a2.1Man 16.9-11, Ab 1.14
b2.2Ab 4.31
c2.3Md 3.11
d2.4Mg 16.17, Ab 1.5, 4.31, 10.44-46, 1Ko 12.10, 13.1
e2.7Ab 1.11
f2.92 Ti 1.15
g2.151 Te 5.7
h2.17-21Yol 2.28-32, Seg 12.10, Yo 7.38, Ab 10.45, 21.9
i2.21Lm 10.13
j2.22Yo 3.2, 14.10-11, Hi 2.4
k2.23Md 27.35, Mg 15.24, Lg 23.33, Yo 19.18, Ab 4.28, 1Pi 1.20
l2.24Md 28.5-6, Mg 16.6, Lg 24.5, Ab 3.15, 4.10, 10.40, 13.30-31, 17.31, 1Ko 15.15
m2.27Ab 13.35
n2.25-28Iba 16.8-11
o2.291 Kin 2.10, Lg 1.32, 1.69, Ab 13.36, 2Ti 2.8
p2.302 Sml 7.12-13, Iba 89.3-4, 132.11
q2.31Iba 16.10, Ab 13.35
r2.32Ab 1.8, 2.24
s2.33Yo 14.26, Ab 1.4, 5.31, 7.55-56, 10.45, Eb 4.8, Hi 10.12
t2.34-35Iba 110.1
u2.36Ab 5.30-31
v2.37Seg 12.10, Lg 3.10-12, Ab 9.6, 16.30
w2.38Lg 24.47, Ab 3.19
x2.39Ais 57.19, Yol 2.28, Ab 10.45, 14.27, Eb 2.13, 2.17
y2.40Man 32.5, Pb 2.15
z2.41Ab 2.47, 4.4, 5.14
aa2.42Ab 20.7
ab2.43Mg 16.17, Ab 4.33, 5.11-12
ac2.44Ab 4.32-35, 5.12, 6.8
ad2.46Lg 24.53, Ab 1.14, 20.7
ae2.47Ab 2.41, 4.33, 5.14, 6.7, 11.21, 11.24, Lm 14.18

Acts 2

Ngode Datagaliwabe Dinini dalinigo ogo

Yu wali agalinaga horo timbuni miniPendigosi hayangi Yasu mana yu tiga biaga hearu bibahende anda mbiraha mandagi ngoai ho berene. a  Ani ngoai ho berearia puyabu hongo howa u e lagadagua hari daliga howa ibayuago hale hene. U e layuagome anda ti bereagoha laanda hai hene. b  Laanda hayagola mbirale ira hungu hegene ale ibuwa ti emboneni dolo ibira ibira biyago tini de hendene. c  Ani biyagola Ngode Datagaliwabe Dinini ibugua tiha to̱lai hene. To̱lai howa wali agali dindi tara taranaga bi lagalaga bilo Dinini ibugua ti mo la hene. d 

Yu wali agali Ngode Datagaliwabe mitangi biaga hearu dindi bibahendeha howa Yarusaleme íbu ngoai ho hene. Wali agali urunime u e layuago hale howa bibahende ngoai hene. Ngoai ho hearu hangu hangume hale halu hearia Yasu mana yu tiga biaga hearume bi taratara lagalaga biayuago hale howa ti mogolo hendene. Tigua mogo lowa lalu, Inanaga bi lalu karu ti bibahende Galili agali hangu ndoyagoda. e  Tigua ina hangu hangunaga bi lalu langirane haleho kamago agidabe. Ina dindi tara tarali íbu kamagoni. Padia howabi Midia howabi Ilama howabi Mesobodemia howabi Yudia howabi Kabadosia howabi Pondasa howabi Esia howabi f  10 Piriya howabi Pambilia howabi Iyibi howabi Libia dindi Sairini kaware howabi Lomo ariabi 11 Kiridi howabi Arebia howabi Yu wali agalibi wali agali maru ti Yu wali agali mana yu tiga biagarubi ina bibahende kamagohondo tigua inanenaga bi lalu Ngode Datagaliwabehanda biabe timbuni tara biyago langirago, lalu 12 ti mogo lowa lagalaga bialu lalu, Ogoni agidabe, lene.

