a5.2Ab 4.34-37
b5.3Man 23.21, Lg 22.3, Yo 13.2
c5.12Ab 2.43, 4.32, 14.3, Lm 15.19, 2Ko 12.12
d5.14Ab 2.41, 21.20
e5.15Md 9.21, 14.36, Ab 19.12
f5.16Mg 6.56, Ab 19.11-12
g5.17Ab 4.1-2, 4.6
h5.19Ab 12.7-10, 16.26
i5.26Md 14.5, 21.26
j5.28Md 27.25, Ab 2.23, 2.36, 4.18, 7.52
k5.29Ab 4.19
l5.30Ab 3.15, 10.39, 13.29, Ga 3.13, 1Pi 2.24
m5.31Ab 2.33-34, 3.15, Eb 1.20, Pb 2.9, Hi 2.10, 12.2
n5.32Yo 15.26-27, Ab 1.8, 2.4, 10.44
o5.33Ab 2.37, 7.54
p5.36Ab 21.38
q5.37Lg 2.1-2
r5.38Ais 8.10, Md 15.13
s5.39Lg 21.15, Ab 7.51, 9.5, 1Ko 1.25
t5.40Ab 4.18
u5.41Md 5.10-12, 1Pi 4.13
v5.42Ab 9.22, 17.3

Acts 5

Ananaia Sabairala libugua binigo te ogo

Ani biyadagua agali mbira Ananaia ibu one Sabairala libugua dindi mbira winigo yolo mini. Muni muwa Ananaia ibu onela mini mo mbiraore howa ibugua muni ogoni tale bialu maru ngelalu maruabosolo biaru hearia yalu pene. a  Yalu ibiyagola Pidahanda Ananaiahondo lalu, Í̠na Ngode Datagaliwabe Dinini mo hondo hole dama Heyolabeme í̠ gubaliniha daraga helo henge mirigo agibe. Í̠naga dindime yolo mirigo maru do harigome í̠na Ngode Datagaliwabe Dinini mo hondo hole biri. b  Dindi yolo nami howa dindi í̠ninaga wiri. Í̠na dindi yolo muwa munibi í̠ninaga dege wiri ndobe. Í̠ bu miniha ogonidagua bule manda birigo agibe. Tindule larigo agalihondo ndo Ngode Datagaliwabehondo lari, lene. Pidahanda ani layagola hale howa Ananaia ibu odope howa homo tongolo mini. Ogonidagua biya layago hale hayaru ti gi timbuni hene. Ani biyagola igiri daliahe hearume ibuwa ibunaga tingini labolabome huba bialu tagira mo yalu puwa hora hene.

Tomo dawa duguabehe ale hayagola howa Ananaia one ibu agalini homayago manda nabi howa ibini. Ibiyagola Pidahanda ibuhondo lalu, Dindime yolo miribigo muni bibahende ogonibe, lene.

Ani layagola ibugua ladai bialu lalu, E̱ muni miribago bibahendeore ogoni, lene.

Ani layagola Pidahanda lalu, Í̠bi í̠ agalinibi libu haru Anduane Homogonaga Dinini ibugua agi birabe hondole ba handaribigo agibe. Í̠ agalini hora hayarume í̠bi yalu pole anda harabani áyu tamuha anda ibule ibarua, lene. 10 Ani layago hale howa ibu Pida geha abale odope howa homo tongolo mini. Ani homayagola igiri daliahe biaru ibalu ibu tongo lo mu wiago hondowa tigua ibunaga tingini tagira yalu puwa ibu agalini hora hayagoria dege hora hene. 11 Ani biya layago hale howa wali agali Yasu mana yu tiga biaga hearu bibahendebi wali agali marubi ti gi timbuniore hai hene.

Agalime nabiagane alebi nahendene alebi binigo ogo

12 Wali agali heba howaabosolo biarume agalime nabiagane alebi nahendene alebi dewa bialu hene. Yasu mana yu tiga bu hearu bibahende Anduane Homogonaga anda hane mbira mini Solomononaga Hane wiagoria ti mandagi ngoai haga hene. c  13 Ani ngoai haga biyagola wali agali hearume Yasu mana yu tiga biaru de hondowa ti bayaleore ka lalu tinaga mini yaraga halu hene. Ani biya tiraga wali agali maru tagira hearume Yasu mana yu tiga bu hearu heba holene gi hene. 14 Anigoyu wali agali dewa hearume Anduane Homogohondo mini mbiraore wigi bialu Yasu aria hearuha ha tago haga bini. d  15 Abosolo biarume biabe ogoni bialu heago hondowa tigua wali agali warago bo wiaru yalu ibuwa harigani mo ngelaga bini. Paliagane dagianibi tamungurunibi mo pale lowa hariga ti paleagoha Pida ibalu hariga ti padagoha ibiragola ibunaga muninime ti ge helo lowa ani ngelene. e  16 Dindi maru Yarusaleme kaware wiaruha howa wali agali dewaoreme tinaga damene warago bo wiarubi dama daragahe hearubi yalu ibiyagola bibahende mo dabi halu bayale hai hene. f 

Dahuliyalimeabosolo biaru garabaya golope henego ogo

17 Ani biyagolaloma binigo mo miaga haguane timbuni heagobiSadiusi agali hearu ibu heba hagarubi tiguaabosolo biarume bialu heago hondowa henge timbuniore lowa mo tandaga hole manda bini. g  18 Ani manda buwa tigua abosolo biaru minu yalu puwa garabaya andaha helene. 19 Ani helearia ogoningi mbiraga Anduane Homogonaga dahuliyali mbirame garabaya anda panga dugualu abosolo biaru tagira haru puwa lalu, h  20 Anduane Homogonaga andaha puwa holene gahengenaga mana wali agali lamilimu, lene. 21 Ani layago hale howa muna biyagola abosolo biarume Anduane Homogonaga andaha anda puwa wali agalihondo mana lawai halu hene.

