba nahe wiaabo hene. Ani wiyagola ai ibu lone dabi naholoboda lo manda bialu ibugua beba gili buwa bi ogo Yuda dindiha lo pelene.

19 Beba gilibu pelenedagoha bi ogodagua lene. I̱ Andiogusu i̱ kini howa ami haru haga agali haguane kogo i̱na i̱naga wali agaliore hene Yuda wali agali tíhondo bayale kemida laro. I̱na tínaga miniha mo palia holene karulo howa bayale halimulo hamelo ko. 20 Tínibi tínaga waneiginibi bibahende bayale howa mbirale bibahende tínaga mini ngemigoria talialu bayale dege wiagua nde i̱na Ngode Datagaliwabehondo turu halu ka̱i̱ lolebero. 21 Mana bayale tígua i̱hondo bialu haga wirimigo mitangi bialu turuho ko. I̱ Pesia dindi howa ibirugola warago ko tara mbirame i̱ minaya. Ani biyago manda bialu ayu i̱na tí bayale halimulo biamogo bulene manda bu ko. 22 Ainde i̱ lone dabi holoboda lo manda bido. Ani bialu i̱naga warago ko ngago dabi holebira lo manda bido. 23 Anigo ainde i̱ aba ibugua dindi maruha wai bu puwa mana bialu hayaru manda bido. Ibugua agali mbirame gabumane biabe bialu helo dabo helaga hene. 24 Ani binigo manda buwa mbirale mo ko holene mbira tíha anda ibiyagua wali agalime mogo lolene nawi. Agali mendeme gabumane biabe bialu kago tí manda bidemi. 25 Ani bialu gabumane maru i̱naga dindi ngago gibuni gibuni hama pedarume mbirale mbira agile tagira ibirabe hondole handaya ho hai ka. Ani kago manda bialu i̱ni homarogola i̱ igini Andiogusu kago ibu kini ho aribia helo dabo heledo. Horo dewaore i̱ni dindi hobane maru ngaruha de handama ibaga bule howa igiri ogoni ibugua tí haru helo helalu piruli. I̱na beba mbira ayu tínaga gilibu wia harodagua dege gilibu pelaru. 26 Ai mbirale bayale tí mbira mbira kemigo biamogo bialubi bibahende biamogo bialu i̱na bayale bialu haruligo mitangi bilimu. Ainde tígua i̱nihondobi i̱ igini kagohondobi miniha bayale dungulo halimulo hame ledo. 27 I̱ igini kini ho aribia hole kago ibuguabi nde tí baba biabe bayale bulene ngago bialu harulidagua bia aribia halu mo palia holene karulowa tí dara howa bialu harulidagua bialu holobada lo manda bido, lalu gilibu pelene.

28 Ainde agali koore howa wali agali dewa homelo bo wahai halu Ngode Datagaliwabe kago mege bialu haga heago nde wali agali tandaga nelo ibugua mo miaga wiadagua ibuni nalu wini. Ani nalu ibu dindi kaundia mbiraha hari bare wiagoha agali ko mini nawi daga nalene agali maru karuale mbira homaradagua homene. 29 Ani homayagola agali ibunaga nenege Pilibi mbira heagome ibunaga tingini ibuni dalu mo ya dai buwa hora hene. Ani hora halu mani Pilibi ibu kini igini Andiogusu gi halu ibu ibida Iyibi Kini Tolemi Pilomedo hearia pene.

Copyright information for `HUI