13 Maru hearume mege bialu lalu,Waini iba áyu dege wabu wiago timbuni nayadago lulu yaragoni, lene.

Pidahanda bi mana laminigo ogo

14 Ani layago hale howa Pidabiabosolo maru beriali (11) biarubi ti heba howa ibugua tihondo bi hongo howa lalu, Ina Yu wali agali kamarubi Yarusalemeni kamirubi o biyagoni languliya bayuwa hale halimu. 15 Agali uruni lulu iba nayadago larimibe. Ani ndoyago. Horo áyu wene egerebagi dege kamago. g  16 O biragoni bamba Ngode Datagaliwabe manalatagi haga Yoelehanda mbiwia halu lowinidagua lola haragoni. Ngode Datagaliwabehanda layadagua Yoele ibugua lowinigo ogo,

17 Ngode Datagaliwabehanda lalu, Ha maro bulene horo kaware haragola i̱na buleberogo ogo. h 
I̱na i̱naga Dinini wali agali bibahendeha helolebero.
Tínaga waneiginime i̱naga bi mana latagi halu holebira.
Tínaga igiri daliaherume mbirale tara de gandeba hondolebira.
Tínaga agali waherume emaga hondolebira.
18 E̱ aniore buwa horo uruningi i̱naga biabe bia haga wali agalirubi
i̱na i̱naga Dinini tiha helolebero.
Ani berogola tigua i̱naga bi mana latagi halu holebira.
19 Hari daligaha biabe tara tara nahendene ale hongohe i̱na mo bia halu
dindihabi manane tara tara mo walia halu holebero.
Anduane Homogonaga Horo timbuni gibi pongo bo winigo naibidaha
darama ibunibi ira hungu hagua timbunibi heba hondoleberami.
Ni hundialu egebi darama ale dolebirago hondoleberami.
21 Ani birangi Anduane Homogohondo, Pele ngi, lararume pele mulene yulebira, i 
lalu, Ngode Datagaliwabehanda lene lalu Yoele ibugua bi ogoni lowinigo, Pidahanda lene.

22 Pidahanda lalu, Isaraele wali agaliru-o bi larogo hale halimu. Nasareteali Yasu ibugua agalime nabiagane alebi nahendene alebi taratara binigo Ngode Datagaliwabehanda Yasuha howa ani bini. Ani biyagome Nasareteali Yasu ibu Ngode Datagaliwabehanda loma bia hene howa biabe ogoni bule ibinigo bialu walia hene. Tí hemigoha howa biabe ogoni biyago hondowa tíni manda bidami. j  23 Yasu tí kamiruhondo minu ngulebirago Ngode Datagaliwabehanda ala manda manda bu howa ani bilo helene. Anigo Yasu homelo agali ko biaga hearume ibu ira bangani ba para helo tígua mo bia harimi. k  24 Yasu tongo layagola howa homanaga hongome ibu dariba nahabeheoreyagola Ngode Datagaliwabehanda ibu golope halu mo heya hene. l  25 Debidihanda Yasu mitangi bialu lenego ogo,

I̱na Anduane Homogo ibu i̱naga deni haabo heago i̱ de handaru.
Kome i̱ mo ema bia holilono ibu i̱ heba haabo haga ka.
26 Ogoninaga i̱ gubaliniha turu holene to̱lai halu i̱na bi turubi laro. m 
Ngode Datagaliwabe í̠na i̱ dinini humbirini andaga naheloleberego.
Í̠naga biabe bia haga loma biaho helarigonaga tingini togo nabilo heloleberego.
Tingini áyu kogoni howa awe bayaleore holebero lo yu tiga bidogoni.
28 Í̠na i̱ haabo holenenaga harigani poliya mo walia harigoni.
Í̠na i̱ heba haabo kegome turu holene i̱ha to̱lai holebira,
lalu Debidihanda ani laya, lene. n 

29 Pidahanda lalu, I̱ hamene mbaliniru-o inanaga mamali mini lene Kini Debidi mitangi bialu i̱na tíhondo tigatiga laro. Ibu homenegobi hora henegobi ibunaga homali áyu wiaabo kagobi manda bu kama. o  30 Abale ibu Ngode Datagaliwabe manalatagi haga hearia Ngode Datagaliwabehanda ibuhondo bi heneneore lo wialu lalu, Mahaore í̠naga aguanene mbiralime wali agalinaga kini í̠ kedagua helolebero, lalu lowinigo Debidi ibu manda bu hene. p  31 Ngode Datagaliwabehanda mani ogodagua bulebira mitangi buwa Debidi ibugua bi ogodagua lalu, q 