Loma binigo mo miaga haguane timbuni heagobi ibu heba haga hearubi tiguaGanisolo te lole Yu wali agalinagaagali ala hene miniwi hearu mo ngoai hene. Mo ngoai howa tigua lalu, Garabaya andaha howa agali biaru haru ibilo lamule pudaba, lene.
22 Ani layagola mamage haga biarume garabaya andaha puwa handalu hearia abosolo biaru naheya handala Ganisolo agali biaru lamule dai bini. Dai buwa tigua lalu, 23 Iname garabaya andaha puwa panga logo ndibu lo wiagobi mamage haga hearubi de handarima. Panga dugualu anda puwa agali biaru naheoreyane tí langule dai birima, lalu lamini. 24 Ani lamiyagola hale howa loma binigo mo miaga haguane hearubi Anduane Homogonaga anda mamage hagarunaga haru haga agali heagobi tigua abosolo biaru agua biyabe toba howa mini burugulo hene. 25 Ti mini burugulo hearia agali mbira ibuwa ibugua lalu, Hale hadaba. Agali garabaya andaha garabaya bu helarimiru ti Anduane Homogonaga andaha pu howa wali agalihondo mana lawai halu ka, lene. 26 Ani layagola mamage haru haga biago ibu mamage haga agali heba pialu abosolo biaru hearia puwa haru dai bini. Wali agali dewa hearume ina ege to̱le̱me bolebirago lowa tigua abosolo biaru hendore haru dai bini. i 

Abosolo biarume gi nahe howa bi lenego ogo

27 Haru dai buwa tiguaabosolo biaruGanisolo agali biaru bereagoria handade ho helene. Helayagolaloma binigo mo miaga haguane timbuni biagome tigua bi lelo mo bi la halu lalu, 28 Yasu mini lalu mana lawai holene nawi lalu hongo howa langirimago. Ogoni mo wahalu mana biagoni Yarusaleme wali agalihondo loyogo larimi. Inahondo, Agali o homayagoni tígua barimi, loa ho kamigoni, lene. j 

29 Ani layagola Pidabi abosolo marubi tigua ladai bialu lalu, Agalime laradagua ndo Ngode Datagaliwabehanda laradagua buleberama. k  30 Tígua Yasu homelo ira bangani ba para harimigola howa ina mamalinaga Ngode Datagaliwabe kago ibugua Yasu mo heya hene. l  31 Yasu ibu Haru Hagabi Pele Ngiagabi helo Ngode Datagaliwabehanda ibu yaraga halu ibunaga gi tigahayagi berelene. Ngode Datagaliwabehanda ani biyago irane ogo. Isaraele wali agalime mini beregedelobi ko biyago domo wahelobi ani bini. m  32 Inamebi Ngode Datagaliwabehanda ibunaga bi mana biaga karuhondo Dinini miyago ibuguabi ani biyagoni de hondowa latagi halu hagaru ina kamagoni, lalu lamini. n 

Gamalielehanda bi lenego ogo

33 Bi ani layago hale howaGanisolo agali biarume keba timbuni haluabosolo biaru homelo bo waholene nga lo manda bini. o  34 Ani manda bialu heariaPerisi agali mbiraMana lo winigo lawai haga henego mini Gamaliele ibu heyini. Wali agali bibahende hearume ibu agali mini lene ka laga hene. Ibugua heyuwa lalu, Agali biaru tagira haru pudaba, lowa 35 Ganisolo biaruhondo lalu, Isaraelealiru-o agali uruni homelo bo waholene nga larimigo lone bayuwa manda bilimu. 36 Abale agali mbira mini Teudasa ibuwa ibugua lalu, I̱ agali timbuniore kogoni, layagola howa agali dewa handari maria (400) agima ti ibuha ho gimbu bini. Gabumaneme ibu homelo bayagola ibunaga talima piaga biaru purogo lalu mana lawai hayagobi ereba hai hene. p  37 Ani biyagola howa mani gabumaneme yasia layangi Galiliali mbira mini Yudasa ibini. Ibuwa ibunaga bime wali agali dewa ibuha yamiai halu hearia gabumaneme ibubi homelo bo wahayagola ibunaga talima piaga biarubi purogo lai hene. q  38 Ani binigo áyu agali o biaru heba te larimago tihondo mbira bia nabi wahalu helalimu. Agalime manda biagadagua bialu kayagua mana ogoni ereba holebira. r  39 Ani ndo mana ti bialu kago tene Ngode Datagaliwabe howa bialu kayagua iname Ngode Datagaliwabela waitigi howa wayali habe nahe holeberama, lalu Gamalielehanda lene. s 

Ibugua ani layagola hale howa Ganisolo agali biarume ibugua layadagua bulene nga manda bini.

Abosolo biarume Yasu mininaga taga pani turu howa nenego ogo

40 Ani manda buwa tiguaabosolo biaru olowa ibiyagola ti minu bowa lalu, Yasu mini lalu mana ogoni lone lawai nahalimu, lalu ti golope hene. t  41 Ani biyagola abosolo biarumeGanisolo bereagoria howa tagira puwa ti Yasu mininaga taga pani tandaga nolene Ngode Datagaliwabehanda ngiyago mitangi bialu turu timbuni halu pene. u  42 Ani buwa horo bibahendengi Anduane Homogonaga andaha howabi wali agali andagaruha howabi tigua Bi Mana Debene lawai halu, Yasu ibuMbirali Dabo Helenego ka, lalu lamialu haabo hene. v 

Copyright information for `HUI