Ngode Datagaliwabehanda ibu dinini humbirini andaga hela nabi
ibu tinginibi homaliha togo nabini,
lalu bamba lenego Ngode DatagaliwabehandaMbirali Dabo Helenego homowa mo heya holebiragonaga mitangi bialu ani lene.
32 Yasu ogoniore Ngode Datagaliwabehanda mo heya hayagola iname handaiore harima. r  33 Ngode Datagaliwabe ibugua Yasu mo yaraga halu ibu Abanaga gi tigahayagi berelowa ibuhondo ibunaga Dinini ngulebero lowinidagua mini. Áyu handaramigobi hale haramigobi ibugua inahondo turu halu ngirago inaha hela hayago ogoni. s  34 Debidi ibuni dahuliya andaga iraga hene ndo ibugua lowialu lalu,

Anduane Homogohanda i̱naga Anduane Homogohondo lalu,
Í̠naga waitigi karu í̠naga geni malia ho wilo mo malia heloliya
í̠ i̱naga gi tigahayagi ogoria birabe,
lalu laya, Pidahanda lene. t 

36 Pida ibugua ani lowa lalu, Isaraele wali agali tí bibahende kamiru manda bilimu. Yasu ogoniore tígua ira bangani ba para harimigo Ngode Datagaliwabehanda ibu Anduane Homogo helobi Mbirali Dabo Helenego helobi helayagoni bayuwa manda bilimu, lene. u 

Wali agali dewaoreme mini beregedalu baboraya binigo ogo

37 Bi ogoni layago hale howa wali agali hearume tinaga gubaliniha nogobaore hayagola dara hene. Dara howa tigua Pidabiabosolo maru biarubi tihondo lalu, Hameneru-o ina agi bulene ngabe, lene. v 

38 Ani layagola Pidahanda ladai bialu lalu, Tí bibahende ko birimigonaga mini beregedalu Yasu Kerisonaga minini howa hangu hangu baboraya bilimu. Ani beramigola Ngode Datagaliwabehanda tígua ko birimigo domo wahalu tíhondo ibu Dinini ngulebira. w  39 Ngode Datagaliwabehanda, Nguleberoore, lalu bi lowinidagua tíhondobi tí waneiginihondobi wali agali kaundia karuhondobi ti Anduane Homogo inanaga Ngode Datagaliwabe ibugua ibu karia ibilo ololebiraru uruni ti bibahendehondo ngulebiraore, Pidahanda lene. x 

40 Pidahanda bi galone dewa hongo howa lalu bi marubi lalu, Tí ko biaga karu heba mandagi pani nolene ngagoria holemini, lene. y  41 Ibugua mana lamiyago hale howa wali agali dewalime yu tiga bialu baboraya bini. Horo ogoningi dege wali agali daosini tebira (3,000) Yasu aria hearuha ho gimbu bini. z  42 Tigua abosolo biarume mana lawai hayago hale halu Yasu aria hearu heba mandagi mini mbiraore howa biamogo bigibigi bialu tomo mandagi nalu Ngode Datagaliwabehondo bi laabo halu mandagi ngoai haga hene. aa 

Keriso hameigini howa mana bayale binigo ogo

43 Ngode Datagaliwabehandaabosolo biaruha howa agalime nabiagane alebi nahendene alebi biyagola wali agali bibahendeme handawa buwa mogolo hene. ab  44 Yasu mana yu tiga bu hearu bibahendeme mandagi mini mbiraore howa turu halu tinaga mbirale wiaru talebu migimigi bini. ac  45 Dindibi mbirale taratara wiarubi tigua yolo mialu muni miyaru tinaga aria biamogo bulene wiadagua biamogo bigi bini. 46 Horo bibahende ti Anduane Homogonaga andaha ngoai halu tinaga andaru pugupugu bialu bu mini hada howa turu halu tomo mandagi naga hene. ad  47 Tigua Ngode Datagaliwabe mini yaraga halu heago hondowa wali agali bibahende hearume ti mana tigabiore bialu kagoni laga hene. Horo bibahende wali agali maru mini mbiraore wigi biyaru Anduane Homogohanda ti Yasu aria hearuha ho gimbu bigi bilene. ae 

Copyright information for `HUI